കോട്ടയം: കാഴ്‌ചയില്‍ തന്നെ കൊതിപ്പിക്കുന്ന പലഹാരപ്പെട്ടികള്‍, സ്വാദൂറുന്ന ചായ, പോക്കറ്റിലൊതുങ്ങുന്ന വിലയും...
വഴി നീളെയുള്ള ബജിക്കടകളിലേക്ക്‌ ആളുകള്‍ ആകര്‍ഷിക്കപ്പെടുന്നതിന്റെ കാരണമിതൊക്കെയാണ്‌. പക്ഷേ, രൂചിയിലെ ആകര്‍ഷണീയത പാചകം ചെയ്യുന്ന എണ്ണയിലുണ്ടോ?. ബജിക്കടകളുടെ തട്ടുകളുടെയും എണ്ണം വര്‍ധിക്കുമ്പോള്‍ ആനുപാതികമായി പരിശോധനകള്‍ ഇല്ല. പല ഹോട്ടലുകളിലും സമാന അവസ്‌ഥയാണെന്ന പരാതിയുമുണ്ട്‌.
ഗ്രാമ, നഗര വ്യത്യാസമില്ലാതെ വഴികളിലെല്ലാം തട്ടുകടകളും ബജിക്കടകളുമുണ്ട്‌. ഉച്ചയോടെ പ്രവര്‍ത്തനം ആരംഭിക്കുന്ന ഇത്തരം കടകളിലെ പ്രധാന ആകര്‍ഷണം എണ്ണ പലഹാരങ്ങളാണ്‌. ഉഴുന്നുവടയും പരിപ്പുവടയും ഉള്ളിവടയും പഴംപൊരിയും ബോണ്ടയുമൊക്കെ കാഴ്‌ചയില്‍ തന്നെ ആളുകളെ ആകര്‍ഷിക്കും. മിക്കയിടങ്ങളിലും രുചിയിലും ഇവ മുന്നിലായിരിക്കും. ഓരോ കടകളിലും നൂറുകണക്കിനു പലഹാരങ്ങളാണ്‌ വിറ്റുപോകുന്നത്‌. പതിനായിരം രൂപയിലേറെ വിറ്റുവരവുള്ള നിരവധി ബജീക്കടകള്‍ ജില്ലയിലുണ്ട്‌.
ജില്ലയില്‍ നിന്നുള്ളവര്‍ക്കു പുറമേ, നിരവധി തമിഴ്‌നാട്‌ സ്വദേശികളും ഇത്തരം ബജിക്കടകള്‍ നടത്തുന്നു.
ഒരു കടയില്‍ പലതരം പലഹാരങ്ങളുണ്ടാക്കുമെങ്കിലും എല്ലാം ഒരേ എണ്ണയില്‍ തന്നെയാകും പാചകം ചെയ്യുക. അതാകട്ടെ, ദിവസങ്ങളോളം ഉപയോഗിച്ചതും. ഒരു തവണ തിളപ്പിച്ച എണ്ണം വീണ്ടും ചൂടാക്കുമ്പോള്‍ അപകടകാരിയായി മാറും. എന്നാല്‍, മിക്ക തട്ടുകടകളിലെയും ചീനച്ചട്ടി കഴുകുന്നതു പോലും ആഴ്‌ചയില്‍ ഒരിക്കലാണ്‌. തലേന്നു മിച്ചം വരുന്ന എണ്ണയില്‍ നിന്നു പലഹാര അവശിഷ്‌ടങ്ങള്‍ മാറ്റിയ ശേഷം പുതിയ എണ്ണ കൂടി ചേര്‍ത്ത്‌ പാചകം ആരംഭിക്കുന്നതാണു പതിവ്‌
ഇത്തരത്തില്‍ ഉപയോഗിക്കുന്നതാകട്ടെ ഗുണമേന്മ കുറഞ്ഞ എണ്ണയാണെന്ന പരാതിയുമുണ്ട്‌. സണ്‍ഫ്‌ളവര്‍ ഓയിലോ, പാംഓയിലോ മിക്ക കടകളിലും ഉപയോഗിക്കുന്നത്‌. മിക്ക കടകളിലെയും ചീനച്ചട്ടിയിലെ എണ്ണ കറുത്ത നിറത്തിലായിരിക്കും. എണ്ണയുടെ നിറം കറുപ്പാകുന്നതും നുര പൊങ്ങുന്നതും എരിഞ്ഞ ഗന്ധവുമൊക്കെ കേടായതിന്റെ ലക്ഷണങ്ങളാണ്‌. എന്നാല്‍, ഇതൊന്നും പരിഗണിക്കാതെ തുടര്‍ച്ചയായി പലഹാരമുണ്ടാക്കിക്കൊണ്ടേയിരിക്കും.
കോട്ടയത്ത് മറ്റൊരു തട്ടിപ്പും തട്ടുകടകൾക്ക് പിന്നിൽ നടക്കുന്നുണ്ട്. ഓരോ പ്രദേശത്തും തട്ടുകട തുടങ്ങി മറിച്ചു വിൽക്കുന്ന സംഘവും ഇവിടെയുണ്ട്. ഒന്നോ രണ്ടോമാസം പ്രവർത്തിപ്പിച്ചശേഷം ലക്ഷങ്ങൾക്ക് വിൽക്കുകയാണ് ഇവരുടെ രീതി. വഴിയോരം വളിച്ചെടുത്ത് വാടകയ്ക്ക് നൽകുന്നവരുമുണ്ട്.
ഒരു പ്രത്യേക സംഘം തന്നെ ഇതിനായി കോട്ടയത്ത് പ്രവർത്തനം തുടങ്ങിയിട്ടുണ്ട്.
