മുംബൈ: മഹാരാഷ്ട്രയിലെ ധൂലെ ജില്ലയില്‍ ഗർഭിണിയായ യുവതിയെ ക്രൂരമായി മർദിച്ച് ബോധരഹിതയാക്കിയശേഷം മരിച്ചെന്ന് കരുതി കാറില്‍ കയറ്റി കൊണ്ടുപോയി പെട്രോളൊഴിച്ച്‌ കത്തിച്ച സംഭവത്തില്‍ നാല് പേർ അറസ്റ്റില്‍.
ധൂലെ-സോലാപുർ ഹൈവേയിലെ ഗാരതാഡ് ബാരി മേഖലയ്ക്ക് സമീപമാണ് പൂർണമായും കത്തിക്കരിഞ്ഞ നിലയില്‍ യുവതിയുടെ മൃതദേഹം കണ്ടെത്തിയത്.ജാംഖേഡിലെ ആർട്ട് സെന്‍ററില്‍ നടന്ന തർക്കമാണ് കൊലപാതകത്തിലേക്ക് നയിച്ചത്. ആർട്ട് സെന്‍ററില്‍ വെച്ചുണ്ടായ വ്യക്തിപരമായ തർക്കമാണ് കൊലപാതകത്തില്‍ കലാശിച്ചത്. പ്രതികള്‍ പിങ്കിയെ അതിക്രൂരമായി മർദിക്കുകയും, മർദനമേറ്റ് യുവതി ബോധരഹിതയായി വീഴുകയുമായിരുന്നു.
സംഭവത്തില്‍ 31കാരിയായ പിങ്കി ഹനുമന്ത് കട്കയാണ് കൊല്ലപ്പെട്ടത്. യുവതിയെ മർദിക്കുന്നതിനിടെ ബോധരഹിതയായതോടെ മരിച്ചെന്ന് പ്രതികള്‍ തെറ്റിദ്ധരിക്കുകയായിരുന്നു. തുടർന്ന് മൃതദേഹം ഒളിപ്പിക്കാനായി പ്രതികള്‍ ഗൂഢാലോചന നടത്തിയെന്നാണ് പൊലീസ് കണ്ടെത്തല്‍.
സംഭവത്തെക്കുറിച്ച്‌ അന്വേഷണം ആരംഭിച്ച പൊലീസ് 11 മണിക്കൂറിലധികം ദൈർഘ്യമുള്ള സി.സി.ടി.വി ദൃശ്യങ്ങള്‍ വിശദമായി പരിശോധിച്ചു. സാങ്കേതിക വിശകലനത്തിന്റെയും സി.സി.ടി.വി ദൃശ്യങ്ങളുടെയും സഹായത്തോടെ പ്രതികള്‍ സഞ്ചരിച്ച വാഹനം അഹല്യാനഗർ ജില്ലയിലെ ജാംഖേഡ് മേഖലയിലെ സപ്തസുർ കള്‍ച്ചറല്‍ ആർട്ട് സെന്ററിലേതാണെന്ന് കണ്ടെത്തുകയായിരുന്നു.
കള്‍ച്ചറല്‍ സെന്ററുമായി ബന്ധപ്പെട്ട ആഭ്യന്തര തർക്കങ്ങളാണ് ആക്രമണത്തിന് പിന്നിലെന്നാണ് പൊലീസ് പറയുന്നത്. ബീഡ് ജില്ലയ്ക്ക് സമീപത്തുവച്ചാണ് പിങ്കിയെ പ്രതികള്‍ ക്രൂരമായി മർദിച്ചത്. തുടർന്ന് യുവതി മരിച്ചെന്ന് കരുതി മൃതദേഹം കാറില്‍ കയറ്റി കൊണ്ടുപോകുകയായിരുന്നു.
ഏകദേശം 275 കിലോമീറ്റർ സഞ്ചരിച്ചശേഷം ധൂലെയിലെ വിജനമായ മലയോര മേഖലയിലെത്തിയ പ്രതികള്‍ യുവതിയുടെ ശരീരത്തില്‍ പെട്രോളൊഴിച്ച്‌ തീക്കൊളുത്തി. പിന്നീട് നടത്തിയ അന്വേഷണത്തിലാണ് സംഭവത്തിന്റെ ചുരുളഴിയുന്നത്.
കേസില്‍ നാല് പേരെ പൊലീസ് അറസ്റ്റ് ചെയ്തിട്ടുണ്ട്. കൃത്യത്തില്‍ പങ്കാളികളായ രണ്ട് പേർ ഒളിവിലാണെന്നും ഇവർക്കായി വിവിധയിടങ്ങളില്‍ തിരച്ചില്‍ തുടരുകയാണെന്നും പൊലീസ് അറിയിച്ചു.
