കോട്ടയം: കോടിമത പുതിയ പാലത്തിന്റെ അപ്രോച്ച് റോഡ് നിര്മാണം പത്തിനുള്ളില് പൂര്ത്തിയാക്കുമെന്നു പൊതുമരാമത്ത് അധികൃതര്.
വികസന സമിതി യോഗത്തിലാണ് ഇക്കാര്യം വ്യക്തമാക്കിയത്. കാലവസ്ഥ അനുകൂലമാകാത്തതുകൊണ്ടാണ് ടാറിങ്ങ് വൈകിയതെന്ന് വകുപ്പ് വിശദീകരിച്ചു. പുതിയ പാലത്തിന്റെ അപ്രോച്ച് റോഡ് ടാറിങ് പൂര്ത്തിയാക്കുമെന്ന് അറിയിച്ചുവെങ്കിലും പുതിയ പാലം എന്നു തുറക്കുമെന്ന കാര്യത്തില് വ്യക്തതയില്ല. നിലവിലെ പാലത്തിന്റെ അപ്രോച്ച് റോഡ് താഴ്ന്ന് അപകടാവസ്ഥയിലായിട്ട് നാളുകളായി. റോഡില് ഭാഗിക ഗതാഗത നിയന്ത്രണം ഏര്പ്പെടുത്തിയിട്ടുണ്ട്.
തിരക്കേറിയ സമയങ്ങളില് വാഹനങ്ങളുടെ വേഗം കുറയുന്നതോടെ കോടിമതയില് ഗതാഗതക്കുരുക്ക് രൂപപ്പെടുകയും ഇത് നഗരത്തിന്റെ മറ്റു ഭാഗങ്ങളിലേക്കും നീളുകയും ചെയ്യുന്ന സ്ഥിതിയാണ്. അപ്രോച്ച് റോഡ് പൂര്ണമായി അടച്ച് നവീകരണം നടത്താന് ജൂലൈ രണ്ട് മുതല് തീരുമാനിച്ചിരുന്നെങ്കിലും ഇതിനെതിരെ വ്യാപക പ്രതിഷേധം ഉയര്ന്നതോടെ തീരുമാനം മാറ്റുകയായിരുന്നു. പകരം കോടിമത രണ്ടാം പാലം എത്രയുംവേഗം ഗതാഗതത്തിനായി തുറന്നുകൊടുത്ത ശേഷം പഴയ പാലത്തിന്റെ അപ്രോച്ച് റോഡ് നവീകരിക്കാനായിരുന്നു തീരുമാനം. അഞ്ചു വര്ഷത്തോളം നിര്മാണം നിലച്ചുകിടന്ന കോടിമത രണ്ടാം പാലത്തിന്റെ പ്രവര്ത്തനങ്ങള് ഒരു വര്ഷം മുമ്പാണ് പുനരാരംഭിച്ചത്. നഗരത്തില് ഗതാഗതക്കുരുക്ക് രൂക്ഷമായ സാഹചര്യത്തില് പാലം ഗതാഗതത്തിനായി തുറന്നുകൊടുക്കണമെന്ന ആവശ്യം ശക്തമായിരുന്നെങ്കിലും നിര്മാണം പൂര്ത്തിയാകുന്നത് വൈകുകയായിരുന്നു
