കോട്ടയം : ലഹരി ഉപയോഗം പൊലീസിനെ അറിയിച്ചെന്ന സംശയത്തില്‍ യുവാവിന് ക്രൂരമര്‍ദ്ദനം. കോട്ടയം കാഞ്ഞിരപ്പള്ളി പാറത്തോട്ടിലാണ് സംഭവം. പാറത്തോട്ടിലെ ഒരു തട്ടുകടയില്‍ ഭക്ഷണം കഴിക്കാനെത്തിയപ്പോഴാണ് യുവാവിന് നേരെ ആക്രമണമുണ്ടായത്. യുവാവിന്റെ സഹോദരിയുടെയും ചെറിയ കുട്ടിയുടെയും മുന്നിലിട്ടാണ് പ്രതികള്‍ മർദ്ദിച്ചത്.
മദ്യപിച്ചെത്തിയ പാറത്തോട് പാലമ്പ്ര സ്വദേശികളായ മൂന്ന് യുവാക്കളാണ് ആക്രമണത്തിന് പിന്നില്‍. ഇവരിലൊരാളെ കഴിഞ്ഞ ദിവസം കഞ്ചാവ് കൈവശം വെച്ചതിന് പൊലീസ് പിടികൂടിയിരുന്നു. ഈ വിവരമറിഞ്ഞാണ് സംഘം യുവാവിനെ ആക്രമിക്കാനെത്തിയത്.
ഇക്കഴിഞ്ഞ തിങ്കളാഴ്ച രാത്രിയിലാണ് സംഭവം നടന്നത്. തുടർന്ന് ബുധനാഴ്ചയാണ് അക്രമത്തിന്റെ ദൃശ്യങ്ങള്‍ പുറത്തുവന്നത്. ആക്രമണത്തിനിടയില്‍ പ്രതികള്‍ തട്ടുകടയിലെ ഉപകരണങ്ങളും സാധനങ്ങളും അടിച്ചു തകര്‍ക്കുകയും ചെയ്തു. സംഭവത്തില്‍ പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്.
