ണ്ണൂർ: പാർട്ടിയിലെ സംഘടനാപരമായ കാര്യങ്ങള്‍ പരസ്യമായി പറയാതെ അകത്തുതന്നെ സംസാരിക്കണമെന്നാണ് തന്റെ നിലപാടെന്ന് മന്ത്രി സണ്ണി ജോസഫ്.
കേരളത്തിലെ സംഘടനാ കാര്യങ്ങള്‍ ഡല്‍ഹിയില്‍ പോയി ദേശീയ നേതൃത്വത്തോട് വ്യക്തമാക്കും. വിഷയത്തില്‍ കെ സി വേണുഗോപാല്‍ സ്വീകരിച്ച നിലപാട് തന്നെയാണ് തനിക്കുമുള്ളതെന്നും ഇത് അടൂർ പ്രകാശിന് മാത്രമല്ല, പാർട്ടിയിലെ എല്ലാവർക്കും ഒരുപോലെ ബാധകമാണെന്നും സണ്ണി ജോസഫ് ഓർമ്മിപ്പിച്ചു.
സിപിഐഎം നേതാവ് നന്ദകുമാർ നടത്തിയത് മലപ്പുറത്തിനെതിരായ കടുത്ത വിദ്വേഷ പ്രതികരണമാണെന്നും നേരത്തെ മുൻ മുഖ്യമന്ത്രി പിണറായി വിജയനും സമാനമായ പ്രസ്താവന നടത്തിയിട്ടുണ്ടെന്നും സണ്ണി ജോസഫ് പറഞ്ഞു. മലപ്പുറത്തിനെതിരായ ഇത്തരം പരാമർശങ്ങള്‍ സി പി എമ്മിന്റെ തന്ത്രത്തിന്റെ ഭാഗമാണ്. വിഷയം തിരുത്താൻ നന്ദകുമാറോ സിപിഐഎമ്മോ തയ്യാറാകുന്നില്ലെന്ന് വ്യക്തമാക്കിയ അദ്ദേഹം, തിരുത്തലിന്റെ അല്ല മറിച്ച്‌ ആവർത്തനത്തിന്റെ പാതയിലാണ് സി പി എം എന്നും വിമർശിച്ചു. സിപിഐഎമ്മിന്റെ നിലപാട് വൈരുധ്യം നിറഞ്ഞതാണെന്നും സണ്ണി ജോസഫ് അഭിപ്രായപ്പെട്ടു.
തിരുവനന്തപുരത്ത് പൊലീസ് ഉദ്യോഗസ്ഥന്റെ വീട്ടിലേക്ക് നടന്ന ഡി വൈ എഫ് ഐ പ്രതിഷേധ മാർച്ചിനെയും സണ്ണി ജോസഫ് വിമർശിച്ചു. കേസില്‍ പോലീസിന്റെ നടപടിയെ വ്യക്തിപരമായി കാണേണ്ടതില്ലെന്ന് പറഞ്ഞ അദ്ദേഹം, പൊലീസുകാരെ ഭീഷണിപ്പെടുത്തി വരുതിക്ക് നിർത്താമെന്ന് ആരും കരുതേണ്ടതില്ലെന്നും കൂട്ടിച്ചേർത്തു. പൊലീസിന്റെ ഭാഗത്ത് എന്തെങ്കിലും തരത്തിലുള്ള വീഴ്ചകള്‍ ഉണ്ടായിട്ടുണ്ടെങ്കില്‍ അത് പരിശോധിക്കേണ്ടത് ആഭ്യന്തര വകുപ്പാണെന്നും അദ്ദേഹം ചൂണ്ടിക്കാട്ടി.
