തിരുവനന്തപുരം: പെരുമാതുറയിലെ ഹോട്ടലില്‍ വച്ച്‌ സഹോദരങ്ങളെ അധിക്ഷേപിക്കുകയും വെട്ടിപ്പരിക്കേല്പിക്കുകയും ചെയ്ത സംഭവത്തില്‍ പ്രധാന പ്രതി അറസ്റ്റില്‍.
ഇന്നലെ പുലർച്ചെ പെരുമാതുറ സ്വദേശികളായ സദ്ദാം ധാരിക് (29), സഹോദരൻ സദ്ദാം ഹുസൈൻ (31)എന്നിവർക്ക് നേരെ ആക്രമണം നടത്തിയ വെട്ടുതറ സ്വദേശി സ്റ്റീഫനെ(22)യാണ് പൊലീസ് പിടികൂടിയത്.
മുതലപ്പൊഴിക്ക് സമീപം ഹോട്ടലില്‍ ഭക്ഷണം കഴിക്കാനെത്തിയ സഹോദരങ്ങളെ അവിടെയുണ്ടായിരുന്ന അഞ്ചംഗ സംഘം അകാരണമായി അസഭ്യം വിളിക്കുകയും അധിക്ഷേപിക്കുകയുമായിരുന്നു. ഇതേക്കുറിച്ച്‌ ചോദ്യം ചെയ്‌തതില്‍ പ്രകോപിതരായ പ്രതികള്‍ മേശപ്പുറത്തിരുന്ന ചായഗ്ലാസ് സദ്ദാം ധാരിക്കിന്‍റെ തലയ്ക്കടിച്ചു പരിക്കേല്പിച്ചു. അടി കൊണ്ട് താഴെ വീണ ഇയാളെ ഒന്നാം പ്രതി സ്റ്റീഫൻ വാളുകൊണ്ട് തലയില്‍ വെട്ടാൻ ശ്രമിച്ചപ്പോള്‍ സദ്ദാം ഹുസൈൻ തടയുകയായിരുന്നു. ഇതിനിടെയാണ് സദ്ദാം ഹുസൈന്‍റെ വലതു കൈക്ക് ഗുരുതരമായി വെട്ടേറ്റത്.
അസ്ഥിക്ക് പൊട്ടലുമുണ്ട്. സ്റ്റീഫനും കണ്ടാലറിയാവുന്ന മറ്റ് നാലുപേർക്കെതിരെയാണ് വധശ്രമം ഉള്‍പ്പെടെയുള്ല വകുപ്പുകള്‍ ചുമത്തി കേസെടുത്തത്. കൂടുതല്‍ അറസ്റ്റുണ്ടാകുമെന്ന് പൊലീസ് പറഞ്ഞു.
