കോട്ടയം: മോട്ടോർ വാഹന വകുപ്പിന്റെയും പരിവാഹൻ വെബ്സൈറ്റിന്റെയും സേവനങ്ങള്‍ തുടർച്ചയായി തടസപ്പെട്ടതോടെ കടുത്ത പ്രതിസന്ധിയെ നേരിടുകയാണ് സെക്കൻഡ് ഹാൻഡ് വാഹന വ്യാപാര മേഖല.
വെബ്സൈറ്റ്പുതുക്കുന്നതുമായി ബന്ധപ്പെട്ട സാങ്കേതിക തകരാറുകളാണ് സേവനങ്ങള്‍ തടസപ്പെടാൻ കാരണമെന്നാണ് അധികൃതരുടെ വിശദീകരണം.
എന്നാല്‍ പ്രശ്നങ്ങള്‍ എപ്പോള്‍ പരിഹരിക്കുമെന്നതില്‍ വ്യക്തതയില്ല. ഇതോടെ വാഹന ഉടമകളും വ്യാപാരികളും ഒരുപോലെ ദുരിതത്തിലായി. ഹൈപ്പോത്തിക്കേഷൻ നീക്കം ചെയ്യുന്നതിനുള്ള (എച്ച്‌.പി. ക്യാൻസലേഷൻ) നടപടികള്‍ക്ക് വാഹനം രജിസ്റ്റർ ചെയ്ത അതേ ആർ.ടി.ഒ ഓഫീസിനെ ആശ്രയിക്കേണ്ടിവരുന്നത് അധിക യാത്രാചെലവിനും സമയനഷ്ടത്തിനും കാരണമാകും. പൊലീസ്, ആർ.ടി.ഒ പിഴകള്‍ ഓണ്‍ലൈനായി അടയ്ക്കുന്നതിനുള്ള സേവനങ്ങളും തടസപ്പെട്ടതോടെ നേരിട്ട് ഓഫീസുകളിലെത്തി പിഴയടയ്ക്കേണ്ട സാഹചര്യമാണ്.
പിഴ അടച്ചിട്ടും ചില വാഹനങ്ങള്‍ ബ്ലാക്ക് ലിസ്റ്റില്‍ നിന്ന് ഒഴിവാക്കാത്തത് പ്രതിസന്ധി കൂടുതല്‍ സങ്കീർണ്ണമാക്കുകയാണ്.
കേന്ദ്ര സർക്കാർ നടപ്പാക്കിയ ഡീലർ ഓതറൈസേഷൻ സർട്ടിഫിക്കറ്റ് നേടിയ അംഗീകൃത വ്യാപാരികള്‍ക്കും ആവശ്യമായ സേവനങ്ങള്‍ ലഭിക്കുന്നില്ല. രജിസ്ട്രേഷൻ സമയത്തെ പിഴവുകള്‍ തിരുത്തുന്നതിനുള്ള കാര്യക്ഷമമായ സംവിധാനമില്ലാത്തതും പ്രതിസന്ധി രൂക്ഷമാക്കുകയാണെന്ന് കേരള സ്റ്റേറ്റ് യൂസ്ഡ് വെഹിക്കിള്‍സ് ഡീലേഴ്സ് ആൻഡ് ബ്രോക്കേഴ്സ് അസോസിയേഷൻ ജില്ലാ പ്രസിഡന്റ് കെ.വി ഷിബു കടവുപുഴ, ജില്ലാ സെക്രട്ടറി സോണി വലിയകാപ്പില്‍, ട്രഷറർ മാത്യു വർഗീസ്, ജോയിന്റ് സെക്രട്ടറി എം.കെ ഹബീസ്, ജില്ലാ ചെയർമാൻ ബിജോയ് വാക്കാട് എന്നിവർ ചൂണ്ടിക്കാട്ടുന്നു.
