തിരുവനന്തപുരം: കടയുടമയുടെ പരിചയക്കാരനെന്ന വ്യാജേന വിവിധ വ്യാപാര സ്ഥാപനങ്ങളിലെത്തി പണം തട്ടുന്ന മധ്യവസ്കൻ ആറ്റിങ്ങലിലും തട്ടിപ്പിന് ശ്രമിച്ചതായി പരാതി.
കഴിഞ്ഞ ദിവസം പാലസ് റോഡ് ജംഗ്ഷന് സമീപമുള്ള വസ്ത്ര വ്യാപാര സ്ഥാപനത്തിലാണ് സംഭവം നടന്നത്. കടയുടമ കുഞ്ഞിനെ ആശുപത്രിയില്‍ കാണിക്കുന്നതിനായി പുറത്തുപോയ സമയത്ത് ഇവരുടെ മാതാവായിരുന്നു കടയിലുണ്ടായിരുന്നത്. ഈ സമയം കടയിലെത്തിയ മധ്യവസ്കൻ ഉടമയുടെ പരിചയക്കാരനാണെന്ന മട്ടില്‍ അമ്മയോട് പണം ആവശ്യപ്പെടുകയായിരുന്നു. ഉടമ എവിടെയാണെന്നും ഉടൻ തിരിച്ചെത്തുമോയെന്നും ഇയാള്‍ ചോദിച്ചു. പുറത്തുപോയതാണെന്ന് മറുപടി നല്‍കിയതോടെ ഉമയെ ഫോണില്‍ വിളിച്ച്‌ സംസാരിക്കാമെന്ന് പറഞ്ഞ് ഇയാള്‍ മാറിനിന്ന് ഫോണില്‍ സംസാരിക്കുന്നതായി അഭിനയിച്ച ശേഷം പണം ആവശ്യപ്പെടുകയായിരുന്നു. പേര് ചോദിച്ചപ്പോള്‍ രഞ്ജിത്ത് എന്നാണെന്ന് ഇയാള്‍ മറുപടി നല്‍കി. തുടർന്ന് ഉടമ പറഞ്ഞതാണെന്ന് അവകാശപ്പെട്ട് 17000 രൂപ മേശവലിപ്പിലുണ്ടെന്ന് ഇയാള്‍ അമ്മയോട് പറഞ്ഞു. എന്നാല്‍ മേശവലിപ്പ് പരിശോധിച്ചപ്പോള്‍ പണമൊന്നും കണ്ടെത്താനായില്ല.
ഇക്കാര്യം അമ്മ അറിയിച്ചതോടെ വൈകിട്ട് അഞ്ചിന് വീണ്ടും വരാമെന്നും അതുവരെ പണം എടുത്തുവെക്കണമെന്നും പറഞ്ഞ് ഇയാള്‍ കടയില്‍നിന്ന് മടങ്ങി. സംശയം തോന്നിയ അമ്മ മകളെ ഫോണില്‍ വിളിച്ച്‌ അന്വേഷിച്ചപ്പോഴാണ് ഇത്തരമൊരാളെ പരിചയമില്ലെന്ന വിവരം ലഭിച്ചത്. പിന്നാലെ സിസിടിവി പരിശോധിച്ചപ്പോഴാണ് കുപ്രസിദ്ധ തട്ടിപ്പുകാരൻ രാജേഷ് ജോർജ് ആണെന്ന് മനസിലായത്. കേരളത്തിലുടനീളം വ്യാപകമായി കടകളിലെത്തി സമാനരീതിയിലാണ് ഇയാള്‍ തട്ടിപ്പ് നടത്തുന്നത്. പൊലീസ് ഇയാള്‍ക്കെതിരെ അന്വേഷണം ആരംഭിച്ചിട്ടുണ്ട്. പല സ്ഥലത്ത് നിന്നും സമാനമായ രീതിയില്‍ ആയിരം മുതല്‍ ലക്ഷങ്ങള്‍ വരെയാണ് തട്ടിയെടുത്തത്.
മുമ്പ് സമാനമായി പിടിക്കപ്പെട്ടപ്പോള്‍ കടയ്ക്കല്‍ പൊലീസ് ചോദ്യം ചെയ്തതോടെയാണ് പത്തനംതിട്ട മല്ലപ്പള്ളി സ്വദേശി രാജേഷ് ജോർജിന്‍റെ വിവരങ്ങള്‍ പുറത്തുവരുന്നത്. കടയിലെത്തി ഉടമയെ അന്വേഷിക്കും. ഇല്ലെന്ന്‌പറഞ്ഞാല്‍ ഫോണ്‍ വിളിക്കുന്ന രീതിയില്‍ അഭിനയിക്കും. ഉടമയെന്ന് പറഞ്ഞ് ജീവനക്കാരില്‍ നിന്ന് പണം വാങ്ങി മുങ്ങുന്നതാണ് രീതി. നേരത്തെ ഇയാള്‍ ഒരു തടിമില്ലില്‍ തടി വാങ്ങാനെന്ന രീതിയിലെത്തി മേശവലിപ്പില്‍ നിന്ന് 1.90 ല ക്ഷം രൂപയും തട്ടിയെടുത്തിരുന്നു. നിരവധി തവണ ജയില്‍ വാസം അനുഭവിച്ചെങ്കിലും തട്ടിപ്പില്‍ നിന്ന് പിൻമാറുന്നില്ലെന്ന് പൊലീസ് പറയുന്നു. സിനിമാ പ്രൊഡക്ഷൻ എക്സിക്യൂട്ടീവാണെന്ന് വിശ്വസിപ്പിച്ച്‌ ആലപ്പുഴ കളർകോടുള്ള സ്വകാര്യ സ്ഥാപനജീവനക്കാരിയെ പീഡിപ്പിക്കാൻ ശ്രമിച്ചതിന്‌ രാജേഷിനെ അറസ്റ്റ് ചെയ്തിരുന്നു. മറ്റ് പലരോടും സിനിമയില്‍ അഭിനയിക്കാൻ അവസരമൊരുക്കാമെന്ന് പറഞ്ഞ് പണം തട്ടിയതായും പരാതികളുണ്ട്..
