ഗുവാഹത്തി: എംജി ഇന്ത്യൻ സൂപ്പർ ലീഗ് സീസണിലെ തങ്ങളുടെ രണ്ടാം മത്സരത്തില്‍ കേരള ബ്ലാസ്റ്റേഴ്സ് എഫ്‌സി ഇന്ന് നോർത്ത് ഈസ്റ്റ് യുണൈറ്റഡ് എഫ്‌സിയെ നേരിടും.
ഗുവാഹത്തിയിലെ ഇന്ദിരാഗാന്ധി അത്‌ലറ്റിക് സ്റ്റേഡിയത്തില്‍ രാത്രി 7:30-നാണ് കിക്ക് ഓഫ്. സീസണ്‍ ഓപ്പണറില്‍ ഇന്‍റർ കാശിക്കെതിരെ എതിരില്ലാത്ത രണ്ട് ഗോളുകളുടെ ആധികാരിക ജയം നേടിയാണ് ബ്ലാസ്റ്റേഴ്സ് രണ്ടാം പോരാട്ടത്തിനെത്തുന്നത്. ക്യാപ്റ്റൻ വിബിൻ മോഹനനും അരങ്ങേറ്റ താരം ആന്ദ്രെ ഗ്രീനും ലക്ഷ്യം കണ്ട മത്സരത്തില്‍ ജയത്തോടെ പോയിന്‍റ് പട്ടികയില്‍ ഒന്നാമതെത്താനും ബ്ലാസ്റ്റേഴ്സിനായി.
ആന്ദ്രെ ഗ്രീൻ, ജെയിംസ് ബോള്‍ട്ടണ്‍, നെബോജ്ഷ കൊസോവിച്ച്‌, മുഹമ്മദ് സനാൻ, മോമോ യാൻസാനെ, പോള്‍ റാംഫാങ്സൗവ, സുമിത് ശർമ്മ എന്നിവരുടെ അരങ്ങേറ്റത്തിനും ആദ്യ മത്സരം സാക്ഷ്യം വഹിച്ചിരുന്നു. കൊല്‍ക്കത്തയിലെ മൂന്ന് ദിവസത്തെ തീവ്ര പരിശീലനത്തിന് ശേഷമാണ് ടീം ഗുവാഹത്തിയിലെത്തിയത്.
മറുവശത്ത് കരുത്തരായ മോഹൻ ബഗാൻ സൂപ്പർ ജയന്‍റിനെ 1-0 ന് തോല്‍പ്പിച്ചതിന്‍റെ കരുത്തിലാണ് ജുവാൻ പെഡ്രോ ബെനാലിയുടെ കീഴിലിറങ്ങുന്ന നോർത്ത് ഈസ്റ്റ് യുണൈറ്റഡ് എത്തുന്നത്. ജിതിൻ എംഎസ്, അലാദ്ദീൻ അജറൈ എന്നിവരുടെ മുന്നേറ്റങ്ങളും പ്രതിരോധത്തില്‍ അഷീർ അക്തറും ഗോള്‍വലയ്ക്ക് മുന്നില്‍ ഗുർമീത് സിംഗും അടങ്ങുന്നതാണ് അവരുടെ കരുത്ത്.
നോര്‍ത്ത് ഈസ്റ്റ് ഹോം ടീം ആയതുകൊണ്ടുതന്നെ സ്വന്തം തട്ടകത്തില്‍ ആക്രമിച്ച്‌ കളിക്കാനാവും ശ്രമിക്കുകയെന്ന് ബ്ലാസ്റ്റേഴ്സ് പരിശീലകന്‍ ആഷ്‌ലി വെസ്റ്റ്വുഡ് പറഞ്ഞു. കഴിഞ്ഞ കളിയില്‍ മികച്ച വിജയം നേടിയതിനാല്‍ അവർക്ക് ആത്മവിശ്വാസം കൂടുതലായിരിക്കും, കളത്തില്‍ പൂർണ്ണ അച്ചടക്കത്തോടെയും ഒത്തിണക്കത്തോടെയും പൊരുതി മികച്ച പ്രകടനം പുറത്തെടുക്കുക എന്നതാവും ഞങ്ങളുടെ ദൗത്യം.ആദ്യ കളിയില്‍ നമ്മള്‍ ജയിച്ചെങ്കിലും ഇനിയും ഒരുപാട് കാര്യങ്ങള്‍ മെച്ചപ്പെടാനുണ്ട്. ക്ലീൻ ഷീറ്റ് സ്വന്തമാക്കാനും ഗോളുകള്‍ നേടാനും സാധിച്ചതും താരങ്ങള്‍ പൂർണ്ണ ഫിറ്റ്നസോടെ 90 മിനിറ്റും കളത്തിലിറങ്ങിയതും തീർച്ചയായും വലിയ പോസിറ്റീവുകളാണെന്നും വെസ്റ്റ്വുഡ് വ്യക്തമാക്കി.
ആദ്യ മത്സരത്തില്‍ ക്ലീൻ ഷീറ്റ് നേടാനായത് മികച്ചൊരു തുടക്കമാണെന്ന് പ്രതിരോധ താരം ഐബൻ ഡോഹ്ലിംഗ് വ്യക്തമാക്കി. പുതിയ താരങ്ങള്‍ എത്തിയതോടെ പരസ്പരം സഹായിച്ച്‌ പ്രതിരോധം കൂടുതല്‍ ശക്തമാക്കാനാണ് ഞങ്ങള്‍ ശ്രമിക്കുന്നത്. പരിചയസമ്പന്നനായ ജെയിംസ് ബോള്‍ട്ടനെ പോലെയൊരു കളിക്കാരന്‍റെ സാന്നിധ്യം കളത്തിനകത്തും പുറത്തും ഞങ്ങള്‍ക്ക് വലിയൊരു കരുത്ത് തന്നെയാണ് . ഒത്തിണക്കത്തോടെ വീണ്ടും ക്ലീൻ ഷീറ്റ് നിലനിർത്തുക തന്നെയാണ് ബ്ലാസ്റ്റേഴ്സിന്‍റെ ലക്ഷ്യമെന്നും ഐബൻ ഡോഹ്ലിംഗ് പറഞ്ഞു.
ഇന്ത്യൻ സൂപ്പർ ലീഗില്‍ ഇതുവരെ 25 തവണയാണ് ഇരുടീമുകളും നേർക്കുനേർ ഏറ്റുമുട്ടിയിട്ടുള്ളത്. ഇതില്‍ ഒൻപത് വിജയങ്ങളുമായി മുൻതൂക്കം കേരള ബ്ലാസ്റ്റേഴ്‌സിനാണ്. ആറ് മത്സരങ്ങളില്‍ നോർത്ത് ഈസ്റ്റ് യുണൈറ്റഡ് വിജയിച്ചപ്പോള്‍, പത്ത് മത്സരങ്ങള്‍ സമനിലയില്‍ കലാശിച്ചു. കൊച്ചിയില്‍ കഴിഞ്ഞ തവണ ഇരു ടീമുകളും ഏറ്റുമുട്ടിയപ്പോള്‍ 1-1 എന്ന നിലയില്‍ സമനിലയിലാണ് മത്സരം അവസാനിച്ചത്. ഗുവാഹത്തിയില്‍ വീണ്ടും ഇരു ടീമുകളും നേർക്കുനേർ എത്തുമ്പോള്‍ മത്സരം കൂടുതല്‍ വാശിയേറിയതാകുമെന്നുറപ്പാണ്.
