തൃശൂർ: തമിഴ്നാട് മുഖ്യമന്ത്രി വിജയ് ഇന്ന് തൃശൂരിലെത്തും. കല്യാണ്‍ ജ്വല്ലേഴ്‌സിൻ്റെ നേതൃത്വത്തില്‍ സംഘടിപ്പിക്കുന്ന വിപുലമായ നവരാത്രി ആഘോഷങ്ങളില്‍ പങ്കെടുക്കാനാണ് അദ്ദേഹം എത്തുന്നത്.
ഉച്ചയ്ക്ക് രണ്ട് മണിക്ക് കോയമ്പത്തൂരില്‍ നടക്കുന്ന പൊതുപരിപാടിക്ക് ശേഷമാകും അദ്ദേഹം കേരളത്തിലേക്ക് തിരിക്കുക.
വൈകിട്ടോടെ ഹെലികോപ്റ്റർ മാർഗം തൃശൂർ പുഴയ്ക്കല്‍ ശോഭാ സിറ്റിയിലെ ഹെലിപാഡില്‍ അദ്ദേഹം വന്നിറങ്ങും. തുടർന്ന് കല്യാണ്‍ ജ്വല്ലേഴ്‌സ് ചെയർമാൻ ആൻഡ് മാനേജിങ് ഡയറക്ടർ ടിഎസ് കല്യാണരാമൻ്റെ വസതിയില്‍ ഒരുക്കിയിട്ടുള്ള ആഘോഷച്ചടങ്ങുകളില്‍ അദ്ദേഹം പങ്കാളിയാകും.
തികച്ചും സ്വകാര്യമായ പരിപാടിയായതിനാല്‍ കർശന സുരക്ഷയാണ് പൊലീസ് പ്രദേശത്ത് ഒരുക്കിയിട്ടുള്ളത്. ക്ഷണിക്കപ്പെട്ട അതിഥികള്‍ക്കും ചലച്ചിത്ര താരങ്ങള്‍ക്കും മാത്രമാണ് പരിപാടി നടക്കുന്ന വസതിയിലേക്ക് പ്രവേശനമുള്ളത്. ഒന്നര മണിക്കൂറോളം നീളുന്ന സന്ദർശനത്തിന് ശേഷം ശോഭാ സിറ്റിയില്‍ നിന്ന് ഹെലികോപ്റ്റർ മാർഗം തന്നെ അദ്ദേഹം കോയമ്പത്തൂരിലേക്കും അവിടെനിന്ന് ചെന്നൈയിലേക്കും മടങ്ങും.
തമിഴ്നാട് മുഖ്യമന്ത്രിയായി ചുമതലയേറ്റ ശേഷം ഇതാദ്യമായാണ് വിജയ് കേരളത്തില്‍ എത്തുന്നത്. രണ്ട് വർഷം മുൻപ് വെങ്കട് പ്രഭു സംവിധാനം ചെയ്ത ദ ഗ്രേറ്റസ്റ്റ് ഓഫ് ഓള്‍ ടൈം എന്ന സിനിമയുടെ ഷൂട്ടിങ്ങിനായി അദ്ദേഹം തിരുവനന്തപുരത്ത് എത്തിയിരുന്നു. അന്ന് വൻ ആരാധകക്കൂട്ടമാണ് അദ്ദേഹത്തെ വരവേല്‍ക്കാൻ തടിച്ചുകൂടിയത്.
നിലവില്‍ ഔദ്യോഗിക പദവിയിലിരിക്കുന്നതിനാല്‍ പൊതുജനങ്ങള്‍ക്ക് അദ്ദേഹത്തെ നേരില്‍ കാണാൻ വലിയ നിയന്ത്രണങ്ങളുണ്ടാകും. എങ്കിലും പ്രിയ താരത്തെ ഒരുനോക്ക് കാണാൻ നിരവധി ആരാധകർ ശോഭാ സിറ്റി പരിസരത്തേക്ക് എത്തുമെന്നാണ് പൊലീസ് വിലയിരുത്തുന്നത്. ഇതിൻ്റെ അടിസ്ഥാനത്തില്‍ വിപുലമായ സുരക്ഷാ ക്രമീകരണങ്ങള്‍ ഏർപ്പെടുത്തിയിട്ടുണ്ട്.
