ചെന്നൈ: ഏഷ്യൻ ഗെയിംസിലെ മിന്നുന്ന പ്രകടനത്തിന് ശേഷം വെസ്റ്റ് ഇൻഡീസിനെതിരായ ടി20 പരമ്പരയ്‌ക്കൊരുങ്ങുന്ന ഇന്ത്യൻ ടീമിന്‍റെ ബാറ്റിംഗ് ഓർഡറിനെക്കുറിച്ച്‌ സുപ്രധാന നിരീക്ഷണവുമായി മുൻ ഇന്ത്യൻ താരം ദിനേശ് കാർത്തിക്.
അഭിഷേക് ശർമ്മ, വൈഭവ് സൂര്യവംശി, സഞ്ജു സാംസണ്‍ എന്നിവരടങ്ങുന്ന ടോപ്പ് ഓർഡർ കൂട്ടുകെട്ട് വിൻഡീസിനെതിരായ പരമ്പരയില്‍ തുടരാൻ സാധ്യതയില്ലെന്ന് കാർത്തിക് വ്യക്തമാക്കി.
ഏഷ്യൻ ഗെയിംസില്‍ ജപ്പാനിലെ സ്പിൻ പിച്ചുകളില്‍ ഒരു പേസറെ മാത്രം ഉള്‍പ്പെടുത്തിയാണ് ഇന്ത്യ കളിച്ചത്. അതിനാല്‍ അഭിഷേകും വൈഭവും ഓപ്പണ്‍ ചെയ്യുകയും സഞ്ജു സാംസണ്‍ മൂന്നാം നമ്പറിലിറങ്ങുകയും ചെയ്തിരുന്നു.
എന്നാല്‍ വെസ്റ്റ് ഇൻഡീസിനെതിരായ പരമ്പരയില്‍ ടീം കോമ്പിനേഷനില്‍ മാറ്റം വരുത്തേണ്ടി വരുമെന്ന് ക്രിക്ബസിനോട് സംസാരിക്കവെ കാർത്തിക് ചൂണ്ടിക്കാട്ടി.
'ആ ബാറ്റിംഗ് ക്രമം ഇനി ഉറപ്പായും കാണാൻ കഴിയില്ല. കാരണം ഇന്ത്യയില്‍ കളിക്കുമ്പോള്‍ നിങ്ങള്‍ക്ക് കൂടുതല്‍ പേസർമാരെ ടീമില്‍ ഉള്‍പ്പെടുത്തേണ്ടി വരും. ജപ്പാനില്‍ ഒരു പേസറെ വെച്ചാണ് നമ്മള്‍ കളിച്ചത്.
ഇവിടെ രണ്ടോ മൂന്നോ പേസർമാർ വേണം. അതുകൊണ്ടുതന്നെ അതേ ബാറ്റിംഗ് നിരയെ തുടരാനാവില്ല. ജസ്പ്രീത് ബുംറയ്ക്ക് വിശ്രമം അനുവദിച്ചിരിക്കുകയാണ്. ന്യൂസിലൻഡ് പര്യടനത്തിന് മുന്നോടിയായി താരത്തിന് ഇത് ആശ്വാസമാകും. ഇന്ത്യൻ ടീം ഇപ്പോള്‍ ടെസ്റ്റ് ക്രിക്കറ്റിനാണ് കൂടുതല്‍ പ്രാധാന്യം നല്‍കുന്നത്.
അടുത്ത ലോകകപ്പിലേക്ക് ഇനിയും ഒരുപാട് സമയമുള്ളതിനാല്‍ ടി20 ഇപ്പോള്‍ അവരുടെ പ്രധാന മുൻഗണനയല്ല-' ദിനേശ് കാർത്തിക് പറഞ്ഞു.
