ദല്ഹി: പി.എം ശ്രീ പദ്ധതിയില് ഒപ്പുവയ്ക്കാന് മുഖ്യമന്ത്രി വി.ഡി. സതീശന് ഉപാധികളോടെ അനുമതി നല്കി രാഹുല് ഗാന്ധി.
കരിക്കുലം തീരുമാനിക്കേണ്ടതും, സ്കൂളുകള് തീരുമാനിക്കേണ്ടതും സംസ്ഥാന സര്ക്കാര് ആയിരിക്കണം എന്ന രണ്ട് ഉപാധികളാണ് രാഹുല് ഗാന്ധി മുന്നോട്ടുവച്ചിരിക്കുന്നത്. പത്ത് ജൻപഥില് രാഹുലും മുഖ്യമന്ത്രി സതീശനും തമ്മില് നടന്ന കൂടിക്കാഴ്ചയ്ക്കൊടുവിലാണ് തീരുമാനം.
കൂടിക്കാഴ്ചക്ക് ശേഷം മുഖ്യമന്ത്രി കേരളഹൗസിലേക്ക് മടങ്ങി. കൂടിക്കാഴ്ചയെക്കുറിച്ച് മാധ്യമപ്രവർത്തകരുടെ ചോദ്യത്തിന് മുഖ്യമന്ത്രി പ്രതികരിച്ചില്ല. പിഎം ശ്രീ നടപ്പാക്കണമെന്ന നിലപാട് കെപിസിസി രാഷ്ട്രീയ കാര്യ സമിതിയില് വി.ഡി. സതീശൻ വ്യക്തമാക്കിയിരുന്നു. കേന്ദ്രത്തില് നിന്ന് ഫണ്ട് ഉറപ്പാക്കണമെങ്കില് പിഎം ശ്രീ ഒപ്പിടണമെന്നാണ് മുഖ്യമന്ത്രിയുടെ ആവശ്യം. പിഎം ശ്രീ ഒപ്പിടുന്നതില് വ്യക്തത തേടി കേന്ദ്രവും കത്തയച്ചിരുന്നു. എന്നാല്, ഒരുവിഭാഗം കോണ്ഗ്രസ് നേതാക്കള് പിഎം ശ്രീ ഒപ്പിടുന്നതിനെ എതിർത്തിരുന്നു.
പ്രതിപക്ഷത്തായിരുന്നപ്പോള് ശക്തമായി എതിർത്ത പദ്ധതി, ഭരണത്തിലേറിയപ്പോള് നടപ്പാക്കുന്നത് ശരിയല്ലെന്നും പിഎം ശ്രീ വിദ്യാഭ്യാസ മേഖലയിലേക്ക് കടന്നുകയറാനുള്ള ആർഎസ്എസ് അജണ്ടയാണെന്നും പറയുന്നു. എന്നാല്, കോണ്ഗ്രസ് ഭരിക്കുന്ന കർണാടക, തെലങ്കാന, ഹിമാചല് പ്രദേശ് തുടങ്ങിയ സംസ്ഥാനങ്ങളില് പിഎം ശ്രീ നടപ്പാക്കിയിരുന്നു.
