തിരുവനന്തപുരം: വിവാദ യൂട്യൂബർ ഷാജൻ സ്‌കറിയയ്‌ക്കെതിരെ മുൻ ആരോഗ്യമന്ത്രിമാരായ കെ.കെ ശൈലജയും വീണാ ജോർജും നിയമനടപടികളുമായി രംഗത്ത്.
അപകീർത്തികരമായ വീഡിയോ നിർമിച്ച്‌ പ്രചരിപ്പിച്ചതിനെതിരെ ഒരു കോടി രൂപ വീതം നഷ്ടപരിഹാരം ആവശ്യപ്പെട്ട് ഇരുവരും വക്കീല്‍ നോട്ടീസ് അയച്ചു. അഡ്വ. എ.രാജേഷ് മുഖേനയാണ് ഷാജൻ സ്‌കറിയയ്ക്കും അദ്ദേഹത്തിൻ്റെ സ്ഥാപനമായ മറുനാടൻ മലയാളിക്കുമെതിരെ നോട്ടീസ് അയച്ചത്.
നവംബർ ആറിന് മറുനാടൻ മലയാളി പ്രസിദ്ധീകരിച്ച '3000 കോടി കട്ട് വീണയും ശൈലജയും' എന്ന വാർത്ത വ്യാജവും അടിസ്ഥാനരഹിതവുമാണെന്ന് ആരോപിച്ചാണ് നിയമനടപടി. അപകീർത്തികരമായ വീഡിയോ ഉടൻ പിൻവലിക്കണമെന്നും പരസ്യമായി മാപ്പ് പറയണമെന്നും ഇരുവരും ആവശ്യപ്പെട്ടു.
വീഡിയോ യൂട്യൂബ് ഉള്‍പ്പെടെ എല്ലാ പ്ലാറ്റ്‌ഫോമുകളില്‍ നിന്നും നീക്കം ചെയ്യണമെന്നും സമാനമായ പ്രചാരണങ്ങള്‍ ഇനി നടത്തില്ലെന്ന് രേഖാമൂലം ഉറപ്പ് നല്‍കണമെന്നും നോട്ടീസില്‍ വ്യക്തമാക്കിയിട്ടുണ്ട്.
ഏഴ് ദിവസത്തിനകം ആവശ്യങ്ങള്‍ അംഗീകരിച്ചില്ലെങ്കില്‍ ഉത്തരവാദികളായ എല്ലാവർക്കുമെതിരെ സിവില്‍, ക്രിമിനല്‍ നിയമനടപടികളുമായി മുന്നോട്ടുപോകുമെന്നും നോട്ടീസില്‍ മുന്നറിയിപ്പ് നല്‍കി.
ഭാരതീയ ന്യായ സംഹിത 2023-ലെ വകുപ്പ് 356 പ്രകാരമുള്ള അപകീർത്തിക്കുറ്റത്തിന്റെ പരിധിയില്‍ വരുന്നതാണ് ഈ പ്രവൃത്തികളെന്നും നോട്ടീസില്‍ ചൂണ്ടിക്കാട്ടുന്നു. ഷാജൻ സ്‌കറിയ ഒന്നാം എതിർകക്ഷിയും മറുനാടൻ മലയാളി രണ്ടാം എതിർകക്ഷിയുമാണ്. യൂട്യൂബ് റെസിഡന്റ് ഗ്രീവൻസ് ഓഫീസർ സൂരജ് റാവുവാണ് മൂന്നാം എതിർകക്ഷി.
