പത്തനംതിട്ട: മണ്ഡല മകരവിളക്ക് ഉത്സവകാല പൊതുജനാരോഗ്യ പരിശോധനകള്‍ ശക്തമാക്കുന്നതിനായി സ്വാസ്ഥ്യം ശരണം ആരോഗ്യത്തോടെ ശരണയാത്ര എന്ന പേരില്‍ പൊതുജനാരോഗ്യ ബോധവത്ക്കരണ കാമ്പയിനുമായി ആരോഗ്യവകുപ്പ്.
മണ്ഡലപൂജ മകരവിളക്ക് മഹോത്സവ കാലത്തെ പകർച്ചവ്യാധി പ്രതിരോധത്തിന്റെ ഭാഗമായുള്ള മുന്നൊരുക്ക പ്രവർത്തനങ്ങള്‍ ആരംഭിച്ചതായി ജില്ലാ മെഡിക്കല്‍ ഓഫീസർ ഡോ.ജെ.മണികണ്ഠൻ അറിയിച്ചു.
ക്യാമ്പയിൻ പ്രവർത്തനങ്ങളുടെ ഭാഗമായി നവംബർ രണ്ടിന് രാവിലെ 10.30ന് ഭക്ഷണശാലകളിലെ ജീവനക്കാർക്കായി പമ്പ ശ്രീരാമസാകേതം ഹാളില്‍ ജില്ലാ കളക്ടർ എ.നിസാമുദ്ദീന്റ അദ്ധ്യക്ഷതയില്‍ പരിശീലന പരിപാടി സംഘടിപ്പിക്കും.
തുടർ ദിവസങ്ങളില്‍ ഹെല്‍ത്ത് സ്‌ക്വാഡ് ഭക്ഷണശാലകള്‍ നേരിട്ട് സന്ദർശിച്ച്‌ ആവശ്യമായ നിർദ്ദേശങ്ങള്‍ നല്‍കും. ഉത്സവകാലത്ത് നിർദ്ദേശങ്ങള്‍ ലംഘിച്ച്‌ പ്രവർത്തിക്കുന്നവർക്കെതിരെ നേരിട്ട് നിയമ നടപടികളിലേക്ക് കടക്കും.
വ്യാജ ഹെല്‍ത്ത് കാർഡുകള്‍ ശ്രദ്ധയില്‍പ്പെട്ടതിനാല്‍ ഹെല്‍ത്ത് കാർഡുകളുടെ ആധികാരികത സംബന്ധിച്ച പരിശോധനക്കായി ക്രമീകരണങ്ങള്‍ ഏർപ്പെടുത്തിയിട്ടുണ്ട്. തീർത്ഥാടകർക്ക് ആവശ്യമായ വൈദ്യസഹായത്തിനുള്ള സൗകര്യങ്ങളും ജീവനക്കാരുടെ നിയമനവും പൂർത്തീകരിച്ചു.
അയ്യപ്പഭക്തർക്കുള്ള നിർദ്ദേശങ്ങള്‍ അടങ്ങിയ ബോർഡുകള്‍ സ്ഥാപിക്കുന്നതിനുള്ള നടപടികളും പൂർത്തീകരിച്ചു വരുന്നതായി ജില്ലാ മെഡിക്കല്‍ ഓഫീസർ അറിയിച്ചു.
