കോട്ടയം: കുട്ടനാട്ടിലെയും അപ്പർകുട്ടനാട്ടിലെയും നെല്‍കർഷകർഷകരുടെ ആശ്രയമായ വെച്ചൂർ മോഡേണ്‍ റൈസ് മില്ലിന് സർക്കാരിന്റെ കെടുകാര്യസ്ഥത മൂലം പൂട്ടുവീഴുന്നു.
കർഷകരില്‍ നിന്ന് നെല്ല് സംഭരിച്ച വകയില്‍ ലഭിക്കാനുള്ള 30 കോടി രൂപ സപ്ലൈക്കോ നല്‍കാത്തതാണ് പ്രതിസന്ധിയിലേക്ക് തള്ളിവിട്ടത്.
സർക്കാർ സ്ഥാപനമായ ഓയില്‍ പാം ഇന്ത്യയുടെ കീഴിലാണ് വെച്ചൂർ റൈസ് മില്ല് പ്രവർത്തിക്കുന്നത്. മില്ലിന് പൂട്ടുവീണാല്‍ ആയിരക്കണക്കിന് വരുന്ന കർഷകർക്ക് വലിയ തിരിച്ചടിയാകും.
നെല്ലിന് വിലപേശി സ്വകാര്യമില്ലുകാർക്ക് കർഷകരെ ചൂഷണം ചെയ്യാനുള്ള അവസരവുമാകും.
അതേസമയം സൈലോകളുടെ അറ്റകുറ്റപണി സമയബന്ധിതമായി പൂർത്തിയാകാത്തത് ചൂണ്ടിക്കാട്ടിയാണ് ഉത്പാദനം നിറുത്തിയത്. സൈലോ ഇല്ലെങ്കിലും രണ്ടു ഷിഫ്റ്റ് പ്രവർത്തിപ്പിച്ചാല്‍ 48 ടണ്‍ നെല്ല് ഒരുദിവസം കുത്തി അരിയാക്കാൻ സാധിക്കും.
ഇതിനൊന്നും ശ്രമിക്കാതെയാണ് അടച്ചുപൂട്ടല്‍ എന്ന കടുത്ത തീരുമാനത്തിലേക്ക് എത്തിയത്.
