കോയമ്പത്തൂർ: മനുഷ്യനേക്കാള് വലിയ കരുതല് മൃഗങ്ങള്ക്ക് കഴിയുമെന്ന് തെളിയിക്കുന്ന മറ്റൊരു സംഭവത്തിന് കൂടി തമിഴ്നാട് സാക്ഷ്യം വഹിച്ചിരിക്കുന്നു.
തുടിയലൂർ റെയില്വേ മേല്പ്പാലത്തിന് സമീപം മാനസിക വെല്ലുവിളി നേരിടുന്ന സ്ത്രീയെ ഉപദ്രവിക്കാൻ ശ്രമിച്ച പ്രതിയെ തെരുവുനായ്ക്കള് ആക്രമിച്ച് തുരത്തി. സംഭവവുമായി ബന്ധപ്പെട്ട് ഗണേഷ് നഗർ സ്വദേശിയായ പ്രതിയെ പോലീസ് അറസ്റ്റ് ചെയ്തു.
അർധരാത്രിയിലാണ് നാടിനെ നടുക്കിയ ഈ സംഭവമുണ്ടായത്. സ്ഥിരമായി ഈ സ്ത്രീയ്ക്കൊപ്പം കാണാറുള്ള രണ്ട് തെരുവുനായ്ക്കളാണ് ഇവിടെ രക്ഷകരായത്. മേല്പ്പാലത്തിന് സമീപം റോഡരികിലിരുന്ന സ്ത്രീയുടെ അടുത്തേക്ക് എത്തിയ പ്രതി ആദ്യം നായ്ക്കളെ കല്ലെറിഞ്ഞ് ഓടിക്കാൻ ശ്രമിച്ചു. എന്നാല് നായ്ക്കള് കുറച്ചുമാറി നിന്ന് പ്രതിക്കുനേരെ കുരച്ചുകൊണ്ടിരുന്നു. ഇതിനിടയില് പ്രതി സ്ത്രീയെ ഉപദ്രവിക്കാൻ ശ്രമിക്കുകയും സ്ത്രീ സഹായത്തിനായി നിലവിളിക്കുകയും ചെയ്തു. രാത്രിയായതിനാല് ആളുകളാരും തുണയ്ക്കില്ലാതിരുന്ന ഈ നിർണായക നിമിഷത്തിലാണ് നായ്ക്കളിലൊന്ന് കുരച്ചുകൊണ്ട് പ്രതിക്കുനേരെ കുതിച്ചെത്തിയത്. നായ പ്രതിയുടെ കാലില് കടിച്ച് വലിച്ചതോടെ ഭയന്നോടിയ പ്രതി അവിടെ നിന്നും രക്ഷപ്പെടുകയായിരുന്നു.
മറ്റൊരു കേസിന്റെ അന്വേഷണത്തിന്റെ ഭാഗമായി പ്രദേശത്തെ കടയിലെ സി.സി.ടി.വി. ദൃശ്യങ്ങള് പരിശോധിക്കുന്നതിനിടയിലാണ് പോലീസിന്റെ ശ്രദ്ധയില് ഈ ദൃശ്യങ്ങള് പെടുന്നത്. ദൃശ്യങ്ങള് വ്യക്തമാക്കുന്നത് പ്രകാരം നായ പ്രതിയെ ഓടിക്കുന്നതും ദൃശ്യങ്ങളിലുണ്ട്. ഉടൻ തന്നെ പോലീസ് അന്വേഷണം ഊർജിതമാക്കുകയും പ്രതിയെ പിടികൂടി കേസെടുക്കുകയുമായിരുന്നു. സംഭവത്തില് കൂടുതല് അന്വേഷണം നടക്കുകയാണെന്ന് പോലീസ് അറിയിച്ചു. മനുഷ്യന്റെ ക്രൂരതയ്ക്ക് മുന്നില് മൂകസാക്ഷിയാകാതെ, ജീവന്റെ വിലയുള്ള കാവലായി മാറിയ ഈ തെരുവുനായ്ക്കളുടെ ദൃശ്യങ്ങള് ഇപ്പോള് സാമൂഹിക മാധ്യമങ്ങളിലും വലിയ ചർച്ചയായിരിക്കുകയാണ്.
