കോട്ടയം: ആകമാന സുറിയാനി ഓര്ത്തഡോക്സ് സഭയുടെ പരമാധ്യക്ഷന് മോര് ഇഗ്നാത്തിയോസ് അഫ്രേം രണ്ടാമന് പാത്രിയര്ക്കീസ് ബാവയുടെ നേരിട്ടുള്ള നിയന്ത്രണത്തില് പ്രവർത്തിക്കുന്ന തിരുവഞ്ചൂര് മോര് അന്തോണിയോസ് ഇവാഞ്ചലിക്കല് മിഷന് (എഇഎം) ട്രസ്റ്റിന്റെ ആഭിമുഖ്യത്തില് മുതിര്ന്ന പൗരന്മാര്ക്കായി നിര്മിച്ച കനാന് വയോജന സംരക്ഷണ വില്ലേജിൻ്റെ സമര്പ്പണം ജൂലൈ 18ന് നടക്കും.
ഏറ്റുമാനൂര് ബൈപ്പാസ് റോഡിൽ തിരുവഞ്ചൂരിന് സമീപം നിര്മിച്ച മന്ദിരത്തിൻ്റെ കൂദാശ 18ന് വൈകുന്നേരം മൂന്നിന് യാക്കോബായ സുറിയാനി സഭയുടെ ശ്രേഷ്ഠ കാതോലിക്ക മോര് ബസേലിയോസ് ജോസഫ് ബാവ നിര്വഹിക്കും. സഭയിലെ വിവിധ മെത്രാപ്പോലീത്താമാരും വൈദികരും സഹകാർമ്മികരായിരിക്കും.
തുടർന്ന് തൂത്തൂട്ടി മോര് ഗ്രിഗോറിയന് ധ്യാനകേന്ദ്രത്തില് വൈകുന്നേരം നാലിന് ഉദ്ഘാടന സമ്മേളനം. ശ്രേഷ്ഠ കാതോലിക്ക മോര് ബസേലിയോസ് ജോസഫ് ബാവ അധ്യക്ഷത വഹിക്കുന്ന സമ്മേളനത്തിൽ കനാന് വയോജന സംരക്ഷണ സാന്ത്വന വില്ലേജിന്റെ ഉദ്ഘാടനം മുഖ്യമന്ത്രി വി.ഡി. സതീശന് നിര്വഹിക്കും.
തൂത്തൂട്ടി ധ്യാനകേന്ദ്രത്തിൻ്റെ ജൂബിലി ആഘോഷത്തോട് അനുബന്ധിച്ചുള്ള ജീവകാരുണ്യ പ്രവർത്തനങ്ങളുടെ ഉദ്ഘാടനം നിയമസഭാ സ്പീക്കര് തിരുവഞ്ചൂര് രാധാകൃഷ്ണന് നിര്വഹിക്കും.
ഫ്രാന്സിസ് ജോര്ജ് എംപി മുഖ്യപ്രഭാഷണം നടത്തും. ചാണ്ടി ഉമ്മന് എംഎല്എ, മുൻമന്ത്രി വി.എന്. വാസവന്, തോമസ് മോര് തീമോത്തിയോസ്, മാത്യുസ് മോര് അഫ്രേം, റബര് ബോര്ഡ് ചെയര്മാന് എൻ. ഹരി, ജില്ലാ പഞ്ചായത്ത് മുൻ വൈസ് പ്രസിഡൻ്റ് അഡ്വ. ഫില്സൺ മാത്യുസ്, ജില്ലാ പഞ്ചായത്തംഗം ഗ്രേസി കരിമ്പന്നൂര്, പള്ളം ബ്ലോക്ക് പഞ്ചായത്ത് പ്രസിഡൻ്റ് ലതാകുമാരി സലിമോന്, അയർക്കുന്നം ഗ്രാമപഞ്ചായത്ത് പ്രസിഡൻ്റ് ഗീത രാധാകൃഷ്ണന്, പള്ളം ബ്ലോക്ക് പഞ്ചായത്തംഗം കെ.സി. ഐപ്പ്, സംഘാടക സമിതി കണ്വീനര് അനിയന് മാത്യു, അയര്ക്കുന്നം പഞ്ചായത്ത് സ്റ്റാന്ഡിങ് കമ്മിറ്റി ചെയര്മാന് ജിജി നാഗമറ്റം തുടങ്ങിയവർ പ്രസംഗിക്കും. തൂത്തൂട്ടി ധ്യാനകേന്ദ്രം ഡയറക്ടറും യാക്കോബായ സഭ ഇടുക്കി ഭദ്രാസനാധിപനുമായ സഖറിയാസ് മോര് പീലക്സിനോസ് സ്വാഗതവും എഇഎം ട്രസ്റ്റ് സെക്രട്ടറി റവ. കുര്യാക്കോസ് റമ്പാൻ കൃതജ്ഞതയും പറയും.
സ്നേഹത്തിന്റെയും കരുതലിന്റെയും പ്രതീകമായി ഒരുങ്ങുന്ന സീനിയര് ലിവിങ് ഹോം വയോജന സംരക്ഷണ രംഗത്ത് ശ്രദ്ധേയമായ സേവന പദ്ധതിയുമായി മാറുമ്പോള്
ഏകദേശം നൂറോളം തൊഴിലവസരങ്ങള് കൂടി പുതുതായി നല്കാന് ഇത് പ്രയോജനം നല്കുമെന്ന് സംഘാടകസമിതി അറിയിച്ചു.
