കണ്ണൂര്: കണ്ണൂര് ശ്രീകണ്ഠാപുരത്ത് യുവതി കുളിക്കുന്നതിനിടെ നഗ്നദൃശ്യങ്ങള് പകര്ത്താന് ശ്രമിച്ച സംഭവത്തില് എസ്എഫ്ഐ നേതാവിനെതിരെ പൊലീസ് കേസെടുത്തു.
പൈസക്കരി ദേവമാതാ കോളേജിലെ എസ്എഫ്ഐ നേതാവും കണ്ണൂര് സര്വകലാശാല യൂണിയന് കൗണ്സിലറുമായ ചുഴലി സ്വദേശി കെ. നവനീതിനെതിരെയാണ് ശ്രീകണ്ഠാപുരം പൊലീസ് കേസെടുത്തത്.
ആഗസ്റ്റ് 20-നായിരുന്നു കേസിനാസ്പദമായ സംഭവം നടന്നത്. ശ്രീകണ്ഠാപുരം സ്വദേശിനിയായ യുവതി വീടിന് പുറത്തുള്ള കുളിമുറിയില് കുളിക്കുന്നതിനിടെ ഒരാള് ഫോണില് ദൃശ്യങ്ങള് പകര്ത്തുന്നത് ശ്രദ്ധയില്പ്പെടുകയായിരുന്നു. യുവതിയുടെ നിലവിളി കേട്ട് ഓടിയെത്തിയ ബന്ധുക്കളും നാട്ടുകാരും ചേര്ന്ന് നവനീതിനെ കൈയോടെ പിടികൂടുകയും തുടര്ന്ന് ഫോണ് പരിശോധിച്ചപ്പോള് കുളിക്കുന്ന ദൃശ്യങ്ങള് കണ്ടെത്തി ഡിലീറ്റ് ചെയ്യുകയും ചെയ്തു. ഇതിനുശേഷമാണ് പ്രതിയെ പൊലീസിലേല്പ്പിച്ചതും പരാതി നല്കിയതും.
സംഭവത്തില് അതിക്രമിച്ച് കയറല്, അനുമതിയില്ലാതെ ദൃശ്യങ്ങള് പകര്ത്തല് എന്നീ വകുപ്പുകള് ചുമത്തി നവനീതിനെതിരെ കേസെടുത്ത പൊലീസ് അറസ്റ്റ് രേഖപ്പെടുത്തിയ ശേഷം പ്രതിയെ സ്റ്റേഷന് ജാമ്യത്തില് വിട്ടയച്ചു. പ്രതിയുടെ ഫോണില് ആ സമയത്ത് യുവതിയുടെ ദൃശ്യങ്ങള് ഉണ്ടായിരുന്നില്ലെന്ന് ചൂണ്ടിക്കാട്ടിയാണ് പൊലീസ് ഇയാളെ ജാമ്യത്തില് വിട്ടത്. പ്രതിയുടെ ഫോണ് ഫോറന്സിക് പരിശോധനയ്ക്ക് അയച്ചിട്ടുണ്ടെന്നും പരിശോധനാ റിപ്പോര്ട്ട് ലഭിക്കുന്ന മുറയ്ക്ക് ആവശ്യമെങ്കില് കൂടുതല് വകുപ്പുകള് ചുമത്തുമെന്നുമാണ് പൊലീസിന്റെ വിശദീകരണം.
അതേസമയം, പ്രതിക്കെതിരെ നിസ്സാര വകുപ്പുകള് മാത്രം ചുമത്തി പൊലീസ് സ്റ്റേഷന് ജാമ്യത്തില് വിട്ടയച്ചതിനെതിരെ യുവതിയും കുടുംബവും കടുത്ത പ്രതിഷേധത്തിലാണ്. നീതി നിഷേധിക്കുന്ന രീതിയിലാണ് പൊലീസ് പെരുമാറിയതെന്ന് ആരോപിച്ച യുവതി മുഖ്യമന്ത്രിക്കും ആഭ്യന്തര മന്ത്രിക്കും പരാതി നല്കിയിട്ടുണ്ട്. കേസ് അട്ടിമറിക്കാനും ഒത്തുതീര്പ്പാക്കാനും പാര്ട്ടി നേതൃത്വത്തിന്റെ ഇടപെടലുണ്ടായതായി ആക്ഷേപമുണ്ട്. പ്രതിയുടെ ഫോണ് സമഗ്രമായി പരിശോധിച്ചാല് കൂടുതല് വിവരങ്ങള് പുറത്തുവരുമെന്നും, ഇയാളുടെ ഫോണില് നിരവധി സ്ത്രീകളുടെ നഗ്നദൃശ്യങ്ങളും മോര്ഫ് ചെയ്ത ചിത്രങ്ങളും സൂക്ഷിച്ചിട്ടുണ്ടെന്നും പരാതിക്കാര് ആരോപിക്കുന്നു. പൊലീസിന്റെ ഒത്തുകളിക്കെതിരെ നിയമപോരാട്ടവുമായി മുന്നോട്ട് പോകാനാണ് യുവതിയുടെയും കുടുംബത്തിന്റെയും തീരുമാനം.
