തിരുവനന്തപുരം: സഹയാത്രികർക്ക് ശല്യമാകുന്ന രീതിയില്‍ മൊബൈല്‍ ഫോണില്‍ ഉച്ചത്തില്‍ പാട്ടുവയ്ക്കുന്ന ട്രെയിൻ യാത്രക്കാർക്ക് ഇനി പാതിവഴിയില്‍ യാത്ര അവസാനിപ്പിക്കേണ്ടി വരും.
അത്തരം യാത്രക്കാരെ ട്രെയിനില്‍ നിന്ന് ഇറക്കിവിടും. 1000 രൂപ പിഴയും ചുമത്തും. ടിക്കറ്റ് റദ്ദാക്കി ഇറക്കിവിടാൻ നിയമത്തില്‍ ഭേദഗതി വരുത്തി റെയില്‍വേ. ഇത് പ്രാബല്യത്തിലായി. വ്യാപകമായ പരാതി ഉയർന്ന സാഹചര്യത്തിലാണിത്.
ഉച്ചത്തിലുള്ള ശബ്ദത്തില്‍ വീഡിയോ കാണുന്നവർക്കും ബാധകമാണ്. ടി.ടി.ഇയുടെ നിർദ്ദേശം അവഗണിച്ചാല്‍ ആറു മാസംവരെ തടവു ശിക്ഷയും 5,000 രൂപാവരെ പിഴയും ചുമത്താം. ഇയർ ഫോണുപയോഗിച്ച്‌ പാട്ടു കേള്‍ക്കുന്നതില്‍ തടസമില്ല.
1989ലെ റെയില്‍വേ ആക്ടിലെ 145(2) വകുപ്പ് അനുസരിച്ച്‌ സഹയാത്രികർക്ക് ശല്യമുണ്ടാക്കുന്നത് നിയന്ത്രിക്കാമെങ്കിലും ശിക്ഷ നിർദ്ദേശിച്ചിരുന്നില്ല. ജനവിശ്വാസ് അമന്റ്മെന്റ് ഒഫ് പ്രൊവിഷൻസ് ആക്‌ട് 2026 അനുസരിച്ചാണ് ഭേദഗതി വരുത്തിയത്. യാത്രക്കാർക്ക് 139 എന്ന ടോള്‍ ഫ്രീ നമ്പറില്‍ വിളിച്ചോ, ടി.ടി.ഇയോട് നേരിട്ടോ, റെയില്‍ ആപ്പിലോ പരാതിപ്പെടാം.
അതേസമയം, തിരുവനന്തപുരത്തുനിന്ന് ഷൊർണൂർ വരെയുളള വേണാട് എക്സ്പ്രസില്‍ കൂടുതല്‍ യാത്രക്കാരെ ഉള്‍ക്കൊള്ളുന്ന എല്‍.ഡബ്ളിയു.എസ്. ജനറല്‍ സിറ്റിംഗ് കോച്ചുകള്‍ ഉള്‍പ്പെടുത്തി. ഇന്നലെ മാത്രം 10 കോച്ചുകളാണ് മാറ്റിയത്. ബാക്കികോച്ചുകളും ഉടൻ മാറ്റും.ആകെ 19 ജനറല്‍ കോച്ചുകളാണുള്ളത്.
നേരത്തേ ഒരു കോച്ചില്‍ 108 പേർക്ക് ഇരുന്നും 42 പേർക്കു നിന്നും യാത്രചെയ്യാൻ കഴിയുമായിരുന്നെങ്കില്‍ പുതിയ കോച്ചില്‍ 220 പേർക്ക് ഇരുന്നും 50 മുതല്‍ 70 വരെ പേർക്ക് നിന്നും യാത്രചെയ്യാം. ജനശതാബ്ദിയില്‍ പുഷ്ബാക് സീറ്റുള്ള കോച്ചുകള്‍ അടുത്തയാഴ്ച ഉള്‍പ്പെടുത്തും. ഇതിനായി 16 കോച്ചുകളാണ് കൊച്ചുവേളിയില്‍ എത്തിച്ചിരിക്കുന്നത്.
