ഡൽഹി: ട്രെയിൻ യാത്രക്കാരുടെ ദീർഘകാലമായുള്ള ആശങ്കകളും പരാതികളും പരിഗണിച്ച്‌ നിലവിലുള്ള ആർ എ സി (RAC) സംവിധാനം ഒഴിവാക്കാൻ ഇന്ത്യൻ റെയില്‍വെയുടെ നീക്കം.
നിലവിലെ ആർ എ സി സംവിധാനമനുസരിച്ച്‌ രണ്ട് യാത്രക്കാർക്കായി ഒരു ബെർത്ത് മാത്രമാണ് അനുവദിക്കുന്നത്. പകുതി ബെർത്ത് മാത്രമാണ് ലഭിക്കുന്നതെങ്കിലും യാത്രക്കാരില്‍ നിന്ന് മുഴുവൻ ടിക്കറ്റ് നിരക്കാണ് ഈടാക്കുന്നത്. ഇത് യാത്രക്കാർക്കിടയില്‍ വലിയ പ്രതിഷേധത്തിനും അസൗകര്യങ്ങള്‍ക്കും കാരണമാകുന്ന സാഹചര്യത്തിലാണ് പുതിയ പരിഷ്കരണത്തിന് ആലോചന നടക്കുന്നത്.
പണം മുഴുവൻ നല്‍കുന്ന യാത്രക്കാർക്ക് പൂർണ്ണമായ ബെർത്തുകള്‍ തന്നെ ഉറപ്പാക്കണമെന്നതാണ് യാത്രക്കാരുടെ ഭാഗത്തുനിന്നുയരുന്ന പ്രധാന ആവശ്യം. ഇനി അഥവാ ആർ എ സി ടിക്കറ്റുകള്‍ തുടർന്നും നല്‍കുന്നുണ്ടെങ്കില്‍ പകുതി നിരക്ക് മാത്രമേ ഈടാക്കാവൂ എന്നും യാത്രക്കാർ ചൂണ്ടിക്കാട്ടുന്നു. യാത്രക്കാരുടെ ഈ ആവശ്യങ്ങള്‍ ഗൗരവമായി പരിഗണിച്ചുകൊണ്ടാണ് ആർ എ സി സംവിധാനം നിർത്തലാക്കാനുള്ള നീക്കം റെയില്‍വേ മന്ത്രാലയം സജീവമായിരിക്കുന്നത്.
