കോട്ടയം: മഹാത്മഗാന്ധി സർവകലാശാലാ യൂണിയൻ തിരഞ്ഞെടുപ്പ് സമയബന്ധിതമായി പ്രഖ്യാപിക്കാൻ വൈസ് ചാൻസലറും സിൻഡിക്കറ്റും തയാറാകണമെന്ന് എസ്.എഫ്.ഐ എം.ജി സർവകലാശാലാ സബ് കമ്മിറ്റി ആവശ്യപ്പെട്ടു.
തിരഞ്ഞെടുപ്പുമായി ബന്ധപ്പെട്ട ഫയല്‍ വി.സി സിൻഡിക്കറ്റിന്റെ പരിഗണനയ്ക്കായി വിട്ടിരിക്കുകയാണ്. സിൻഡിക്കേറ്റിന്റെ അധികാരപരിധിയില്‍ വരുന്ന വിവിധ വിഷയങ്ങളില്‍ അടിയന്തര സാഹചര്യങ്ങള്‍ പരിഗണിച്ച്‌ വൈസ് ചാൻസലർക്ക് അധികാരം വിനിയോഗിക്കാനുള്ള വ്യവസ്ഥയുണ്ട്. ആ അധികാരം വിനിയോഗിക്കാത്തത് അനാവശ്യ കാലതാമസത്തിന് വഴിയൊരുക്കും. വിദ്യാർത്ഥികളുടെ ജനാധിപത്യാവകാശങ്ങളെ അവഗണിച്ചുള്ള സമീപനം തിരുത്താൻ അധികൃതർ തയ്യാറാകാത്തപക്ഷം വിദ്യാർത്ഥി പ്രക്ഷോഭങ്ങള്‍ ആരംഭിക്കുമെന്ന് എസ്.എഫ്.ഐ അറിയിച്ചു.
