ഡല്ഹി: യെല്ലോ ഫീവർ അഥവാ മഞ്ഞപ്പനി ഉള്ള രാജ്യങ്ങളില് നിന്ന് ഇന്ത്യയിലെത്തുന്ന യാത്രക്കാർക്ക് കർശന നിർദേശങ്ങള്.
മഞ്ഞപ്പനി വ്യാപകമായുള്ള കെനിയ, നൈജീരിയ, വെനസ്വേല പോലുള്ള രാജ്യങ്ങളില് നിന്നുള്ള യാത്രക്കാർ വാക്സിനേഷൻ ചെയ്തതിന്റെ രേഖ കയ്യില് സൂക്ഷിക്കേണ്ടതുണ്ട്. അല്ലാത്തപക്ഷം ആറ് ദിവസം സ്വന്തം ചെലവില് ക്വാറന്റൈനില് ഇരിക്കേണ്ടിവരും. ക്വാറന്റൈൻ സൗകര്യം ഒരുക്കിയ സ്ഥലത്തേക്കുള്ള ഗതാഗത ചെലവ് അതാത് എയർലൈൻസുകള് വഹിക്കേണ്ടിവരും.
നിലവില് നിയമപ്രകാരം ഒൻപത് ദിവസം വരെയാണ് ക്വാറന്റൈൻ കാലാവധി. അതാണിപ്പോള് ആറ് ദിവസമായി മാറ്റിയിരിക്കുന്നത്. മഞ്ഞപ്പനി ബാധിത രാജ്യത്ത് നിന്ന് പുറപ്പെട്ട ദിവസമുള്പ്പെടെയാണ് ആറായി നിജപ്പെടുത്തിയിരിക്കുന്നത്. ക്വാറന്റൈനില് ഇരിക്കുവാൻ വിസമ്മതിക്കുന്ന യാത്രക്കാരെ വിമാനത്താവളത്തില് നിന്ന് തിരികെ അയക്കും.
നിലവിലുള്ള നിയമങ്ങളില് പ്രധാന മാറ്റങ്ങളാണ് ഇപ്പോള് ഇന്ത്യൻ എയർക്രാഫ്റ്റിന്റെ 2026ലെ നിയമങ്ങളില് വരുത്തിയിരിക്കുന്നത്. 1956ലെ ചട്ടങ്ങള്ക്ക് പകരമായാണ് ഇന്ത്യൻ എയർക്രാഫ്റ്റിന്റെ 2026ലെ നിയമങ്ങള് പ്രാബല്യത്തില് വരുന്നത്. പുതിയ ചട്ടങ്ങള് പ്രകാരം വിമാനത്താവളങ്ങളിലെ പൊതുജനാരോഗ്യ സംവിധാനങ്ങള് വിപുലീകരിക്കും. പ്രത്യേക രോഗങ്ങള് പടരുന്നത് തടയിടുന്നത് കൂടാതെ വലിയ പാൻഡെമിക്കുകളും എമർജൻസി സാഹചര്യങ്ങളും ബയോ-കെമിക്കല് -റേഡിയോ-ന്യൂക്ലിയർ ദുരന്തങ്ങള് എന്നിവ തടയാൻ പാകത്തിലുള്ള സംവിധാനങ്ങളിലേക്ക് വിപുലീകരിക്കും.
വിമാനത്താവളങ്ങളിലെ ഭക്ഷണശാലകളിലെയും വിമാനങ്ങള്ക്കുള്ളില് വിതരണം ചെയ്യുന്ന ഭക്ഷണങ്ങള്ക്കും ഭക്ഷ്യസുരക്ഷാ നിർദേശങ്ങള് നല്കി. Food Safety and Standards Act 2006 പ്രകാരം ലൈസൻസ് നിർബന്ധമാക്കും. അതുപോലെ ഈ ഭക്ഷണശാലകളിലെ കുടിവെള്ളത്തിന്റെ ഗുണനിലവാരവും പരിശോധിക്കും. മറ്റൊരു പ്രധാന മാറ്റം വിമാനങ്ങള്ക്കുള്ളില് അണുനശീകരണം പ്രയോഗിക്കുമെന്നതാണ്.1954ലെ ചട്ടപ്രകാരം പ്രത്യേക സാഹചര്യങ്ങളില് മാത്രമാണ് ഇവ നിർബന്ധമാക്കിയിരുന്നത്. കൊതുകുകള് പോലുള്ള രോഗം പടർത്താൻ കെല്പ്പുള്ള ജീവികളെ നശിപ്പിക്കുന്നതിനായി കീടനാശിനി പ്രയോഗം നിർബന്ധമാക്കും. വിമാനത്താവളങ്ങള് അവയുടെ അതിർത്തിയില് നിന്ന് ചുരുങ്ങിയത് 400 മീറ്റർ അകലത്തില് എലി, കൊതുക് തുടങ്ങിയ രോഗവാഹക ജീവികളില് നിന്ന് മുക്തമായിരിക്കണം.
ഇനിമുതല് യാത്രക്കാരുടെ ആരോഗ്യസംബന്ധിയായ വിവരങ്ങള് വിമാനകമ്പനികള് ആരോഗ്യ വകുപ്പിലെ ഉദ്യോഗസ്ഥർക്ക് കൈമാറണം എന്നാണ് പുതിയചട്ടം. പകർച്ചവ്യാധികള് പോലുള്ളവയുടെ പടർച്ച തടയാനും വേണ്ടുന്ന നടപടികള് സ്വീകരിക്കുവാനും അധികൃതർക്ക് കഴിയും. പുതിയ നിയമങ്ങളിലെ ലംഘനങ്ങള്ക്ക് പിഴ നിർദേശിച്ചിട്ടുണ്ട്. എയർപോർട്ട് ഹെല്ത്ത് ഓഫീസറുടെ ഉത്തരവുകള്ക്ക് എതിരായി അപ്പീല് നല്കണമെങ്കില് അവസരവും നല്കിയിട്ടുണ്ട്. 1954ലെ ചട്ടങ്ങള്ക്ക് പകരം വരൻ പോകുന്ന നിയമങ്ങളുടെ കരടിലെ വിവരങ്ങള് മാത്രമാണിത്. കൂടുതല് പരിശോധനകള്ക്ക് ശേഷം കേന്ദ്ര ആരോഗ്യ മന്ത്രാലയം തുടർ നടപടികള്ക്കായി വ്യോമയാന മന്ത്രാലയത്തിന് കൈമാറും.






