വൈക്കം: ഉദയനാപുരം പഞ്ചായത്തിലെ നേരേകടവില് ഓരുവെള്ളം കയറുന്ന പ്രദേശത്ത് പൂകൃഷി ചെയ്യുന്ന പി.വി വിനീഷിന്റെ ചെത്തിപ്പൂ കൃഷിയ്ക്ക് നൂറുമേനി വിളവ്.
പെയിന്റിന്റെ കാലിയായ ടിന്നുകളിലും ഉപയോഗശൂന്യമായ ഫ്രിഡ്ജിന്റെ ഭാഗങ്ങളിലും ചെത്തി, ബന്ദി, തുളസി, തുടങ്ങി വിവിധയിനം പച്ചക്കറികളും പ്രതികൂല കാലാവസ്ഥയില് കൃഷി ചെയ്യുന്ന കര്ഷകനാണ് പി.വി വിനീഷ്. മഴക്കാലത്ത് മഴവെള്ളം സംഭരിച്ച് കൃഷിക്ക് ഉപയോഗിക്കുന്നതാണ് വിനീഷിന്റെ കൃഷി രീതി. ചെത്തിപ്പൂവും, തുളസിയും ബന്ദിപ്പൂവിനും മെച്ചപ്പെട്ട വിലമാര്ക്കറ്റില് ലഭിക്കുമെന്നാണ് വിനീഷ് പറയുന്നത്.
ഒരു ഭാഗത്ത് ഇത്തരം കൃഷി ചെയ്യുമ്പോള് ഇതോടു ചേര്ന്ന നാല് ഏക്കര് സ്ഥലത്ത് കരിമീന് കൃഷി ചെയ്യുന്ന വിനീഷിന് മികച്ച മത്സ്യ കര്ഷകനുള്ള സംസ്ഥാന അവാര്ഡും കിട്ടിയിട്ടുണ്ട്. ചെത്തിപ്പൂവിന്റെ വിളവെടുപ്പ് ഉദ്ഘാടനം പഞ്ചായത്ത് പ്രസിഡന്റ് കെ.ജി രാജു നിര്വഹിച്ചു.
സ്റ്റാന്ഡിങ് കമ്മിറ്റി ചെയര്മാന് അജിതാ മധുകുട്ടന് അധ്യക്ഷത വഹിച്ചു. ജനപ്രതിനിധികളായ ജസീനാ ഷാജുദ്ദീന്, കെ.ദീപേഷ്, പി.വി പുഷ്കരന്, രഞ്ജനാ സുനില്, അഭിജിത്ത്, ഷൈലജാ സതീശന്, കൃഷി ഓഫീസര് ആര്.സിദ്ധാര്ത്ഥ് എന്നിവര് പങ്കെടുത്തു.
