വടവാതൂര്‍: വടവാതൂര്‍ ബണ്ട് റോഡിലെ മീനന്തറ ടൂറിസം പദ്ധതിയുടെ ഭാഗമായി ഗ്രാമീണ വിനോദസഞ്ചാര കേന്ദ്രത്തിന് ഇനി വേണ്ടത് വികസനമാണ്.
പ്രകൃതി കനിഞ്ഞനുഗ്രഹിച്ച സൗന്ദര്യത്തെ സഞ്ചാരികളുടെ കണ്ണിലെത്തിക്കാന്‍ സമഗ്രമായ പദ്ധതികളാണ് നടപ്പാക്കേണ്ടത്. വിജയപുരം ഗ്രാമപ്പഞ്ചായത്തില്‍പ്പെട്ട വടവാതൂര്‍ ബണ്ട് റോഡ് വിനോദ സഞ്ചാരികള്‍ക്ക് നയനമനോഹരമായ കാഴ്ചകളാണ് സമ്മാനിക്കുന്നത്. പാടത്തിന്റെ നടുവിലൂടെയുള്ള പാതയില്‍ വെറുതെ ഒന്ന് സഞ്ചരിച്ചാല്‍ മതി ശുദ്ധവായു ശ്വസിക്കാം. മനോഹരമായ കാഴ്ചകള്‍ കാണാം. വെറുതെ നടക്കാം. സുഹൃത്തുക്കളുമൊത്ത് ഇളംകാറ്റേറ്റ് സൊറ പറഞ്ഞിരിക്കാം. ഈ ആസ്വാദനത്തിന് പ്രായവ്യത്യാസമില്ല, വലുപ്പച്ചെറുപ്പമില്ല.
പാറമ്പുഴക്കരയേയും വടവാതൂര്‍ക്കരയേയും ബന്ധിപ്പിക്കുന്നതാണ് വടവാതൂര്‍ ബണ്ട് റോഡ്. നൂറുകണക്കിന് ഏക്കര്‍ പാടശേഖരത്തിന് നടുവിലൂടെ പോകുന്ന റോഡില്‍ മൂന്ന് പാലമാണുള്ളത്. ഒന്ന് മീനന്തറയാറിന് കുറുകെയും രണ്ടെണ്ണം മണലുംകുഴി തോടിനും പാമ്പാടിയില്‍ നിന്നും ഉത്ഭവിച്ച്‌ പുതുപ്പള്ളിയിലൂടെ ഒഴുകി വടവാതൂരിലെത്തുന്ന കരിമ്പിന്‍ തോടിനും കുറുകെയുമാണ്. അമയന്നൂര്‍, മാലം, വടവാതൂര്‍, പൊന്‍പള്ളി, ഇറഞ്ഞാല്‍ എന്നി പ്രദേശങ്ങള്‍ ഉള്‍പ്പെടുന്നതാണ് വടവാതൂര്‍ പാടശേഖരം. വിനോദ സഞ്ചാര മേഖലക്ക് അനന്തസാദ്ധ്യകളുള്ള സ്ഥലമാണ് വടവാതൂര്‍ ബണ്ട് റോഡ്. പാറമ്പുഴ മോസ്‌കോ കവലയില്‍ നിന്നും വടവാതൂര്‍കവലക്കും കെകെ റോഡിന് സമീപം സ്ഥിതിചെയ്യുന്ന മില്‍മയുടെ എതിര്‍വശത്തും എത്തിച്ചേരുന്ന റോഡാണ് ബണ്ട് റോഡ്.
കെകെ റോഡിന്റെ ഭാഗത്തുനിന്നും മെഡിക്കല്‍ കോളേജിലേക്കും ഏറ്റുമാനൂര്‍ക്കും എംസി റോഡിലേക്കും കോട്ടയം നഗരത്തിന്റെ തിരക്കില്‍പ്പെടാതെ വേഗത്തില്‍ എത്താന്‍ കഴിയുന്നതാണ് ഈ റോഡ്. പണ്ട് കാര്‍ഷിക ആവശ്യത്തിനായി വയലോരത്ത് നിര്‍മ്മിച്ച മട പിന്നീട് വീതികൂട്ടി മണ്ണിട്ടുയര്‍ത്തി റോഡാക്കുകയായിരുന്നു.
