അനധികൃത സ്വത്ത് സമ്പാദന കേസ്; ടോമിൻ ജെ. തച്ചങ്കരിയുടെ ശിക്ഷ ചോദ്യം ചെയ്തുള്ള അപ്പീല്‍ ഹൈക്കോടതി ഇന്ന് പരിഗണിക്കും

തിരുവനന്തപുരം: അനധികൃത സ്വത്ത് സമ്പാദന കേസില്‍ കോട്ടയം വിജിലൻസ് കോടതി വിധിച്ച ശിക്ഷ ചോദ്യം ചെയ്ത് ടോമിൻ ജെ. തച്ചങ്കരി നല്‍കിയ അപ്പീല്‍ ഹൈക്കോടതി ഇന്ന് പരിഗണിക്കും.

ശിക്ഷ മരവിപ്പിച്ച്‌ ഇടക്കാല ജാമ്യം അനുവദിക്കണമെന്ന ആവശ്യവും കോടതി പരിഗണിക്കും. ജസ്റ്റിസ് എ. ബദറുദ്ദീന്റെ ബെഞ്ച് ഹർജിയില്‍ സംസ്ഥാന വിജിലൻസിന്റെ മറുപടി തേടിയേക്കും.

കോട്ടയം വിജിലൻസ് കോടതി വിധിച്ച നാല് വർഷം തടവും 30.84 ലക്ഷം രൂപ പിഴയും റദ്ദാക്കണമെന്നാണ് തച്ചങ്കരിയുടെ ആവശ്യം. തന്റെ പേരിലുള്ള സ്വത്തുക്കള്‍ അനധികൃതമായി സമ്പാദിച്ചതല്ലെന്നും കുടുംബസ്വത്താണെന്നും വിചാരണക്കോടതി വിധിയില്‍ നിയമപരമായ പിഴവുകളുണ്ടെന്നുമാണ് അദ്ദേഹത്തിന്റെ വാദം.

2003 മുതല്‍ 2007 വരെയുള്ള കാലയളവില്‍ ഔദ്യോഗിക പദവിയിലിരിക്കെ വരുമാനത്തേക്കാള്‍ 135 ശതമാനം അധികം സ്വത്ത് സമ്പാദിച്ചെന്നായിരുന്നു കേസ്. ഇതില്‍ 30.84 ലക്ഷം രൂപയുടെ സ്വത്തിന്റെ ഉറവിടം തൃപ്തികരമായി ബോധ്യപ്പെടുത്താൻ കഴിഞ്ഞില്ലെന്നാണ് കോട്ടയം വിജിലൻസ് കോടതി കണ്ടെത്തിയത്.