തിരുവനന്തപുരം: റെയില്വേ ട്രാക്കുകളില് അറ്റകുറ്റപ്പണികള് നടക്കുന്നതിനാല് ചില ട്രെയിനുകള് ഭാഗികമായി റദ്ദാക്കിയെന്ന് റെയില്വേ അറിയിച്ചു.
ചില ട്രെയിനുകള് വൈകുമെന്നും അധികൃതർ അറിയിച്ചിട്ടുണ്ട്. തിരുവനന്തപുരം ഡിവിഷനിലെ അറ്റകുറ്റപ്പണി കാരണം കണ്ണൂർ - എറണാകുളം ജംഗ്ഷൻ ഇന്റർസിറ്റി എക്സ്പ്രസില് (16306) സെപ്തംബർ 25, 26, 27, ഒക്ടോബർ 2, 4, 6, 9,11,13 തീയതികളില് തൃശൂരിനും എറണാകുളത്തിനും ഇടയില് റദ്ദാക്കി. ഈ ദിവസങ്ങളില് ട്രെയിൻ തൃശൂരില് യാത്ര അവസാനിപ്പിക്കുമെന്നാണ് അറിയിച്ചിരിക്കുന്നത്.
സേലം ഡിവിഷനിലെ അറ്റകുറ്റപ്പണി കാരണം കോയമ്പത്തൂർ - ഷൊർണൂർ പാസഞ്ചർ (56603) സെപ്തംബർ 18,26 തീയതികളില് കോയമ്പത്തൂരിനും പോത്തന്നൂരിനും ഇടയില് ഭാഗികമായി റദ്ദാക്കി. ഈ ദിവസങ്ങളില് പോത്തന്നൂർ ജംഗ്ഷനില്നിന്നാകും ട്രെയിൻ പുറപ്പെടുക. ഷൊർണൂർ - കോയമ്പത്തൂർ പാസഞ്ചർ (56604) ട്രെയിനും ഈ ദിവസങ്ങളില് പോത്തന്നൂരിനും കോയമ്പത്തൂരിനും ഇടയില് റദ്ദാക്കി. ഈ ദിവസങ്ങളില് ട്രെയിൻ പോത്തന്നൂരില് യാത്ര അവസാനിപ്പിക്കും. കോയമ്പത്തൂർ - ജബല്പൂർ വീക്ക്ലി സ്പെഷ്യല് എക്സ്പ്രസ് (02197) സെപ്തംബർ 21ന് കോയമ്പത്തൂരിനും പോത്തന്നൂരിനും ഇടയില് റദ്ദാക്കി. ഈ ദിവസം പോത്തന്നൂരില് നിന്നാകും ട്രെയിൻ യാത്ര തിരിക്കുക.
പാലക്കാട് ഡിവിഷനിലെ അറ്റകുറ്റപ്പണികള് കാരണം വിവിധ ട്രെയിനുകള് വൈകിയോടുമെന്നും അധികൃതർ അറിയിച്ചു. മംഗളൂരു സെൻട്രല് - ചെന്നൈ സെൻട്രല് (22638) വെസ്റ്റ് കോസ്റ്റ് എക്സ്പ്രസ് സെപ്തംബർ 6, 8, 10,13 തീയതികളില് 45 മിനിറ്റ് വരെ വൈകും. ഹസ്രത്ത് നിസാമുദ്ദീൻ - എറണാകുളം മംഗള സൂപ്പർ ഫാസ്റ്റ് എക്സ്പ്രസ് (12618) സെപ്തംബർ 05,12 തീയതികളില് 45 മിനിറ്റ് വൈകും. ആലപ്പുഴ - കണ്ണൂർ എക്സിക്യൂട്ടീവ് എക്സ്പ്രസ് (16307) ഒക്ടോബർ മൂന്നിന് 30 മിനിറ്റ് വൈകിയോടും. എറണാകുളം - പാലക്കാട് മെമു (6610) സെപ്തംബർ 25നും ഒക്ടോബർ മൂന്നിനും 35 മിനിറ്റ് വൈകും.
