തൃപ്രയാര്: തൃശൂര് നാട്ടികയില് ടോള് പിരിവ് താല്കാലികമായി നിര്ത്തിവെച്ചു. വിദഗ്ധസംഘം പരിശോധന നടത്തി റിപ്പോര്ട്ട് സമര്പ്പിക്കുന്നതുവരെ ടോള്പിരിവ് പാടില്ലെന്ന് ദേശീയ ഹൈവേ അതോറിറ്റി നിര്ദേശം നല്കി.
കളക്ടറുടെ റിപ്പോര്ട്ട് കൂടി പരിഗണിച്ചായിരിക്കും ടോള് പിരിവ് സംബന്ധിച്ച്‌ അന്തിമ തീരുമാനമെടുക്കുക.
ജനരോക്ഷത്തെ തുടര്ന്ന് ദേശീയപാത നാട്ടികയില് നിര്ത്തിവച്ച ടോള് പിരിവ് 48 മണിക്കൂറിനകം വീണ്ടും പുനരാരംഭിച്ചിരുന്നു. ബഹുജന പ്രക്ഷോഭത്തെ തുടര്ന്ന് മന്ത്രിയുടെ നിര്ദേശപ്രകാരം വ്യാഴാഴ്ച രാവിലെ നിര്ത്തിവച്ച ടോള് പിരിവാണ് ശനിയാഴ്ച 11.30 ഓടെ വീണ്ടും തുടങ്ങിയത്.
ഒക്ടോബര് എട്ടിനാണ് നാട്ടികയില് ആദ്യമായി ടോള് പിരിവ് ആരംഭിച്ചത്. എന്നാല് ദേശീയ പാതയുടെയും മേല്പ്പാലങ്ങളുടെയും നിര്മ്മാണം പൂര്ത്തിയാക്കാതെയാണ് പിരിവെന്ന് ആരോപിച്ച്‌ വിവിധ രാഷ്ട്രിയ പാര്ട്ടികളും സന്നദ്ധ സംഘടനകളും രംഗത്ത് വന്നത് ടോള് പ്ലാസയില് സംഘര്ഷത്തിന് വഴിവച്ചു. ദേശീയ പാതയില് ഗതാഗത കുരുക്ക് ആയതോടെ കലക്ടറും എസ്പിയും നല്കിയ റിപ്പോര്ട്ടിന്റെ അടിസ്ഥാനത്തില് മന്ത്രി ഒ.ജെ ജെനീഷ് പൊതുമരാമത്ത് മന്ത്രിയുമായി നടത്തിയ ചര്ച്ചയെ തുടര്ന്ന് ടോള് പിരിവ് താല്ക്കാലികമായി നിര്ത്തിവയ്ക്കുകയായിരുന്നു. തുടര്ന്ന് ഒരാഴ്ചക്കകം സർവകക്ഷി യോഗം വിളിക്കാനും ധാരണയായിരുന്നു. എന്നാല് ഇതെല്ലാം കാറ്റില് പറത്തിയാണ് ശനിയാഴ്ച ദേശീയ പാത അധികൃതര് ടോള് ഈടാക്കല് ആരംഭിച്ചത്.
എസ്ഡിപിഐ, വെല്ഫയര് പാര്ട്ടി പ്രവര്ത്തകരാണ് ആദ്യം പ്രതിഷേധവുമായി എത്തിയത്. പൊലിസ് ഇവരെ അറസ്റ്റ് ചെയ്തു നീക്കി. പിന്നീട് എല്.ഡി.എഫ് പ്രവര്ത്തകര് പ്രതിഷേധിച്ചു. ഇതിനിടെ പ്രവര്ത്തകര് ചിലര് ടോള്പ്ലാസയിലേക്ക് അതിക്രമിച്ച്‌ കയറാനും ശ്രമിച്ചു. ഇതോടെ പ്രവര്ത്തകരുമായി ഉന്തും തള്ളുമായി. സി.പി.എം ജില്ലാ സെക്രട്ടറി കെ.വി അബ്ദുല് ഖാദര്, വി.എസ്. സുനില്കുമാര്, ഗീത ഗോപി എം.എല്.എ തുടങ്ങിയ നേതാക്കള് ടോള് മാനേജറെ കണ്ട് ടോള് പുനരാരംഭിക്കാനുള്ള ഉത്തരവ് ആവശ്യപ്പെട്ടെങ്കിലും അധികൃതര് കൈമലര്ത്തുകയായിരുന്നു.
ഇതിനിടെ നേതാക്കളും ഉദ്യോഗസ്ഥരും തമ്മില് വാക്ക് തര്ക്കവും സംഘര്ഷവും ഉണ്ടായി. തുടര്ന്ന് പോലീസ് എത്തി എംഎല്എ ഉള്പ്പടെ നേതാക്കളെ അറസ്റ്റ് ചെയ്ത് നീക്കുകയായിരുന്നു. മന്ത്രി ആവശ്യപ്പെട്ടതിനെ തുടര്ന്നാണ് ഇപ്പോള് ടോള് പിരിവ് നിര്ത്തിവെച്ചിരിക്കുന്നത്.
