കോട്ടയം: ബസേലിയസ് കോളേജിൽ നിന്ന് ബിരുദത്തിന് സർവകലാശാലാതലത്തിൽ റാങ്ക് നേടിയ വിദ്യാർഥികളെ അനുമോദിച്ചു. ചടങ്ങ് ജില്ലാ കളക്ടർ ചേതൻ കുമാർ മീണ ഉദ്ഘാടനം ചെയ്തു.
സാങ്കേതികവിദ്യ അതിവേഗം വളരുകയും കടുത്ത മത്സരങ്ങൾ നിറഞ്ഞതുമായ കാലഘട്ടത്തിലാണ് ഇന്നത്തെ കുട്ടികൾ ജീവിക്കുന്നതെന്ന് അദ്ദേഹം പറഞ്ഞു. ഇക്കാലത്ത് കഠിനാധ്വാനം ചെയ്താൽ മാത്രമേ വിജയത്തിലെത്താനാകൂ. സമയത്തെ മികച്ച രീതിയിൽ വിനിയോഗിച്ച് ആത്മാർഥമായി പരിശ്രമിച്ചാൽ വിജയം ഉറപ്പാണെന്നും അദ്ദേഹം വിദ്യാർഥികളെ ഓർമ്മിപ്പിച്ചു.
കോളജ് പ്രിൻസിപ്പൽ ഇൻ ചാർജ് പ്രൊഫ. ഡോ. കെ.എസ്. മനോജ് നാരായണൻ അധ്യക്ഷത വഹിച്ചു. കോളജ് ബർസാർ ഡോ. തോമസ് കുരുവിള, ഡോ. ടി. പ്രിയതമ്പി, ഡോ. പാർവതി മോഹൻ, ഡോ. പി. ആരഭി, ഡോ. വിജു കുര്യൻ, ഡോ. മിഷേൽ എലിസബത്ത് ജേക്കബ്, ഡോ. ഷീബ ജോസഫ് എന്നിവർ സംസാരിച്ചു.
റാങ്ക് ജേതാക്കളായ അർച്ചന കുഞ്ഞുമോൻ, സാന്ദ്ര സുരേഷ്, ഐറിൻ എൽസ സുരേഷ്, നിധി ജോർജ്, ജോയൽ റോയി ജോസഫ്, മരിയ ജോർജ്, ചിത്രാകൃഷ്ണൻ, എച്ച്. ഹിമപാർവതി, സൈറ സാബു എന്നിവർ കോളജ് ജീവിതത്തിലെ അനുഭവങ്ങൾ പങ്കുവച്ചു.
