കൊച്ചി:എസ് എസ് രാജമൗലിയുടെ ബാഹുബലി എന്ന എക്കാലത്തെയും മികച്ച സിനിമയിലെ രാജാമാതാ ശിവകാമി എന്ന ഒറ്റ കഥാപാത്രം മതി നടി രമ്യ കൃഷ്ണനെ ആളുകള് തിരിച്ചറിയാൻ.
മലയാളം, തമിഴ്, തെലുങ്ക്, കന്നഡ, ഹിന്ദി ഭാഷകളിലായി നിരവധി സിനിമകളില് അഭിനയിച്ചിട്ടുള്ള താരം സിനിമ പ്രേക്ഷകർക്ക് ഏറെ പ്രിയങ്കരിയാണ്. ശക്തമായ സ്ത്രീ കഥാപാത്രങ്ങളെ അവതരിപ്പിക്കുന്ന രമ്യ കൃഷണന്റെ മുഖം സിനിമ ആസ്വാദകർ അത്ര പെട്ടെന്നൊന്നും മറക്കില്ല. അടുത്തിടെ രമ്യ പങ്കുവച്ച കാര്യങ്ങളാണ് ഇപ്പോള് ചാർച്ചയാകുന്നത്. സിനിമാലോകത്ത് കാസ്റ്റിങ് കൗച്ച് നിലനില്ക്കുന്നുണ്ടെന്നത് നിഷേധിക്കാനാവില്ലെന്നാണ് താരത്തിന്റെ വെളിപ്പെടുത്തല്. സിനിമയില് മാത്രമല്ല, സമൂഹത്തിലെ എല്ലാ മേഖലകളിലും പലതരത്തിലുള്ള ചൂഷണങ്ങള് നടക്കുന്നുണ്ടെന്നും അതിന് ലിംഗവ്യത്യാസമില്ലെന്നും രമ്യ പറയുന്നു.
'എപ്സ്റ്റീൻ ഫയലുകള് നോക്കൂ. സ്ത്രീകള്ക്ക് ഏറെ സ്വാതന്ത്ര്യമുള്ള ഇടങ്ങളില്പ്പോലും ഇത്തരം സംഭവങ്ങള് ഉണ്ടായിട്ടുണ്ട്. അങ്ങനെയിരിക്കെ ഇവിടെ ഇതൊന്നും നടക്കുന്നില്ലെന്ന് എങ്ങനെ പറയാനാകും? ഇത് സംഭവിക്കുന്നുണ്ട്, മുൻപും സംഭവിച്ചിട്ടുണ്ട്, ഇനിയും സംഭവിക്കും. എന്നാല് അത് എങ്ങനെ സംഭവിക്കുന്നു, ഒരാള്ക്ക് സമ്മതിക്കാനോ നിരസിക്കാനോ ഉള്ള അവസരമുണ്ടായിരുന്നോ എന്നതിലൊക്കെ കാലത്തിനനുസരിച്ച് മാറ്റമുണ്ടാകും', എന്നായിരുന്നു താരത്തിന്റെ വാക്കുകള്.
നിർബന്ധിച്ചോ സ്വന്തം ഇഷ്ടപ്രകാരമോ നിസ്സാരമായ ഇടപെടലുകളിലൂടെയോ പലവിധത്തില് ചൂഷണം സംഭവിക്കാമെന്നും രമ്യ ചൂണ്ടിക്കാട്ടി. സിനിമാമേഖലയില് മാത്രമല്ല, എല്ലാ തൊഴില്മേഖലകളിലും ഇത്തരം അനുഭവങ്ങളുണ്ടാകാമെന്നും സ്ത്രീകള് മാത്രമല്ല പുരുഷന്മാരും ചൂഷണത്തിന് ഇരയാകുന്നുണ്ടെന്നും താരം ചൂണ്ടിക്കാട്ടി.
'നിർബന്ധിച്ചോ സ്വന്തം ഇഷ്ടപ്രകാരമോ ചിലപ്പോള് വളരെ സ്വാഭാവികമായ ഇടപെടലുകളിലൂടെയോ ഒക്കെ ഇത് സംഭവിക്കാം. സംഭവിച്ചുകൊണ്ടിരിക്കുന്ന ഒന്നാണിത്. ആർക്കും നിഷേധിക്കാനാവില്ല. സിനിമ ഒരു ഗ്ലാമർ മേഖലയായതുകൊണ്ടാണ് ഇതേക്കുറിച്ച് കൂടുതല് ചർച്ചകള് നടക്കുന്നത്. സിനിമയ്ക്ക് പുറത്തും എത്രയോ സ്ത്രീകള് ഇത്തരം അനുഭവങ്ങളിലൂടെ കടന്നുപോകുന്നുണ്ട്. എല്ലാ മേഖലകളിലും ഇത് സംഭവിക്കുന്നുണ്ട്. ഇപ്പോള് അതില് ലിംഗവ്യത്യാസവുമില്ല. പിന്നെ എങ്ങനെയാണ് ആർക്കെങ്കിലും ഇത് നിഷേധിക്കാനാവുക?' എന്നാണ് അവർ ചോദിച്ചത്.
രമ്യ കൃഷ്ണനെയും തെലുങ്ക് സംവിധായകൻ കൃഷ്ണ വംശിയുമായുള്ള വിവാഹബന്ധം പ്രശനങ്ങളിലൂടെയാണ് കടന്നുപോകുന്നതെന്ന തരത്തില് പ്രചരിക്കുന്ന വർത്തകളോടും താരം പ്രതികരിച്ചു. തങ്ങള് വേര്പിരിഞ്ഞിട്ടില്ലെന്നും, ജോലിയുമായി ബന്ധപ്പെട്ട തിരക്കുകള് മൂലമാണ് തങ്ങള് രണ്ടിടങ്ങളിലായി താമസിക്കുന്നതെന്നും രമ്യ പറഞ്ഞു.
നെല്സണ് ദിലീപ്കുമാർ സംവിധാനം ചെയ്ത് രജനീകാന്ത് നായകനായെത്തിയ 'ജയിലർ 2'-വിലാണ് രമ്യ കൃഷ്ണൻ ഒടുവില് പ്രത്യക്ഷപ്പെട്ടത്. ധാരാളം ചിത്രങ്ങളാണ് താരത്തിന്റേതായി അണിയറയില് ഒരുങ്ങുന്നത്.






