തിരുവനന്തപുരം: സംഘ്പരിവാര്‍ പ്രസിദ്ധീകരണവുമായി സഹകരിച്ച്‌ സ്‌കൂളുകളില്‍ സ്‌കോളര്‍ഷിപ്പ് പരീക്ഷ നടത്താന്‍ അനുമതി നല്‍കിയതില്‍ രൂക്ഷ വിമര്‍ശനവുമായി എസ്‌എഫ്‌ഐ സംസ്ഥാന സെക്രട്ടറി പി.എസ് സഞ്ജീവ്.
കോണ്‍ഗ്രസ് സര്‍ക്കാര്‍ സംഘികളെ മന്ത്രിമാരുടെ ഓഫീസില്‍ നിയമിച്ചാല്‍ എന്ത് സംഭവിക്കും? ലീഗ് മന്ത്രിയുടെ വകയാണ് ആര്‍എസ്‌എസ്- പരിവാര്‍ സംഘടനക്ക് സ്‌കോളര്‍ഷിപ്പ് പദ്ധതി. ഈ ആര്‍എസ്‌എസ് പരിപാടി എങ്ങനെയാണ് ലീഗ് മന്ത്രിയുള്ള വിദ്യാഭ്യാസ പ്രോജക്ടിന്റെ ഭാഗമായി അവതരിപ്പിച്ചത്?
കേരളത്തിലെ ലീഗ് അനുഭാവികളും പ്രവര്‍ത്തകരും ഇനിയെങ്കിലും മിണ്ടിയില്ലെങ്കില്‍ കോഴിക്കോട്ടെ ലീഗ് ഓഫീസില്‍ വൈകാതെ സി.എച്ചിന് പകരം സവര്‍ക്കറുടെ ചിത്രം ഉയരും -സഞ്ജീവ് വിമര്‍ശിച്ചു.
സംസ്ഥാനത്തെ സ്‌കൂളുകളില്‍ സംഘ്പരിവാര്‍ സംഘടനയായ ബാലഗോകുലത്തിന്റെ പ്രസിദ്ധീകരണമായ 'മയില്‍പ്പീലി' മാസികയുടെ ആഭിമുഖ്യത്തില്‍ 'യങ് സ്‌കോളര്‍ എക്‌സാം' എന്ന സ്‌കോളര്‍ഷിപ്പ് പരീക്ഷ നടത്താന്‍ പൊതുവിദ്യാഭ്യാസ വകുപ്പ് അനുമതി നല്‍കിയ സംഭവമാണ് വിവാദമായത്.
യുപി, ഹൈസ്‌കൂള്‍ വിദ്യാര്‍ഥികള്‍ക്കായാണ് 'യങ് സ്‌കോളര്‍ എക്‌സാം' എന്ന പേരില്‍ സ്‌കോളര്‍ഷിപ്പ് പരീക്ഷ. ദേശീയ അധ്യാപക പരിഷത്ത് ജനറല്‍ സെക്രട്ടറി ടി. അനൂപ് കുമാറിന്റെ അപേക്ഷയിലാണ് പരീക്ഷ നടത്താന്‍ അനുമതി നല്‍കിയത്..
തീരുമാനം വിവാദമായതോടെ പൊതുവിദ്യാഭ്യാസ ഡയറക്ടറോട് മന്ത്രി എന്‍. ഷംസുദ്ദീന്‍ റിപ്പോര്‍ട്ട് ആവശ്യപ്പെട്ടിരിക്കുകയാണ്.