പ്രത്യേകതകള്‍, സവിശേഷതകള് ഇരുവശത്തും വിശാലമായ പാടശേഖരം. നയനമനോഹരമായ കാഴ്ചകള്‍. മറ്റ് വഴിയോര വിനോദ സഞ്ചാരകേന്ദ്രത്തെക്കാള്‍ വാഹനത്തിരക്ക് കുറഞ്ഞയിടം. പ്രായമുള്ളവര്‍ക്കും കുട്ടികള്‍ക്കും ഭയമില്ലാതെ യഥേഷ്ടം യാത്രചെയ്യാം. റോഡിന് ഇരുവശവും ഇരുമ്പുകൊണ്ട് സംരക്ഷണ വേലി നിര്‍മ്മിച്ചിട്ടുണ്ട്. വെളുത്ത ആമ്പലും ചുവന്ന ആമ്പലും ഇഷ്ടംപോലെ. വള്ളമോ ബോട്ടോ തരപ്പെടുത്തിയാല്‍ ജലയാത്രയും ആസ്വദിക്കാം. വിശാലമായ പാടശേഖരത്തില്‍ സ്വതന്ത്രമായി സഞ്ചരിക്കാമെന്നതും ഇവിടുത്തെ പ്രത്യേകതയാണ്. പുതുവത്സര ആഘോഷത്തിന്റെ ഭാഗമായി പാപ്പാഞ്ഞിയെ കത്തിക്കുന്ന കോട്ടയം കാര്‍ണിവല്‍ ഇവിടെയാണ് നടക്കുന്നത്. വടവാതൂര്‍ കടത്ത് കടവില്‍ മീനന്തറ ടൂറിസം പദ്ധതിയുടെ ഭാഗമായി കുട്ടികളുടെ പാര്‍ക്ക് സ്ഥാപിച്ചിട്ടുണ്ട്.
ദൗര്‍ബല്യവും കുറവുകളും അടിസ്ഥാന സൗകര്യമില്ല. ഇരിക്കാന്‍ മൂന്ന് ബഞ്ച് ഉണ്ടാക്കിയിട്ടുണ്ടെന്നല്ലാതെ ഒന്നും ചെയ്തിട്ടില്ല. (നിലവില്‍ റോഡ് നവീകരണത്തിനായി ബഞ്ച് നീക്കം ചെയ്തിരിക്കുകയാണ്). മികച്ച വഴിയോര വിനോദ സഞ്ചാര കേന്ദ്രമാക്കാന്‍ ആവശ്യമായ ഒരു നടപടിയും ചെയ്യുന്നില്ല. ആകെയുള്ളത് പുതുവത്സര ആഘോഷം മാത്രമാണ്. സഞ്ചാരികള്‍ എത്തിയാല്‍ അവര്‍ക്ക് വേണ്ട സൗകര്യങ്ങള്‍ ഒരുക്കാന്‍ പഞ്ചായത്ത് തയ്യാറാകണം.
സാമ്പത്തിക സ്വാശ്രയത്വം വഴിയോര വിനോദ സഞ്ചാര കേന്ദ്രങ്ങള്‍ ഗ്രാമീണ മേഖലകളില്‍ വലിയ മുന്നേറ്റമാണ് ഉണ്ടാക്കുന്നത്. ഇത്തരം കേന്ദ്രങ്ങളില്‍ ഗ്രാമീണ മേഖലകളിലെ സ്ത്രീകള്‍ക്ക് വലിയ സാമ്പത്തിക മുന്നേറ്റവും രാജ്യവ്യാപകമായി കാണാം. കേന്ദ്രസര്‍ക്കാര്‍ ഇത്തരം പദ്ധതികള്‍ക്ക് വലിയ പിന്തുണയാണ് നല്‍കുന്നത്. കാര്‍ഷിക വിനോദ സഞ്ചാര പദ്ധതിയും വഴിയോര ഭക്ഷ്യ മേളകളുമൊക്കെ രാജ്യത്തെ ഗ്രാമീണ മേഖലയുടെ മുഖച്ഛായ മാറ്റുന്നു. ഇത്തരത്തിലുള്ള വികസനത്തിന് മുന്‍കൈ എടുക്കേണ്ടത് ഗ്രാമ പഞ്ചായത്താണ്.
