തിരുവനന്തപുരം: സർക്കാർ ആശുപത്രികളില് മുഴുവൻസമയ സ്പെഷ്യലിസ്റ്റ് സേവനം ഉറപ്പാക്കാനുള്ള പദ്ധതി തുടക്കത്തിലേ പാളി.
പൈലറ്റ് അടിസ്ഥാനത്തില് പദ്ധതി തുടങ്ങിയ പുനലൂർ താലൂക്ക് ആശുപത്രിയില് പോലും ആവശ്യത്തിന് ഡോക്ടമാരെ നിയമിക്കാനായില്ല. സ്പെഷ്യലിസ്റ്റ് സേവനത്തിനായി ഡോക്ടർമാരെ പുനർവിന്യസിക്കുന്നതിനെതിരായ പ്രാദേശിക രാഷ്ട്രീയതാത്പര്യങ്ങള് തിരിച്ചടിയാവുകയാണ്.
അധിക തസ്തികകളില്ലാതെ പദ്ധതി നടപ്പാക്കാനാവില്ലെന്ന അനുമാനത്തിലാണ് വകുപ്പ്. മെഡിക്കല് കോളെജ് ആശുപത്രികളിലെ ചികിത്സാ ഭാരം കുറയ്ക്കാനും, രോഗികള്ക്ക് വേഗത്തില് സ്പെഷ്യലിസ്റ്റ് സേവനം ഉറപ്പാക്കാനും ലക്ഷ്യമിട്ടായിരുന്നു സർക്കാർ പദ്ധതി. ജില്ലാ, ജനറല് ആശുപത്രികളില് പ്രധാന സ്പെഷ്യലിസ്റ്റ് വിഭാഗങ്ങളില് മുഴുവൻ സമയ സേവനം ഉറപ്പാക്കുന്നതായിരുന്നു ലക്ഷ്യം.
പദ്ധതിക്ക് തുടക്കമിട്ടത്, പുനലൂർ താലൂക്ക് ആശുപത്രിയില്. പുനലൂർ ആശുപത്രിയിലേക്ക് പുനർവിന്യസിക്കപ്പെട്ടത് ജില്ലയിലെ മറ്റ് ആശുപത്രികളിലുണ്ടായിരുന്ന സ്പെഷ്യലിസ്റ്റുമാർ ആയിരുന്നു. 15 പേരെ വേണ്ടയിടത്ത് എട്ട് പേരെയാണ് പദ്ധതിക്കായി നിയമിച്ചത്. കുണ്ടറ താലൂക്ക് ആശുപത്രിയില് നിന്ന് ഡോക്ടർമാരെ മാറ്റിയതില് എതിർപ്പുയർന്നു. ഇതോടെ കൂടുതല് ഡോക്ടർമാരെ പുനർവിന്യസിക്കാനായില്ല. മലപ്പുറത്ത് പദ്ധതി തുടങ്ങേണ്ടിയിരുന്നത് തിരൂർ, നിലമ്പൂർ ആശുപത്രികളില്. മെഡിക്കല് കോളേജായി മാറിയ മഞ്ചേരി ആശുപത്രിയില് നിന്ന് അധിക ജീവനക്കാരെ പുനർവിന്യസിക്കാനായിരുന്നു നീക്കം.
പദ്ധതിയുടെ സ്പെഷ്യല് ഓഫീസർ ഇതിനായി സന്ദർശനം നടത്തി. ഡോക്ടർമാരെ മാറ്റുന്നതില് രാഷ്ട്രീയ എതിർപ്പുയർന്നതോടെ ആ നീക്കവും നടത്തില്ല. പുനലൂരിന് പുറമേ, ഒരു ആശുപത്രിയില് പോലും ഒരു മാസം പിന്നിട്ടിട്ടും പദ്ധതി നടപ്പാക്കാനായിട്ടില്ല. പാലക്കാട് ജില്ലാ ആശുപത്രിയും വടകര ആശുപത്രിയുമാണ് അടുത്തതായി പരിഗണനയിലുള്ളത്. ഈ ആശുപത്രികളില് പദ്ധതി നടത്തിപ്പിനുള്ള പ്ലാനായിട്ടില്ല.
ആറ് മാസത്തിനുള്ളില് സംസ്ഥാനത്തെല്ലാ ജില്ലാ, ജനറല് ആശുപത്രികളും പദ്ധതി നടപ്പാക്കണമെന്നായിരുന്നു ലക്ഷ്യം. ഒരു ആശുപത്രി പോലും ഇതുവരെ പൂർണസജ്ജമായിട്ടില്ല. ഡോക്ടർമാരുടെ സംഘടനയുടെ നിസ്സഹകരണവും, രാഷ്ട്രീയ സമ്മർദ്ദവും തുടക്കത്തിലേ പദ്ധതിയെ തളർത്തി.
