കൊച്ചി: യുവനടി ഉള്‍പ്പെട്ട കൊച്ചിയിലെ ഫ്ലാറ്റ് മർദ്ദന-ഹണിട്രാപ്പ് കേസിന് പിന്നാലെ ഉയർന്ന ബലാത്സംഗക്കേസില്‍ മുൻകൂർ ജാമ്യാപേക്ഷയുമായി ഡോക്ടർ ജോണ്‍സണ്‍ കെ.
വർഗ്ഗീസ് ഹൈക്കോടതിയില്‍. പരാതിക്കാരിയായ അൻപതുകാരി തന്റെ ദീർഘകാല രോഗിയും കുടുംബസുഹൃത്തുമാണെന്നും തനിക്കെതിരെയുള്ള പീഡന പരാതി പൂർണ്ണമായും കെട്ടിച്ചമച്ചതാണെന്നും ഡോക്ടർ ജാമ്യാപേക്ഷയില്‍ വാദിക്കുന്നു. പരാതിക്കാരിയുടെ ബന്ധുവായ യുവനടി തന്നെ ഫ്ലാറ്റില്‍ കെട്ടിയിട്ട് നഗ്നനാക്കി വീഡിയോ ചിത്രീകരിച്ചുവെന്നും മൂന്ന് കോടി രൂപ ആവശ്യപ്പെട്ട് ഭീഷണിപ്പെടുത്തിയതിന് ചാറ്റ് തെളിവുകളുണ്ടെന്നും മുൻകൂർ ജാമ്യഹർജിയില്‍ ചൂണ്ടിക്കാട്ടുന്നു. മർദ്ദനത്തിന് പോലീസില്‍ പരാതി നല്‍കിയതിലുള്ള വിരോധമാണ് ബലാത്സംഗക്കേസിന് പിന്നിലെന്നും ഡോക്ടർ ആരോപിക്കുന്നു.
അതേസമയം, ഒളിവില്‍പ്പോയ ഡോ. ജോണ്‍സണ്‍ വർഗ്ഗീസിനായി അന്വേഷണം ഇതര സംസ്ഥാനങ്ങളിലേക്കും പോലീസ് വ്യാപിപ്പിച്ചു. പ്രതി വിദേശത്തേക്ക് കടക്കാതിരിക്കാൻ ലുക്കൗട്ട് സർക്കുലർ പുറപ്പെടുവിച്ചിട്ടുണ്ട്. കേരളത്തിന് പുറത്ത് വിപുലമായ ബന്ധങ്ങളുള്ള ഇയാള്‍ മറ്റ് സംസ്ഥാനങ്ങളിലേക്ക് കടന്നതായാണ് പോലീസിന് ലഭിച്ച സൂചന. ഡോക്ടർക്കെതിരെ പെരുമാറ്റദൂഷ്യത്തിന് മുൻപ് സഹപ്രവർത്തകർ ആശുപത്രി അധികൃതർക്ക് നല്‍കിയ പരാതികളുടെ വിശദാംശങ്ങളും ഇൻഫോപാർക്ക് പോലീസ് ശേഖരിച്ചു. ഈ മാസം മൂന്നാം തീയതിയാണ് ഇയാള്‍ അവസാനമായി ആശുപത്രിയിലെത്തിയത്. ഡോക്ടറുടെ മൊബൈല്‍ ഫോണില്‍ നിന്ന് പന്ത്രണ്ടോളം സ്ത്രീകളുടെ സ്വകാര്യ ദൃശ്യങ്ങള്‍ പോലീസ് കണ്ടെത്തിയിരുന്നു. കൂടുതല്‍ പേർ പരാതിയുമായി മുന്നോട്ടുവന്നാല്‍ പുതിയ കേസുകള്‍ രജിസ്റ്റർ ചെയ്യുമെന്ന നിലപാടിലാണ് പോലീസ്.
ഡോക്ടറെ ഫ്ലാറ്റിലേക്ക് വിളിച്ചുവരുത്തി മർദ്ദിച്ച കേസില്‍ യുവനടിയും സുഹൃത്തുക്കളും ഉള്‍പ്പെടെ മൂന്നുപേർ അറസ്റ്റിലായതോടെയാണ് സംഭവവികാസങ്ങളുടെ തുടക്കം. ഇതിന് പിന്നാലെയാണ് നടിയുടെ ബന്ധുവായ സ്ത്രീ ഡോക്ടർക്കെതിരെ പീഡന പരാതി നല്‍കിയത്. തന്റെ ബന്ധുവിന് നേരെ ഡോക്ടർ നടത്തിയ ലൈംഗിക അതിക്രമത്തിലുള്ള വൈരാഗ്യമാണ് ഫ്ലാറ്റിലെ മർദ്ദനത്തിന് കാരണമെന്നായിരുന്നു നടി പോലീസിന് നല്‍കിയ മൊഴി. തുടർന്ന് നടി ഉള്‍പ്പെടെയുള്ളവരുടെ ജാമ്യാപേക്ഷ ജുഡീഷ്യല്‍ ഒന്നാം ക്ലാസ് മജിസ്‌ട്രേറ്റ് കോടതി തള്ളിയിരുന്നു. പീഡനക്കേസ് രജിസ്റ്റർ ചെയ്തതോടെ ഒളിവില്‍പോയ ഡോക്ടർക്കായി പോലീസ് വലവിരിച്ചിരിക്കുകയാണ്.
