പത്തനംതിട്ട: അടൂർ പൊലീസ് സ്റ്റേഷൻ അതിക്രമ കേസില്‍ പ്രതികളും കുറ്റപത്രവും ഉടൻ ഉണ്ടാകും.
ഫെന്നി നൈനാൻ ഉള്‍പ്പെടെയുള്ളവർ കേസില്‍ പ്രതിയാകും.
ശ്രീനാദേവി കുഞ്ഞമ്മയെയും കേസില്‍ പ്രതിചേർത്തേക്കും. കണ്ടാലറിയാവുന്ന പ്രതികളെ പൊലീസ് തിരിച്ചറിഞ്ഞു തുടങ്ങിയിട്ടുണ്ട്.
യൂട്യൂബർ രാജൻ ജോസഫ് അറസ്റ്റിലായ ദിവസത്തെ സിസിടിവി ദൃശ്യങ്ങള്‍ ചർച്ചയായതോടെയാണ് പൊലീസ് നടപടികള്‍ വേഗത്തിലാക്കിയത്. മൂന്നുമാസം മുൻപെടുത്ത എഫ്.ഐ.ആറില്‍ ഇതുവരെ തുടർനടപടികള്‍ എടുത്തിരുന്നില്ല.
സംഭവത്തെക്കുറിച്ച്‌ ഡിജിപി, പത്തനംതിട്ട എസ്പിയോട് വിശദീകരണം തേടിയിരുന്നു.
അതേസമയം, സ്റ്റേഷനുള്ളില്‍ കയറി ശ്രീനാദേവി പ്രതിയെ കണ്ട സംഭവത്തില്‍ തങ്ങള്‍ക്ക് വീഴ്ച പറ്റിയിട്ടില്ലെന്നാണ് പൊലീസുകാരുടെ വിശദീകരണം.
പുറത്തെ പ്രതിഷേധം തണുപ്പിക്കാനാണ് പരാതിക്കാരിക്ക് പ്രതിയെ കാണാൻ അവസരം നല്‍കിയതെന്നും, വനിതാ പൊലീസ് ഇല്ലാത്ത സമയത്ത് മറ്റ് പോംവഴികള്‍ ഇല്ലായിരുന്നുവെന്നും അന്ന് ഡ്യൂട്ടിയിലുണ്ടായിരുന്ന ഉദ്യോഗസ്ഥർ എസ്.പിക്ക് വിശദീകരണം നല്‍കി.
