തിരുവനന്തപുരം: ശ്രീകൃഷ്ണ ജയന്തി ശോഭായാത്ര കടന്നുപോയതിന് പിന്നാലെ തലസ്ഥാന നഗരിയില് അടിഞ്ഞുകൂടിയ മാലിന്യങ്ങള് ഉടനടി നീക്കം ചെയ്ത് തിരുവനന്തപുരം നഗരസഭാ ശുചീകരണ വിഭാഗം.
ആഘോഷങ്ങള് അവസാനിച്ചയുടൻ തന്നെ പ്രധാന വീഥികളില് നിന്നും റോഡുകളില് നിന്നുമാണ് മാലിന്യങ്ങള് നീക്കം ചെയ്തത്.
പാളയം മുതല് കിഴക്കേകോട്ട വരെയുള്ള പ്രധാന ശോഭായാത്ര വഴികളിലും അനുബന്ധ റോഡുകളിലും രൂപപ്പെട്ട പ്ലാസ്റ്റിക് അവശിഷ്ടങ്ങള്, ഉപേക്ഷിക്കപ്പെട്ട വെള്ളക്കുപ്പികള്, കടലാസുകള്, പ്ലേറ്റുകള് എന്നിവ പ്രത്യേക ശുചീകരണ സ്ക്വാഡുകള് പ്രത്യേക വാഹനവുമായെത്തി വേഗത്തില് ശേഖരിച്ചു. ഏഴ് മണിയോടെ കിഴക്കേക്കോട്ടയില് ശോഭായാത്ര അവസാനിച്ചപ്പോഴേക്കും സ്റ്റാച്ച്യു -ആയുർവേദ കോളെജ് ഭാഗങ്ങളില് വരെ റോഡും പരിസരവും വൃത്തിയാക്കിക്കഴിഞ്ഞിരുന്നു.
ഒരു മണിക്കൂറോളം നീണ്ട യാത്ര കടന്നുപോയതോടെ കുട്ടികള് കഴിച്ച ബിസ്കറ്റ് കവറുകള്, വെള്ളം കുടിച്ച പ്ലാസ്റ്റിക് കുപ്പികള്, അലങ്കാര വസ്തുക്കള്, ഐസ്ക്രീം കവറുകള് , ഭക്ഷണം പൊതിഞ്ഞെത്തിച്ച വാഴയില ഉള്പ്പടെ എംജി റോഡില് അവശേഷിച്ചിരുന്നു. ശേഖരിച്ച അജൈവ മാലിന്യങ്ങളും പ്ലാസ്റ്റിക് കുപ്പികളും പ്രത്യേകം തരംതിരിച്ച് പുനരുപയോഗ കേന്ദ്രങ്ങളിലേക്ക് മാറ്റും. ശോഭായാത്ര അവസാനിച്ചതിന് തൊട്ടുപിന്നാലെ തന്നെ ഗതാഗതതടസമില്ലാത്ത രീതിയില് റോഡുകള് പൂർവസ്ഥിതിയിലാക്കാൻ ശുചീകരണ വിഭാഗത്തിന് സാധിച്ചു. ജനലക്ഷങ്ങള് പങ്കെടുത്ത വലിയ ആഘോഷത്തിന് ശേഷവും ചുരുങ്ങിയ സമയം കൊണ്ട് നഗരത്തിലെ ശുചിത്വം ഉറപ്പാക്കിയ നഗരസഭാ ജീവനക്കാരുടെ പ്രവർത്തനത്തിന് നഗരവാസികളില് നിന്ന് വലിയ പ്രശംസയാണ് ലഭിക്കുന്നത്.
