മുംബൈ : പൂനെയിൽ നടുറോഡിൽ പെൺകുട്ടിക്ക് നേരേ ലൈംഗികാതിക്രമം നടത്തുകയും പെൺകുട്ടിയെ തട്ടിക്കൊണ്ടുപോകാൻ ശ്രമിക്കുകയും ചെയ്തയാളെ നാട്ടുകാർ പിടികൂടി പൊലീസിൽ ഏൽപ്പിച്ചു. ഉത്തർപ്രദേശ് സ്വദേശിയായ ജിതു കിഷോരിലാൽ സരോജി(30)നെയാണ് നാട്ടുകാർ പിടികൂടി പൊലീസിന് കൈമാറിയത്.
കഴിഞ്ഞ ദിവസം പൂനെ സുഖ് സാഗർ നഗറിൽ സമർഥ് ഡയറിക്ക് സമീപത്തായിരുന്നു സംഭവം. സുഹൃത്തിനെ കാത്ത് റോഡിൽ നിൽക്കുകയായിരുന്ന 18കാരിക്ക് നേരേയാണ് പ്രതി അതിക്രമം കാട്ടിയത്. പെൺകുട്ടിയുടെ സമീപത്തെത്തിയ പ്രതി ആദ്യം ശരീരത്തിൽ മോശമായി സ്പർശിക്കുകയായിരുന്നു. തുടർന്ന് സമീപത്ത് തന്നെ നിലയുറപ്പിച്ച ഇയാൾ പെൺകുട്ടിയെ കടന്നുപിടിക്കുകയും പെൺകുട്ടിയെ എടുത്തുകൊണ്ടുപോകാനും ശ്രമിച്ചു.
അതിക്രമം ചെറുത്ത പെൺകുട്ടി ഇതിനിടെ ഉറക്കെ ബഹളം വെച്ചു. ഇതോടെ സംഭവം കണ്ട് നാട്ടുകാർ ഓടിയെത്തി. തുടർന്ന് ഇവർ പെൺകുട്ടിയെ സുരക്ഷിതയാക്കുകയും അക്രമിയെ കൈകാര്യം ചെയ്യുകയുമായിരുന്നു. പ്രതിയെ പിന്നീട് പൊലീസിന് കൈമാറി. ഇയാൾക്കെതിരേ കേസെടുത്തതായും വിശദമായി ചോദ്യം ചെയ്തു വരികയാണെന്നും പൊലീസ് അറിയിച്ചു.
