ദുബൈ: ലോകത്തിലെ ആദ്യ 24 കാരറ്റ് സ്വർണ നടപ്പാതയൊരുക്കി ദുബൈ. നീളമേറിയ ഈ അത്ഭുതപാത ദുബൈ ഗോള്‍ഡ് ഡിസ്ട്രിക്റ്റിലാണ് ഒരുങ്ങുന്നത്.
2026 അവസാനിക്കുന്നതിന് മുമ്പ് തന്നെ ഈ വിസ്മയപാത പൊതുജനങ്ങള്‍ക്കായി തുറന്നുകൊടുക്കുമെന്ന് അധികൃതർ അറിയിച്ചു. അടുത്ത രണ്ട് മാസത്തിനുള്ളില്‍ ഉദ്ഘാടനം ചെയ്യുമെന്ന് പ്രതീക്ഷിക്കുന്ന ഈ പദ്ധതി, ദുബൈയുടെ വിനോദസഞ്ചാര മേഖലയ്ക്ക് പുതിയൊരു നാഴികക്കല്ലാകും. ഇതോടെ, ദുബൈയുടെ ആഗോള സ്വർണ വ്യാപാര കേന്ദ്രമെന്ന നിലയിലുള്ള പദവിയും കൂടുതല്‍ ശക്തമാകും. 24 കാരറ്റ് സ്വർണത്തില്‍ നിർമിക്കുന്ന ഈ പാതയിലൂടെ നടക്കുന്ന അപൂർവ അനുഭവം സഞ്ചാരികള്‍ക്കും പ്രദേശവാസികള്‍ക്കും ലഭ്യമാകുമെന്ന് ദുബൈ ഗോള്‍ഡ് ഡിസ്ട്രിക്റ്റ് സീനിയർ ഡയറക്ടർ റാഷിദ് അല്‍ ഹർമൂദി വ്യക്തമാക്കി.
പശ്ചിമേഷ്യയിലെ ഏറ്റവും വലിയ സ്വർണ-ആഭരണ പ്രദർശന കേന്ദ്രമായി മാറാൻ ഒരുങ്ങുന്ന ദുബൈ ഗോള്‍ഡ് ഡിസ്ട്രിക്റ്റില്‍ വ്യാപാര സ്ഥാപനങ്ങളുടെ എണ്ണത്തില്‍ വൻ വർധനവാണ് രേഖപ്പെടുത്തുന്നത്. 2026 മുതല്‍ ഹോള്‍സെയില്‍ സ്വർണ വ്യാപാര സ്ഥാപനങ്ങളുടെ എണ്ണത്തില്‍ 20 ശതമാനം വർദ്ധനവുണ്ടായി. സ്വർണം, ആഭരണങ്ങള്‍, അപൂർവ രത്നങ്ങള്‍, ആഡംബര വാച്ചുകള്‍ എന്നിവ വില്‍ക്കുന്ന പുതിയ റീട്ടെയ്ല്‍ ഷോപ്പുകളുടെ എണ്ണത്തില്‍ 15 ശതമാനം വളർച്ചയും രേഖപ്പെടുത്തി. വരും വർഷത്തില്‍ 10 മുതല്‍ 20 ശതമാനം വരെ കൂടുതല്‍ അന്താരാഷ്ട്ര കമ്പനികള്‍ ഗോള്‍ഡ് ഡിസ്ട്രിക്റ്റിലേക്ക് തങ്ങളുടെ പ്രവർത്തനം വ്യാപിപ്പിക്കുമെന്നാണ് പ്രതീക്ഷിക്കുന്നത്.
