കൊച്ചി: പ്രമേഹവും അനുബന്ധ ആരോഗ്യപ്രശ്നങ്ങളും നിയന്ത്രിക്കുകയെന്ന ലക്ഷ്യത്തോടെ ലോക ഡയബറ്റീസ് ദിനത്തോടനുബന്ധിച്ച് വി.പി.എസ് ലേക്‌ഷോര്‍ ആശുപത്രിയുടെ നേതൃത്വത്തിൽ സംഘടിപ്പിക്കുന്ന വാക്കത്തോൺ ‘ബ്ലൂ സ്റ്റെപ്പ്സ്’ ശനിയാഴ്ച രാവിലെ ആറിന് ആരംഭിക്കും.
മരട് നഗരസഭ ചെയർപേഴ്സൺ അജിത നന്ദകുമാർ, സിനിമ താരം കൈലാഷ്, പനങ്ങാട് എസ്.ഐ അനന്ദു രമേഷ് എന്നിവർ ചേർന്ന് ഫ്ലാഗ് ഓഫ് ചെയ്യും. ആശുപത്രി പരിസരത്ത് നിന്ന് ആരംഭിക്കുന്ന വാക്കത്തോൺ പനങ്ങാട്, കുമ്പളം വഴി സഞ്ചരിച്ച് തിരികെ വി.പി.എസ് ലേക്‌ഷോറിലെത്തി സമാപിക്കും. സുംബ ഡാൻസ് ഉൾപ്പെടെ വിപുലമായ പരിപാടികളും വാക്കത്തോണിനോടനുബന്ധിച്ച് ഒരുക്കിയിട്ടുണ്ട്. റിസേർച്ച് സൊസൈറ്റി ഫോർ ദ സ്റ്റഡി ഓഫ് ഡയബറ്റീസ് ഇന്ത്യ(ആർ.എസ്.എസ്.ഡി.ഐ) കേരള ഘടകത്തിന്‍റെ സഹകരണത്തോടെ സംഘടിപ്പിക്കുന്ന വാക്കത്തോണിൽ വാക്കാറു ആണ് വാക്കിംഗ് പാർടണർ.
പ്രമേഹ നിയന്ത്രണത്തിന് കൂട്ടായ പ്രവർത്തനങ്ങൾ അനിവാര്യമാണെന്ന സന്ദേശം പ്രചരിപ്പിക്കുകയാണ് വാക്കത്തോണിലൂടെയും അനുബന്ധ സേവന പ്രവർത്തനങ്ങളിലൂടെയും ആശുപത്രി ലക്ഷ്യമിടുന്നത്. ചിട്ടയായ വ്യായാമം, സമീകൃതാഹാരം, മുൻകൂട്ടിയുള്ള രോഗനിർണയം, കൃത്യമായ ഇടവേളകളിലെ ആരോഗ്യപരിശോധനകൾ, ജീവിതശൈലിയിലെ മാറ്റങ്ങൾ തുടങ്ങിയവയിലൂടെ പ്രമേഹം തടയാനും അതുമായി ബന്ധപ്പെട്ട സങ്കീർണതകൾ കുറയ്ക്കാനും കഴിയും.
ഈ ആശയം കൂടുതൽ ആളുകളിലേക്ക് എത്തിക്കാനുള്ള പരിശ്രമത്തിലാണ് തങ്ങളെന്നും സംഘാടകർ കൂട്ടിച്ചേർത്തു. വി.പി.എസ് ലേക്‌ഷോര്‍ മാനേജിംഗ് ഡയറക്ടർ എസ്.കെ. അബ്ദുള്ള, ഗ്രൂപ്പ് സി.ഇ.ഒ അഭിഷേക് പൊഡുരി, ഗ്രൂപ്പ് സി.ഒ.ഒ ല‍ക്ഷ്മൺ സേതുരാമൻ, സി.ഇ.ഓ ജയേഷ് വി.നായർ തുടങ്ങിയവർ പങ്കെടുക്കും.
400ഓളം ആളുകൾ പങ്കെടുക്കുന്ന വാക്കത്തോണിന്‍റെ രജിസ്ട്രേഷൻ ഇതിനോടകം പൂർത്തിയായിട്ടുണ്ട്. ഡോക്ടർമാർ, നഴ്സുമാർ, മറ്റ് ആരോഗ്യപ്രവർത്തകർ, ഉദ്യോഗസ്ഥർ, ജനപ്രതിനിധികൾ തുടങ്ങി സമൂഹത്തിന്‍റെ വിവിധ കോണുകളിൽ നിന്നുള്ള നിരവധിയാളുകൾ പങ്കെടുക്കും. രജിസ്ട്രേഷനുമായി ബന്ധപ്പെട്ട് മികച്ച പ്രതികരണമാണ് പൊതുജനങ്ങളിൽ നിന്ന് ഉണ്ടായിരിക്കുന്നതെന്നും അവർ അറിയിച്ചു.
സൗജന്യ പ്രമേഹ പരിശോധനയും ബോധവ്തകരണവും
പ്രമേഹം മുൻകൂട്ടി തിരിച്ചറിഞ്ഞ് സങ്കീർണതകളൊഴിവാക്കുകയെന്ന ലക്ഷ്യത്തോടെ ലോക ഡയബറ്റീസ് ദിനത്തോടനുബന്ധിച്ച് വി.പി.എസ് ലേക്‌ഷോര്‍ ആശുപത്രിയുടെ നേതൃത്വത്തിൽ സൗജന്യ പ്രമേഹ പരിശോധനയും ബോധവത്കരണ പരിപാടികളും നടക്കും.
ശനിയാഴ്ച ആശുപത്രിയിലെത്തുന്നവർക്ക് സൗജന്യ പരിശോധന നടത്താനാകും. കൂടാതെ രാവിലെ 11ന് ആശുപത്രിയിൽ പ്രത്യേക ബോധവത്കരണ പരിപാടിയും നടക്കും. ആലുവ, ഇടപ്പള്ളി, ജെ.എൽ.എൻ സ്റ്റേഡിയം, കലൂർ, സൗത്ത്, വൈറ്റില എന്നീ മെട്രോ എന്നീ സ്റ്റേഷനുകളിൽ സൗജന്യ പരിശോധന സൗകര്യവും ഒരുക്കിയിട്ടുണ്ട്.
99 രൂപയ്ക്ക് പ്രത്യേക പരിശോധന പാക്കേജ് അവതരിപ്പിച്ച് വി.പി.എസ് ലേക്‌ഷോര്‍
ലോക പ്രമേഹ ദിനത്തോടനുബന്ധിച്ച് വി.പി.എസ് ലേക്‌ഷോര്‍ ആശുപത്രിയിൽ പ്രത്യേക ഡയബറ്റീസ് പരിശോധന പാക്കേജ് അവതരിപ്പിച്ചു. ലിപിഡ് പ്രൊഫൈൽ, എച്ച്ബിഎ1സി തുടങ്ങിയവ ഉൾപ്പെടുത്തി 2500 രൂപ നിരക്ക് വരുന്ന പരിശോധനകളാണ് ഇളവുകളോെട 99 രൂപയ്ക്ക് അവതരിപ്പിച്ചിരിക്കുന്നത്. നവംബർ 30 വരെ ആശുപത്രിയിലെത്തി ഈ സേവനം പ്രയോജനപ്പെടുത്താനാകും.
