കോട്ടയം: പൂജാ അവധി പ്രമാണിച്ചു സംസ്ഥാന സര്ക്കാര് തിങ്കളാഴ്ചകൂടി പൊതുഅവധി പ്രഖ്യാപിച്ചതോടെ നാലു ദിവസത്തേക്ക് അവധിയായി.
ഇതോടെ അവധി ആഘോഷത്തിന്റെ ത്രില്ലിലാണ് എല്ലവരും. വിനോദ സഞ്ചാരകേന്ദ്രങ്ങളിലേക്കുള്ള യാത്രാ പ്ലാനിംഗിലാണ് പലരും. കുമരകം, വാഗമണ്, ഇല്ലിക്കല്കല്ല് ഉള്പ്പടെയുള്ള വിനോദ സഞ്ചാര കേന്ദ്രങ്ങളില് ഇന്നുമുതല് തിരക്ക് വര്ധിക്കും.
കുമരകവും വേമ്പനാട്ടു കായലോരങ്ങളും സഞ്ചാരികളാല് നിറഞ്ഞിരിക്കുകയാണ്. ഹൗസ്ബോട്ടുകള്, റിസോര്ട്ടുകള്, ഹോംസ്റ്റേകള് എന്നിവിടങ്ങളെല്ലാം ബുക്കിംഗ് തിരക്കിലാണ്. ഓണം കഴിഞ്ഞതോടെ ആരംഭിച്ച ടൂറിസം സീസണ് പൂജാ അവധിയോടെ പീക്കിലേക്ക് കടന്നതോടെ സഞ്ചാരികളുടെ എണ്ണവും കൂടി.
ഒക്ടോബര് മുതല് മാര്ച്ച്‌ വരെയാണ് ഹൗസ്ബോട്ട് സഞ്ചാര സീസണിലെ ഏറ്റവും മികച്ച സമയം. മഴ മാറി കായല് നിറഞ്ഞ് പച്ചപ്പ് നിലനില്ക്കുന്ന കാലം. കുമരകത്തെ ഹൗസ്ബോട്ടുകള്ക്കു കഴിഞ്ഞ ആഴ്ച മുതല്തന്നെ തിരക്ക് വര്ധിച്ചിരുന്നു. കുടുംബങ്ങളായും സുഹൃത്തുക്കളുടെ ഗ്രൂപ്പുകളായുമാണ് ആളുകള് എത്തുന്നത്. അവധി പ്രഖ്യാപിച്ചപ്പോള് മുതല് അന്വേഷണങ്ങള് വര്ധിക്കുകയും ബുക്കിംഗുകള് കൂടുകയും ചെയ്തിട്ടുണ്ട്.
കഥകളി, കുട്ടനാടന് വിഭവങ്ങള്, ഗ്രാമീണ ജീവിതാനുഭവങ്ങള്, പക്ഷിനിരീക്ഷണം എന്നിവ ഉള്പ്പെടുത്തിയുള്ള പാക്കേജുകളാണ് റിസോര്ട്ടുകള് ഒരുക്കുന്നത്. കുമരകം പക്ഷിസങ്കേതം, കായല് യാത്ര, ഫിഷിംഗ്, കയര് പിരിക്കല് കാഴ്ചകള് എന്നിവയും സഞ്ചാരികളെ ആകര്ഷിക്കുന്നു. ശിക്കാര ബോട്ട് സര്വീസുകള്ക്കും വലിയ ഡിമാന്ഡുണ്ട്.
വാഗമണ്ണിലേക്ക് സഞ്ചാരികള്‍ ഒഴുകും
ജില്ലയില് ഏറെ തിരക്കുള്ള വിനോദസഞ്ചാര കേന്ദ്രമാണ് വാഗമണ്. ഇവിടത്തെ റിസോര്ട്ടുകളിലെല്ലാം ബുക്കിംഗ് പൂര്ത്തിയായി. വാഗമണ് - ഇലവീഴാപൂഞ്ചിറ - ഇല്ലിക്കല്ക്കല്ല് സര്ക്യൂട്ടിലും തിരക്ക് വര്ധിച്ചു. മൂടല്മഞ്ഞും തണുപ്പും ആസ്വദിക്കാന് എത്തുന്നവരുടെ എണ്ണവും ഇരട്ടിയാകും. ഈരാറ്റുപേട്ട - വാഗമണ് റൂട്ട് ബൈക്ക് യാത്രികരുടെയും ജീപ്പ് സഫാരി സംഘങ്ങളുടെയും ഇഷ്ട കേന്ദ്രമാണ്. റോഡുകള് നല്ല നിലയിലായതോടെ ഈ ദിവസങ്ങളില് യാത്രക്കാര് വര്ധിക്കും. ഇവിടങ്ങളിലെല്ലാം ജില്ലാ ടൂറിസം പ്രമോഷന് കൗണ്സില് (ഡിടിപിസി) പ്രത്യേക ശുചീകരണവും സുരക്ഷാ ക്രമീകരണങ്ങളും ഒരുക്കിയിട്ടുണ്ട്. പോലീസിന്റെ സാന്നിധ്യവും പ്രധാന കേന്ദ്രങ്ങളില് ഉണ്ടാകും.
കുളിര്ക്കാഴ്ചകള് സമ്മാനിച്ച്‌ പാലാക്കരി ബോട്ട് യാത്ര
ജലഗതാഗത വകുപ്പിന്റെ നേതൃത്വത്തില് വൈക്കം ബോട്ട് ജെട്ടിയില്നിന്ന് പാലാക്കരി അക്വാ ടൂറിസം സെന്ററിലേക്ക് ആദിത്യ 3 സോളാര് ബോട്ടിലെ യാത്ര ഏവര്ക്കും സമ്മാനിക്കുന്നതു കുളിര്കാഴ്ചകളാണ്. ബോട്ടില് 75 പേര്ക്കു യാത്ര ചെയ്യാം. വൈക്കം ബോട്ട് ജെട്ടിയില് നിന്ന് രാവിലെ 11ന് ആരംഭിക്കുന്ന രീതിയിലാണ് സര്വീസ് ക്രമീകരിച്ചിരിക്കുന്നത്. മനോഹരമായ കായല് കാഴ്ചകള്, സൂര്യാസ്തമയം, നാടന് വിഭവങ്ങള് ഉള്പ്പെടെയുള്ള ഭക്ഷണം എന്നിവ യാത്രക്കാര്ക്ക് ആസ്വദിക്കാം. എല്ലാ അവധി ദിവസങ്ങളിലുമാണ് സര്വീസ് നടത്തുന്നത്. അടുത്ത നാല് അവധി ദിനങ്ങളിലേക്കു ബുക്കിംഗ് ആരംഭിച്ചു കഴിഞ്ഞു. ബുക്കിംഗിന്: 9400050357.
