കൊച്ചി: ദേശീയപാത 66-ലെ തൃശ്ശൂർ നാട്ടിക ഫീ പ്ലാസയില്‍ ടോള്‍ പിരിവ് നടത്തുന്നതിനെതിരെ ഹൈക്കോടതിയില്‍ പൊതുതാത്പര്യ ഹർജി.
നിർമാണപ്രവൃത്തികള്‍ പൂർത്തിയാക്കാതെ ടോള്‍ പിരിക്കാൻ അനുവദിക്കരുതെന്ന് ആവശ്യപ്പെട്ട് പൊതുപ്രവർത്തകനായ പി കെ അനില്‍കുമാർ (അനില്‍ പിള്ളിക്കല്‍) ആണ് ഹർജി നല്‍കിയത്.
സർവീസ് റോഡുകള്‍, ഫ്ലൈഓവറുകള്‍, സുരക്ഷാ സംവിധാനങ്ങള്‍ എന്നിവയുടെ നിർമാണം പൂർത്തിയാക്കാതെയാണ് ടോള്‍ പിരിവിനുള്ള നടപടികളുമായി അധികൃതർ മുന്നോട്ടു പോകുന്നതെന്ന് ഹർജിയില്‍ ആരോപിക്കുന്നു. പൂർത്തീകരണ സർട്ടിഫിക്കറ്റുകളില്‍ അപാകങ്ങളുണ്ടെന്നും ദേശീയപാതയുടെ നീളം കണക്കാക്കിയതില്‍ പിഴവുണ്ടെന്നും ഹർജിക്കാരൻ ചൂണ്ടിക്കാണിച്ചു.
നിർമാണപ്രവൃത്തികളുടെ യഥാർഥ സ്ഥിതി പരിശോധിക്കാൻ സ്വതന്ത്ര സാങ്കേതിക പരിശോധന നടത്തണമെന്നും ഹർജി തീർപ്പാക്കുന്നതുവരെ ടോള്‍ പിരിവ് സ്റ്റേ ചെയ്യണമെന്നും ഹർജിയില്‍ ആവശ്യപ്പെടുന്നു.
