കൊച്ചി: സൗദി അറേബ്യയിലെ നിലവിലെ സുരക്ഷാ സാഹചര്യങ്ങള് കണക്കിലെടുത്ത്, ജിദ്ദയിലേക്കും തിരിച്ചുമുള്ള വിമാന സര്വീസുകള് റദ്ദാക്കിയ നടപടി നവംബര് 24 വരെ നീട്ടിയതായി എയര് ഇന്ത്യയും എയര് ഇന്ത്യ എക്സ്പ്രസും അറിയിച്ചു.
സൗദി അറേബ്യന് നഗരങ്ങളായ റിയാദ്, ദമ്മാം എന്നിവിടങ്ങളിലേക്കും തിരിച്ചുമുള്ള സര്വീസുകള് ഈ രണ്ട് എയര്ലൈനുകളും നേരത്തെ തന്നെ നവംബര് 30 വരെ റദ്ദാക്കിയിരുന്നു.
'മേഖലയിലെ നിലവിലെ സാഹചര്യം കണക്കിലെടുത്ത്, ജിദ്ദയിലേക്കും തിരിച്ചുമുള്ള എയര് ഇന്ത്യ, എയര് ഇന്ത്യ എക്സ്പ്രസ് വിമാന സര്വീസുകള് 2026 നവംബര് 24 വരെ റദ്ദാക്കിയിരിക്കുന്നു.
റിയാദ്, ദമ്മാം എന്നിവിടങ്ങളിലേക്കും തിരിച്ചുമുള്ള വിമാന സര്വീസുകള് 2026 നവംബര് 30 വരെ റദ്ദാക്കിയ നിലയില് തുടരും,' എയര് ഇന്ത്യ എക്സില് പങ്കുവെച്ച കുറിപ്പില് അറിയിച്ചു. നേരത്തെ, ജിദ്ദയിലേക്കുള്ള സര്വീസുകള് നവംബര് 21 വരെയായിരുന്നു റദ്ദാക്കിയിരുന്നത്.
നവംബര് 20-നോ അതിനുമുമ്പോ ബുക്ക് ചെയ്തതും, നവംബര് 24 വരെ ജിദ്ദയിലേക്കോ തിരിച്ചോ യാത്ര ചെയ്യാന് നിശ്ചയിച്ചിരുന്നതുമായ യാത്രക്കാര്ക്ക്, സീറ്റുകളുടെ ലഭ്യതയ്ക്ക് വിധേയമായി യാത്രാ തീയതി സൗജന്യമായി മാറ്റാം. അല്ലെങ്കില് ടിക്കറ്റ് റദ്ദാക്കി പണം പൂര്ണമായും തിരികെ വാങ്ങാവുന്നതാണ്.
നവംബര് 10-നോ അതിനുമുമ്പോ ബുക്ക് ചെയ്തതും, നവംബര് 30 വരെ റിയാദിലേക്കോ ദമ്മാമിലേക്കോ (തിരിച്ചോ) യാത്ര ചെയ്യാന് നിശ്ചയിച്ചിരുന്നതുമായ യാത്രക്കാര്ക്കും ഈ സൗകര്യം ബാധകമായിരിക്കും.






