തിരുവനന്തപുരം: കാട്ടാക്കട എംഎല്എ എം.ആർ. ബൈജുവിന്റെ പേഴ്സണല് സ്റ്റാഫ് എന്ന് വ്യാജേന ചമഞ്ഞ് തട്ടിപ്പ് നടത്തിയ മൂന്നുപേരെ പൊലീസ് അറസ്റ്റ് ചെയ്തു.
രാജേഷ് (43), വിനീത് (38), സുരേഷ് (41) എന്നിവരാണ് പിടിയിലായത്. എംഎല്എ ആശുപത്രിയിലാണെന്നും അടിയന്തര സഹായം വേണമെന്നും പറഞ്ഞാണ് പ്രതികള് തട്ടിപ്പ് നടത്തിയത്.
എംഎല്എയുടെ പേരില് ഒരു വ്യാപാരിയില് നിന്ന് 1000 രൂപ ഇവർ കൈക്കലാക്കിയതായി പൊലീസ് പറയുന്നു. സംഭവം ശ്രദ്ധയില്പ്പെട്ടതിനെ തുടർന്ന് എംഎല്എ കാട്ടാക്കട പൊലീസില് പരാതി നല്കുകയായിരുന്നു. പരാതിയുടെ അടിസ്ഥാനത്തില് കാട്ടാക്കട ഡിവൈഎസ്പിയുടെ നേതൃത്വത്തിലുള്ള അന്വേഷണ സംഘം പ്രതികളെ കണ്ടെത്തി അറസ്റ്റ് ചെയ്യുകയായിരുന്നു.
പ്രതികള് എംഎല്എയുടെ പേരും പേഴ്സണല് സ്റ്റാഫ് എന്ന പദവിയും ഉപയോഗിച്ച് വിശ്വാസം നേടിയാണ് പണം തട്ടിയതെന്ന് പൊലീസ് വ്യക്തമാക്കി. അറസ്റ്റിലായവരെ കോടതിയില് ഹാജരാക്കിയ ശേഷം റിമാൻഡ് ചെയ്തു. സംഭവത്തില് കൂടുതല് പരാതികള് ഉണ്ടോയെന്ന് പൊലീസ് പരിശോധിക്കുന്നുണ്ട്. ജനപ്രതിനിധികളുടെ പേരില് ഫോണിലൂടെയോ നേരിട്ടോ പണം ആവശ്യപ്പെടുന്നവരോട് ജാഗ്രത പാലിക്കണമെന്ന് പൊലീസ് അഭ്യർഥിച്ചു.
