കണ്ണൂര്‍: മുന്‍ ആരോഗ്യ മന്ത്രി വീണാ ജോര്‍ജിനെ കണ്ണൂര്‍ റെയില്‍വേ സ്റ്റേഷനില്‍ വെച്ച്‌ കെഎസ് യു പ്രവര്‍ത്തകര്‍ ആക്രമിച്ചെന്ന കേസില്‍ പ്രത്യേക അന്വേഷണ സംഘം (എസ്‌ഐടി) കോടതിയില്‍ അന്തിമ റിപ്പോര്‍ട്ട് സമര്‍പ്പിച്ചത് മുൻ ഭരണപക്ഷത്തിന് കനത്ത തിരിച്ചടിയാകുന്നു.
കണ്ണൂര്‍ ജെഎഫ്സിഎം കോടതി സമര്‍പ്പിച്ച റിപ്പോര്‍ട്ട് അംഗീകരിച്ചാല്‍ കേസിന്റെ ഗതി തന്നെ മാറും. വ്യാജ പരാതി നല്‍കി കള്ളക്കേസുണ്ടാക്കിയതിന് എസ്‌ഐടി റിപ്പോര്‍ട്ടിന്റെ അടിസ്ഥാനത്തില്‍ പുതിയ കേസെടുക്കേണ്ടി വരും. അങ്ങനെ വന്നാല്‍ വീണാ ജോര്‍ജ് തന്നെ കേസില്‍ പ്രതിയാകുന്ന അവസ്ഥയുണ്ടാകും.
എസ്‌ഐടി തലവന്‍ യു. പ്രേമന്‍ സമര്‍പ്പിച്ച റിപ്പോര്‍ട്ടില്‍ കെഎസ്യു പ്രവര്‍ത്തകര്‍ക്കെതിരെ ചുമത്തിയ പ്രധാന വകുപ്പുകളൊന്നും നിലനില്‍ക്കില്ലെന്നാണ് വ്യക്തമാക്കുന്നത്. കരിങ്കൊടി പ്രതിഷേധം മാത്രം നടത്തിയ പ്രവര്‍ത്തകര്‍ക്കെതിരെ വധശ്രമം അടക്കമുള്ള കടുത്ത വകുപ്പുകളാണ് റെയില്‍വേ പൊലീസ് ചുമത്തിയിരുന്നത്. കലാപശ്രമം, റെയില്‍വേ പരിസരത്ത് അതിക്രമിച്ചു കടക്കല്‍ എന്നീ വകുപ്പുകള്‍ നിലനില്‍ക്കില്ലെന്നും പൊലീസിന്റെ ഔദ്യോഗിക കൃത്യനിര്‍വഹണം തടസ്സപ്പെട്ടിട്ടില്ലെന്നും റിപ്പോര്‍ട്ടില്‍ ചൂണ്ടിക്കാണിക്കുന്നു.
ജനാധിപത്യപരമായ കരിങ്കൊടി പ്രതിഷേധം ഒരിക്കലും കുറ്റകൃത്യമല്ലെന്നും എസ്‌ഐടി കോടതിയെ അറിയിച്ചിട്ടുണ്ട്. വീണാ ജോര്‍ജിനെ കെഎസ്യു പ്രവര്‍ത്തകര്‍ ആക്രമിച്ചിട്ടേയില്ലെന്നും പ്രതിഷേധക്കാര്‍ക്ക് മന്ത്രിയുടെ അടുത്തെത്താന്‍ പോലും കഴിഞ്ഞിരുന്നില്ലെന്നുമാണ് റിപ്പോര്‍ട്ടിലുള്ളത്. തികച്ചും സമാധാനപരമായി നടന്ന പ്രതിഷേധത്തെ അന്നത്തെ ഭരണകൂടവും പൊലീസും ചേര്‍ന്ന് മനഃപൂര്‍വം പെരുപ്പിച്ചുകാട്ടുകയായിരുന്നു.
കേസിലെ ഏറ്റവും നിര്‍ണായകമായ വധശ്രമ ആരോപണം നിലനില്‍ക്കാതിരിക്കാന്‍ കാരണം മന്ത്രിയുടെ ഗണ്‍മാന്റെ മൊഴിമാറ്റമാണ്. തുടക്കത്തില്‍ കെഎസ്യു പ്രവര്‍ത്തകര്‍ മന്ത്രിയെ ആക്രമിക്കുന്നത് കണ്ടതായി മൊഴി നല്‍കിയ ഗണ്‍മാന്‍ അഭിലാഷ്, പിന്നീട് അത് തിരുത്തുകയായിരുന്നു. മന്ത്രിയുടെ നേരിട്ടുള്ള നിര്‍ദേശപ്രകാരമാണ് താന്‍ അത്തരം ഒരു മൊഴി അന്വേഷണസംഘത്തിന് നല്‍കിയതെന്നും ആക്രമണം താന്‍ നേരിട്ട് കണ്ടിട്ടില്ലെന്നും ഗണ്‍മാന്‍ വെളിപ്പെടുത്തി.
