കോട്ടയം: ഷുക്കൂർ വധക്കേസിലെ കോടതി വിധിയില് അപ്പീല് പോകണോ വേണ്ടയോ എന്ന കാര്യം തീരുമാനിക്കേണ്ടത് സർക്കാരും പ്രോസിക്യൂഷനുമാണെന്ന് സ്പീക്കർ തിരുവഞ്ചൂർ രാധാകൃഷ്ണൻ.
കേസില് പി. ജയരാജനെ വിമുക്തനാക്കിയ വിധിക്ക് പിന്നാലെ മാധ്യമങ്ങളോട് സംസാരിക്കുകയായിരുന്നു അദ്ദേഹം.
കോടതി വിധിയെ ചോദ്യം ചെയ്യുന്നത് ശരിയല്ലെന്നും വിധിയില് അഭിപ്രായവ്യത്യാസമുള്ളവർക്ക് നിയമപരമായി അപ്പീല് നല്കാനുള്ള സാധ്യതകള് നിലവിലുണ്ടെന്നും അദ്ദേഹം പറഞ്ഞു.
കേസിന്റെ അന്വേഷണം പൂർത്തിയാക്കി വിചാരണയ്ക്ക് ശേഷം കോടതി ഒരു നിഗമനത്തില് എത്തിയിരിക്കുകയാണ്. നിലവിലെ സാഹചര്യത്തില് ഈ വിധിക്ക് ഒരു അന്തിമരൂപമായിട്ടുണ്ട്. ഇനി അപ്പീല് പോകുന്ന കാര്യത്തില് ഭരണകൂടവും പ്രോസിക്യൂഷനുമാണ് തീരുമാനമെടുക്കേണ്ടത്. അതുവരെ കാത്തിരിക്കുകയല്ലാതെ മറ്റ് മാർഗങ്ങളില്ല.
പി. ജയരാജനെ അറസ്റ്റ് ചെയ്തത് രാഷ്ട്രീയ പ്രേരിതമാണെന്ന സി.പി.എം ആരോപണം അദ്ദേഹം തള്ളി. അന്നത്തെ സാഹചര്യത്തില് അന്വേഷണ ഉദ്യോഗസ്ഥർ കണ്ടെത്തിയ നിഗമനങ്ങളുടെ അടിസ്ഥാനത്തിലാണ് പ്രതികളെ നിശ്ചയിച്ചതും കേസ് ചാർജ് ചെയ്തതും. അന്വേഷണ ഏജൻസി കുറ്റക്കാരെന്ന് കണ്ടെത്തിയതിന് ശേഷമുള്ള സ്വാഭാവിക നടപടി മാത്രമായിരുന്നു അറസ്റ്റ്.
ഗൂഢാലോചന പൂർണ്ണമായി തെളിയിക്കാൻ കഴിഞ്ഞില്ലെന്ന ചോദ്യത്തിന്, 13 പേരെ കോടതി കുറ്റക്കാരായി കണ്ടെത്തിയിട്ടുണ്ടല്ലോ എന്നായിരുന്നു അദ്ദേഹത്തിന്റെ മറുപടി. രണ്ടുപേരെ ഒഴിവാക്കിയത് കോടതിയുടെ നിഗമനമാണ്. വിധിപ്പകർപ്പ് പുറത്തുവന്നതിന് ശേഷം മാത്രമേ അന്വേഷണത്തിലെ വിശദാംശങ്ങളെക്കുറിച്ച് കൃത്യമായി പറയാനാകൂ.
അന്നത്തെ ആഭ്യന്തര മന്ത്രി എന്ന നിലയില് അപ്പീല് പോകണമെന്ന ആഗ്രഹമുണ്ടോ എന്ന ചോദ്യത്തിന്, ഇപ്പോഴത്തെ തലത്തില് വ്യക്തിപരമായ ആഗ്രഹങ്ങള്ക്ക് പ്രസക്തിയില്ലെന്നും ബന്ധപ്പെട്ട വകുപ്പ് മന്ത്രിയും സർക്കാരുമാണ് ഇക്കാര്യത്തില് നിലപാട് വ്യക്തമാക്കേണ്ടതെന്നും അദ്ദേഹം പറഞ്ഞു.






