കണ്ണൂർ:യുവജന-വിദ്യാർഥി നേതാക്കള്ക്കെതിരായ ആക്രമണങ്ങളില് ഉത്തരവാദികളായവരോട് പകരം ചോദിക്കുമെന്ന് മുഖ്യമന്ത്രി വി.ഡി.
സതീശൻ. ‘നിങ്ങളുടെ ചോരയില്നിന്നാണ് ഈ സർക്കാർ പിറന്നത്. അതൊന്നും മറക്കില്ല. ഓരോന്നിനും എണ്ണിയെണ്ണി പകരം ചോദിക്കും. ഒരു വിട്ടുവീഴ്ചയുമുണ്ടാകില്ല’ എന്നായിരുന്നു അദ്ദേഹത്തിന്റെ പ്രഖ്യാപനം. യൂത്ത് കോണ്ഗ്രസ് സംസ്ഥാന പ്രസിഡന്റ് ഒ.ജെ. ജനീഷ് നയിച്ച ജെൻ ഇന്ത്യാ മൂവ്മെന്റ് പദയാത്രയുടെ സംസ്ഥാനതല സമാപന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. കഴിഞ്ഞ സർക്കാരിന്റെ കാലത്ത് യുവജന-വിദ്യാർഥി നേതാക്കള് നേരിട്ട ആക്രമണങ്ങള് മറക്കില്ലെന്നും സതീശൻ പറഞ്ഞു.
അധികാരത്തിലെത്തിയാല് പഴയ സംഭവങ്ങള് മറക്കുന്ന പതിവ് തന്റെ സർക്കാരിനുണ്ടാകില്ലെന്നും മുഖ്യമന്ത്രി വ്യക്തമാക്കി. ആരെല്ലാമാണോ സംഭവങ്ങളില് ഉത്തരവാദികള്, അവരെല്ലാം നിയമനടപടി നേരിടേണ്ടിവരുമെന്നും അദ്ദേഹം പറഞ്ഞു. അതിന്റെ ഭാഗമായാണ് അന്വേഷണങ്ങളും പ്രത്യേക അന്വേഷണ സംഘങ്ങളുടെ (SIT) രൂപീകരണവുമെന്നാണ് സതീശന്റെ വിശദീകരണം. ഉത്തരവാദികള്ക്കെതിരെ നടപടിയുണ്ടാകുന്നതുവരെ പോരാട്ടം തുടരുമെന്നും അദ്ദേഹം കൂട്ടിച്ചേർത്തു
യൂത്ത് കോണ്ഗ്രസ് നേതാവ് ഒ.ജെ. ജനീഷ് അധ്യക്ഷത വഹിച്ച ചടങ്ങില് കെപിസിസി പ്രസിഡന്റ് സണ്ണി ജോസഫ്, യൂത്ത് കോണ്ഗ്രസ് ദേശീയ പ്രസിഡന്റ് ഉദയഭാനു ചിബ്, എംഎല്എമാരായ ടി.ഒ. മോഹനൻ, സജീവ് ജോസഫ്, അബിൻ വർക്കി തുടങ്ങിയവരും പങ്കെടുത്തു. കണ്ണൂരില് നടന്ന സമ്മേളനത്തില് കോണ്ഗ്രസ്, യൂത്ത് കോണ്ഗ്രസ് നേതാക്കളും പ്രവർത്തകരും സംബന്ധിച്ചു. മുൻകാല ആക്രമണങ്ങളുമായി ബന്ധപ്പെട്ട അന്വേഷണങ്ങളും ഉത്തരവാദികള്ക്കെതിരായ നടപടികളും സംബന്ധിച്ച മുഖ്യമന്ത്രിയുടെ പ്രഖ്യാപനം രാഷ്ട്രീയ ചർച്ചകള്ക്കും വഴിവെച്ചിരിക്കുകയാണ്.





