കൊച്ചി: ആലുവ ജില്ലാ ആശുപത്രിയില് നഴ്സിംഗ് അസിസ്റ്റന്റിനെ മർദ്ദിച്ച കേസില് മുഖ്യപ്രതിയെ ആലുവ പോലീസ് അറസ്റ്റ് ചെയ്തു.
തായിക്കാട്ടുകര പൈപ്പ്ലൈൻ റോഡില് മുതിരക്കാട് വീട്ടില് മുഹമ്മദ് റിസ്വാനെയാണ് (24) അന്വേഷണ സംഘം പിടികൂടിയത്. സംഭവം നടന്നതിനു ശേഷം ഇയാള് തൃശൂർ ജില്ലയില് ഒളിവില് കഴിയുകയായിരുന്നു.
കഴിഞ്ഞ വെള്ളിയാഴ്ച രാത്രിയാണ് കേസിനാസ്പദമായ സംഭവം നടന്നത്. കൈക്കുണ്ടായ മുറിവ് ശരിയായ വിധത്തില് കെട്ടിയില്ലെന്ന് ആരോപിച്ച് പ്രതികള് രണ്ടുപേരും ചേർന്ന് നഴ്സിംഗ് അസിസ്റ്റന്റിനെ മർദ്ദിക്കുകയായിരുന്നു. കേസിലെ രണ്ടാം പ്രതിയെ സംഭവം നടന്നതിന്റെ പിറ്റേന്ന് തന്നെ പോലീസ് അറസ്റ്റ് ചെയ്തിരുന്നു. ഇയാള് ഇപ്പോള് ആലുവ സബ് ജയിലില് റിമാൻഡില് കഴിയുകയാണ്.
അറസ്റ്റിലായ ഒന്നാം പ്രതി മുൻപും നിരവധി കേസുകളില് ഉള്പ്പെട്ടയാളാണ്. കഴിഞ്ഞ ഏപ്രില് മാസത്തില് കുട്ടമശ്ശേരിയില് വെച്ച് കെഎസ്ആർടിസി ബസ് തടഞ്ഞുനിർത്തി ജീവനക്കാരെ ക്രൂരമായി ആക്രമിച്ച് പരിക്കേല്പ്പിച്ച സംഭവം അടക്കം നിരവധി കേസുകളില് ഇയാള് പ്രതിയാണെന്ന് പോലീസ് അറിയിച്ചു.
ആശുപത്രികള്ക്ക് നേരെയുള്ള അക്രമം തടയുന്ന നിയമപ്രകാരമുള്ള കടുത്ത വകുപ്പുകളാണ് പ്രതികള്ക്കെതിരെ ചുമത്തിയിട്ടുള്ളത്. അഞ്ച് വർഷം വരെ തടവും ഒരു ലക്ഷം രൂപ പിഴയും ലഭിക്കാവുന്ന വകുപ്പുകളാണ് ഇവർക്കെതിരെ ചേർത്തിരിക്കുന്നത്. ആലുവ സിഐ പി.എം. ഷമീർ, സിപിഒമാരായ കെ.എം. മനോജ്, മാഹിൻ ഷാ അബൂബക്കർ, മുഹമ്മദ് ഷാഹിൻ എന്നിവരടങ്ങിയ അന്വേഷണ സംഘമാണ് പ്രതിയെ പിടികൂടിയത്.
