കൊച്ചി: മുസ്ലിം യൂത്ത് ലീഗ് സംസ്ഥാന സമ്മേളനത്തില്‍ മുസ്ലിം ലീഗിന്റെയും യുഡിഎഫിന്റെയും മതേതര നിലപാടുകളെ പ്രകീർത്തിച്ച്‌ പ്രതിപക്ഷ നേതാവ് വി.ഡി സതീശൻ.
മുസ്ലിം ലീഗ് ശക്തി പ്രാപിച്ചത് അവരുടെ മതേതര നിലപാടുകള്‍ കൊണ്ടാണെന്ന് അദ്ദേഹം പറഞ്ഞു. മതേതര നിലപാടാണ് യുഡിഎഫിന്റെ ഏറ്റവും വലിയ ശക്തിയെന്നും അതില്‍ വിട്ടുവീഴ്ചയ്ക്ക് തയ്യാറല്ലെന്നും വി.ഡി സതീശൻ വ്യക്തമാക്കി.
തെരഞ്ഞെടുപ്പ് സമയത്തും ഈ നിലപാടില്‍ മാറ്റമുണ്ടായിരുന്നില്ല. വർഗീയത പറയുന്നവരെ അകറ്റിനിർത്തിക്കൊണ്ടായിരുന്നു യുഡിഎഫ് പ്രചാരണം നടത്തിയതെന്നും അദ്ദേഹം കൂട്ടിച്ചേർത്തു.
അതേസമയം സമ്മേളനത്തില്‍ ഇടതുപക്ഷത്തിനെതിരെ പി.കെ കുഞ്ഞാലിക്കുട്ടി തുറന്നടിച്ചു. കാലഹരണപ്പെട്ട ആശയങ്ങളുമായാണ് ചിലർ ഇപ്പോഴും മുന്നോട്ടുപോകുന്നതെന്നും സർവകലാശാലകളില്‍ അക്രമം തുടരുകയാണെന്നും അദ്ദേഹം വിമർശിച്ചു.
ഇത്തരം സാഹചര്യങ്ങള്‍ ഭയന്ന് വിദ്യാർഥികള്‍ നാടുവിടുന്ന അവസ്ഥയാണുള്ളതെന്നും കലാലയങ്ങളില്‍ ഭീകരതയുടെ അന്തരീക്ഷം സൃഷ്ടിക്കുകയും വിദ്യാർഥികള്‍ക്ക് കത്തിയും കുത്തും നല്‍കുകയാണെന്നും കുഞ്ഞാലിക്കുട്ടി ആരോപിച്ചു.
