തിരുവനന്തപുരം: ശബരിമല സ്വർണക്കവർച്ചക്കേസില് പ്രോസിക്യൂഷൻ അനുമതി തേടി പ്രത്യേക അന്വേഷണസംഘം (SIT). സംസ്ഥാന പോലീസ് മേധാവിക്ക് ഇതുസംബന്ധിച്ച് SIT കത്ത് നല്കി.-
അന്വേഷണം ആരംഭിച്ച് ഒരു വർഷത്തിന് ശേഷമാണ് പ്രോസിക്യൂഷൻ അനുമതിക്കായി അന്വേഷണസംഘം നടപടി സ്വീകരിച്ചിരിക്കുന്നത്. കട്ടിളപ്പാളി കേസിലാണ് നിലവില് പ്രോസിക്യൂഷൻ അനുമതി തേടിയിരിക്കുന്നത്.
SIT നല്കിയ കത്ത് സംസ്ഥാന പോലീസ് മേധാവി ആഭ്യന്തര വകുപ്പിന് കൈമാറും. തുടർനടപടികളുടെ ഭാഗമായി ദേവസ്വം ബോർഡിനും കത്ത് കൈമാറും. പ്രോസിക്യൂഷൻ അനുമതി ലഭിക്കാൻ കുറഞ്ഞത് ഒരു മാസമെങ്കിലും വേണ്ടിവന്നേക്കുമെന്നാണ് സൂചന. അനുമതി ലഭിച്ച ശേഷമേ അന്തിമ കുറ്റപത്രം കോടതിയില് സമർപ്പിക്കാനാകൂ.
അന്വേഷണം തുടങ്ങി ആദ്യഘട്ടത്തില് വേഗത്തില് മുന്നോട്ടുപോയിരുന്ന കേസില് പിന്നീട് വലിയ കാലതാമസമുണ്ടായെന്ന വിമർശനം ശക്തമാണ്. ഹൈക്കോടതിയുടെ മേല്നോട്ടത്തിലായിരുന്നു ആദ്യഘട്ട അന്വേഷണം. സംസ്ഥാന പോലീസ് മേധാവി റിപ്പോർട്ട് നല്കണമെന്നതടക്കമുള്ള നിർദേശങ്ങളും ഹൈക്കോടതി അന്വേഷണസംഘത്തിന് നല്കിയിരുന്നു. ഇതിന്റെ അടിസ്ഥാനത്തില് മുൻ ദേവസ്വം ബോർഡ് പ്രസിഡന്റ് ഉള്പ്പെടെയുള്ളവർ അറസ്റ്റിലായിരുന്നു.
എന്നാല് പിന്നീട് അന്വേഷണം മന്ദഗതിയിലായെന്ന ആരോപണം ഉയർന്നു. തദ്ദേശ തെരഞ്ഞെടുപ്പിലെ രാഷ്ട്രീയ സാഹചര്യങ്ങള്ക്കു പിന്നാലെ അന്വേഷണം മെല്ലെപ്പോക്കിലായെന്നും ആരോപണമുണ്ട്. പുതിയ സർക്കാർ അധികാരത്തിലെത്തിയതോടെ അന്വേഷണം പൂർണമായും നിലച്ചുവെന്ന വിമർശനവും ഉയരുന്നുണ്ട്.
ഉണ്ണികൃഷ്ണൻ പോറ്റിയും മുൻ ദേവസ്വം മന്ത്രി കടകംപള്ളി സുരേന്ദ്രനും തമ്മിലുള്ള ബന്ധവും അന്വേഷണത്തിന്റെ ഭാഗമായിരുന്നു. ഇരുവരും തമ്മിലുള്ള സാമ്പത്തിക ഇടപാടുകളുടെ രേഖകള് ഉള്പ്പെടെ അന്വേഷണസംഘത്തിന് ലഭിച്ചിരുന്നു. ഉണ്ണികൃഷ്ണൻ പോറ്റിയുടെ വീട്ടില് കടകംപള്ളി സുരേന്ദ്രൻ നിരന്തരം സന്ദർശനം നടത്തിയിരുന്നതായും അന്വേഷണസംഘം കണ്ടെത്തിയിരുന്നു. ഇതിന്റെ അടിസ്ഥാനത്തില് കടകംപള്ളി സുരേന്ദ്രനെ പ്രതിചേർക്കാനുള്ള നീക്കവും നടന്നിരുന്നു.
എന്നാല് പിന്നീട് കടകംപള്ളി സുരേന്ദ്രനെ പ്രതിചേർക്കാനുള്ള നീക്കം ഉപേക്ഷിക്കുകയായിരുന്നു. ഇതിനുപിന്നാലെ അന്വേഷണ നടപടികള് കൂടുതല് മന്ദഗതിയിലായെന്നും വിമർശനമുണ്ട്. അന്വേഷണത്തിലെ കാലതാമസത്തില് ഹൈക്കോടതിയും പലതവണ അതൃപ്തി പ്രകടിപ്പിച്ചിരുന്നു.
നിലവില് കട്ടിളപ്പാളി കേസില് മാത്രമാണ് പ്രോസിക്യൂഷൻ അനുമതി തേടിയിരിക്കുന്നത്. ദ്വാരപാലക ശില്പങ്ങളുമായി ബന്ധപ്പെട്ട കേസില് തുടർനടപടികള്ക്ക് അന്വേഷണസംഘം ഇതുവരെ കടന്നിട്ടില്ല. തൊണ്ടിമുതല് കണ്ടെത്തുന്നതുള്പ്പെടെയുള്ള നിർണായക നടപടികളും വൈകുകയാണ്. ഇതോടെ കേസിന്റെ വിചാരണ നടപടികള് ആരംഭിക്കുന്നതിലും കാലതാമസമുണ്ടാകുമെന്ന ആശങ്ക ഉയരുന്നുണ്ട്.
ശബരിമല സ്വർണക്കവർച്ചക്കേസ് അട്ടിമറിക്കപ്പെടുകയാണെന്ന ആരോപണങ്ങള്ക്കിടെയാണ് ഒരു വർഷത്തിനുശേഷം പ്രോസിക്യൂഷൻ അനുമതിക്കായി SIT കത്ത് നല്കിയിരിക്കുന്നത്. അന്വേഷണം പൂർത്തിയാക്കി കുറ്റപത്രം സമർപ്പിക്കുന്നതിലും തുടർനടപടികളിലും ഇനിയും എത്രത്തോളം കാലതാമസമുണ്ടാകുമെന്നതാണ് ഇനി നിർണായകം.