ഗണ്‍മാന്‍ തന്നെ സത്യം വെളിപ്പെടുത്തിയതോടെ കെഎസ്യു പ്രവര്‍ത്തകരും പൊലീസും തമ്മില്‍ അന്ന് ചെറിയ ഉന്തും തള്ളും മാത്രമാണ് ഉണ്ടായതെന്ന് വ്യക്തമായി. ആക്രമിക്കാന്‍ ഉപയോഗിച്ചു എന്ന് പറയുന്ന ആയുധങ്ങളൊന്നും കണ്ടെത്താന്‍ കഴിഞ്ഞില്ലെന്നും എസ്‌ഐടി കോടതിയില്‍ വ്യക്തമാക്കിയിട്ടുണ്ട്. ഇതോടെ വ്യാജ പരാതി ചമച്ചതിലേക്ക് അന്വേഷണം നീളാനുള്ള വഴിയൊരുങ്ങി.
2026 ഫെബ്രുവരി 25-നാണ് കേസിനാസ്പദമായ സംഭവം നടന്നത്. കണ്ണൂര്‍ റെയില്‍വേ സ്റ്റേഷനില്‍ വെച്ച്‌ അന്നത്തെ ആരോഗ്യ മന്ത്രിയായിരുന്ന വീണാ ജോര്‍ജിനെതിരെ കെഎസ്യു പ്രവര്‍ത്തകര്‍ കരിങ്കൊടി കാട്ടുകയായിരുന്നു. ഇതിനിടെ മന്ത്രിക്ക് പരിക്കേറ്റെന്ന് ആരോപിച്ചാണ് വധശ്രമം ഉള്‍പ്പെടെയുള്ള ജാമ്യമില്ലാ വകുപ്പുകള്‍ ചുമത്തി റെയില്‍വേ പൊലീസ് കേസെടുത്തത്.
എന്നാല്‍ രാഷ്ട്രീയ ലാഭത്തിനും പ്രതിപക്ഷ സംഘടനകളെ ഒതുക്കുന്നതിനുമായി സര്‍ക്കാര്‍ സംവിധാനങ്ങളെ ദുരുപയോഗം ചെയ്ത് കെട്ടിച്ചമച്ച കേസാണിതെന്ന കെഎസ്യുവിന്റെ വാദം ശരിവെക്കുന്നതാണ് എസ്‌ഐടിയുടെ പുതിയ കണ്ടെത്തലുകള്‍. ഗണ്‍മാന്റെ മൊഴി തിരുത്തല്‍ കൂടിയായതോടെ വരുംദിവസങ്ങളില്‍ കോടതി സ്വീകരിക്കുന്ന നിലപാട് ഏറെ നിര്‍ണായകമാകും.
വ്യാജ മൊഴി നല്‍കിയ ഗണ്‍മാനെതിരെ അച്ചടക്ക നടപടിയെടുക്കുന്ന കാര്യം ഡിജിപിക്ക് തീരുമാനിക്കാമെന്ന് എസ്‌ഐടി റിപ്പോര്‍ട്ടില്‍ പറയുന്നുണ്ട്. എങ്കിലും മന്ത്രിയുടെ സമ്മര്‍ദത്തിന് വഴങ്ങിയാണ് മൊഴി നല്‍കിയതെന്ന് ഉദ്യോഗസ്ഥന്‍ വെളിപ്പെടുത്തിയ പശ്ചാത്തലത്തില്‍, ഇതിന് പിന്നിലെ ഗൂഢാലോചന അന്വേഷിക്കണമെന്ന ആവശ്യവും ശക്തമാണ്.
കോടതി ഈ എസ്‌ഐടി റിപ്പോര്‍ട്ട് തള്ളാതെ അംഗീകരിക്കുകയാണെങ്കില്‍ പ്രതിസ്ഥാനത്തുണ്ടായിരുന്ന കെഎസ്യു പ്രവര്‍ത്തകര്‍ പൂര്‍ണ്ണമായും കുറ്റമുക്തരാകും. അതിനുശേഷം വ്യാജ തെളിവുണ്ടാക്കാനും നിരപരാധികളെ കുടുക്കാനും ശ്രമിച്ചതിന് കേസിലെ പരാതിക്കാര്‍ക്കും സാക്ഷികള്‍ക്കുമെതിരെ നടപടിക്ക് കോടതി ഉത്തരവിട്ടേക്കും.
ചുരുക്കത്തില്‍, കേസ് വിചാരണ ഘട്ടത്തിലേക്ക് എത്തുന്നതിന് മുമ്പ് തന്നെ തിരിച്ചടിയായി മാറി കോടതിയുടെ പരിഗണനയിലിരിക്കുന്ന ഈ എസ്‌ഐടി റിപ്പോര്‍ട്ട്, മുന്‍ ആരോഗ്യ മന്ത്രി വീണാ ജോര്‍ജിനും അന്നത്തെ പൊലീസ് ഉദ്യോഗസ്ഥര്‍ക്കും ഒരുപോലെ വലിയ പ്രതിസന്ധിയാണ് സൃഷ്ടിച്ചിരിക്കുന്നത്
