മുറിയിലെ വെളിച്ചം കെടുത്തി പൂർണ്ണമായ ഇരുട്ടില്‍ ഉറങ്ങാൻ ഇഷ്ടപ്പെടുന്നവരായിരിക്കും നമ്മളില്‍ പലരും. എന്നാല്‍ രാത്രിയില്‍ വെളിച്ചം ഇട്ട് ഉറങ്ങാൻ ശീലമുള്ളവരും ചുറ്റിലുമുണ്ടാകും.
അത്തരക്കാർ ഇക്കാര്യം ഒന്ന് ശ്രദ്ധിക്കുന്നത് നന്നായിരിക്കും കാരണം രാത്രിയില്‍ ലൈറ്റ് ഇട്ട് ഉറങ്ങുന്നത് ആരോഗ്യത്തിന് ഹാനികരമാണെന്നാണ് ഹാർവാർഡ് സർവകലാശാലയുടെ പുതിയ പഠനറിപ്പോർട്ടുകള്‍ വ്യക്തമാക്കുന്നത്.
രാത്രിയില്‍ ലൈറ്റിട്ട് ഉറങ്ങുന്നത് ഹൃദയസംബന്ധമായ പ്രശ്‌നങ്ങള്‍ ഉണ്ടാകാൻ സാധ്യത ഉണ്ടെന്നാണ് പഠനങ്ങള്‍. കൃത്രിമ വെളിച്ചം തലച്ചോറിന്റെ സമ്മർദ്ദം വർദ്ധിപ്പിക്കുകയും രക്തക്കുഴലുകളില്‍ വീക്കം ഉണ്ടാക്കുകയും ചെയ്യുമെന്നും ഇത് ഹൃദയ സംബന്ധമായ രോഗങ്ങള്‍ക്കുള്ള സാധ്യത വർധിപ്പിക്കുമെന്നും പഠനത്തില്‍ പറയുന്നു. രാത്രികാല പ്രകാശ മലിനീകരണം എങ്ങനെയാണ് ഹൃദ്രോഗത്തിന് ഉള്ള സാധ്യത വർധിപ്പിക്കുന്നത് എന്നതിലാണ് ഗവേഷകർ പഠനം നടത്തിയത്. 2005 നും 2018 നും ഇടയില്‍ ശരാശരി 55 വയസ് പ്രായമുള്ള 466 മുതിർന്നവരില്‍ ആണ് പഠനം നടത്തിയത്.
പത്ത് വർഷം നീണ്ടുനിന്ന പഠനത്തില്‍ ഇവരുടെ വീടുകളിലെ കൃത്രിമ വെളിച്ചത്തിൻ്റെ അളവ് അളക്കുകയും ഹൃദയസംബന്ധമായ രോഗങ്ങള്‍ ഉണ്ടായോ എന്ന്പരിശോധിക്കുകയും ചെയ്തു. ഇതില്‍ 17 ശതമാനം പേർക്ക് ഗുരുതരമായ ഹൃദയപ്രശ്‌നങ്ങള്‍ ഉണ്ടായെന്ന് കണ്ടെത്തി. രാത്രിയില്‍ ഉയർന്ന അളവിലുള്ള കൃത്രിമ വെളിച്ചം ലഭിച്ചവരിലാണ് തലച്ചോറിൻ്റെ സമ്മർദ്ദം കൂടുകയും ധമനികളില്‍ വീക്കം വർദ്ധിക്കുകയും ചെയ്തത്. രാത്രി ലൈറ്റിട്ട് ഉറങ്ങുന്നത് അല്‍ഷിമേഴ്‌സ് രോഗസാധ്യത വർധിപ്പിക്കുമെന്നും മുൻപ് നടത്തിയ പഠനങ്ങളില്‍ പറയുന്നു. കൃത്രിമ വെളിച്ചം ശരീരത്തിന്റെ സർക്കാർഡിയൻ താളത്തെ തടസ്സപ്പെടുത്തുന്നതാണ് ഇത്തരം ആരോഗ്യ പ്രശ്നങ്ങള്‍ക്ക് കാരണം. ഇത് ഉറക്കത്തിന്റെ ഗുണനിലവാരം കുറയ്ക്കുകയും ഉറക്കമില്ലായ്മയിലേക്ക് നയിക്കുകയും ചെയ്യും.
ഇതിന് പരിഹാരമായി ചില കാര്യങ്ങള്‍ നമുക്ക് ചെയ്യാനാകും. കിടപ്പുമുറികള്‍ കഴിയുന്നത്ര ഇരുണ്ടതാക്കുക എന്നതാണ് ഒന്നാമത്തെ കാര്യം. പുറത്തുനിന്നുള്ള വെളിച്ചം കടക്കാതിരിക്കാൻ ബ്ലാക്ക് ഔട്ട് കർട്ടനുകള്‍ ഉപയോഗിക്കുന്നതും ഇത്തരം പ്രശ്നങ്ങളില്‍ നിന്ന് രക്ഷനേടാൻ സഹായിക്കും. മാത്രമല്ല ഉറങ്ങുന്നതിന് മുൻപ് ഫോണുകള്‍, ടാബ് ലെറ്റുകള്‍, ടിവികള്‍ തുടങ്ങിയ സ്‌ക്രീനുകള്‍ ഉപയോഗിക്കുന്നത് ഒഴിവാക്കുന്നതാകും ഉചിതം.
