തൃശൂർ: മാസപ്പടികേസുമായി ബന്ധപ്പെട്ട് ബിജെപി നേതാവ് ഷോണ് ജോർജ് സിഎംആർഎല് കമ്പനി ഉടമ ശശിധരൻ കർത്തയുടെ ഡയറി പുറത്തുവിട്ട സംഭവത്തില് ബിജെപിയില് അതൃപ്തി.
ഡയറിയില് ബിജെപി നേതാവ് വി മുരളീധരന്റെ പേര് വന്നതാണ് തിരിച്ചടിയായത്.
സംസ്ഥാന നേതൃത്വത്തോട് ആലോചിക്കാതെ ഷോണ് സ്വന്തം താല്പ്പര്യപ്രകാരം വാർത്താസമ്മേളനം നടത്തി വിവരങ്ങള് പുറത്തുവിട്ടതാണ് ബിജെപിയുടെ അതൃപ്തിയ്ക്ക് കാരണമെന്നാണ് സൂചന. സംഭവത്തില് പാർട്ടിയിലെ വി മുരളീധരൻ പക്ഷവും കൃഷ്ണദാസ് വിഭാഗവും അമർഷം രേഖപ്പെടുത്തിയിട്ടുണ്ട്. ഷോണിന്റെ ഈ എടുത്തുചാട്ടം പാർട്ടിയെ അനാവശ്യ രാഷ്ട്രീയ വിവാദങ്ങളിലേക്ക് വലിച്ചിഴച്ചുവെന്ന ആരോപണവും ശക്തമാണ്.
സിഎംആർഎല് എംഡി ശശിധരൻ കർത്തയുടെ ഡയറിയിലെ വിവരങ്ങള് പുറത്തുവിട്ടതിലൂടെ എല്ഡിഎഫ്-യുഡിഎഫ് നേതാക്കളെ പ്രതിക്കൂട്ടിലാക്കാൻ ആയിരുന്നു ഷോണ് ജോർജ് ലക്ഷ്യമിട്ടത്. എന്നാല് ഈ ഡയറില് മുതിർന്ന ബിജെപി നേതാവ് വി മുരളീധരന്റെ പേര് പുറത്തുവന്നതോടെയാണ് സംഭവം ബിജെപിക്ക് തിരിച്ചടിയായത്.
സംഭവം വിവാദമായതിന് പിന്നാലെ പ്രതികരണവുമായി വി മുരളീധരൻ കഴിഞ്ഞദിവസം രംഗത്തെത്തിയിരുന്നു. ഡയറിയിലെ തന്റെ പേര് നിഷേധിച്ച മുരളീധരൻ ആകെ ഒരു മുരളീധരൻ മാത്രമേ ബിജെപിയില് ഉള്ളോ എന്നും വേറെയും മുരളീധരന്മാരുണ്ടെന്നും പ്രതികരിച്ചിരുന്നു. ഷോണ് ജോർജ് വെട്ടിലാക്കിയോ എന്ന മാദ്ധ്യമങ്ങളുടെ ചോദ്യത്തിന് ഷോണ് ജോർജ് വെട്ടിലാക്കിയാല് അതില് വീഴുന്ന ആളല്ല താനെന്നായിരുന്നു അദ്ദേഹത്തിന്റെ മറുപടി. സിഎംആർഎല്ലിന് എതിരെ സമരം നടത്തിയ വ്യക്തിയാണ് താനെന്നും പണം വാങ്ങിയിട്ടില്ലെന്നും വി മുരളീധരൻ വ്യക്തമാക്കിയിരുന്നു.
എന്നാല് ഇന്ന് ഷോണ് ജോർജ് പുറത്തുവിട്ട ഡയറിയുടെ ആധികാരികതയെ കുറിച്ച് തന്നോടല്ല അദ്ദേഹത്തോടെ തന്നെ ചോദിക്കണമെന്നാണ് വി മുരളീധരന്റെ പ്രതികരണം. എന്തിനാണ് രേഖ പുറത്തുവിട്ടതെന്ന് ഷോണ് ജോർജ് വ്യക്തമാക്കണമെന്നും അദ്ദേഹം ആവശ്യപ്പെട്ടു. ഇതോടെയാണ് പാർട്ടിക്കുള്ളിലെ അതൃപ്തി പരസ്യമായത്.
