പത്തനംതിട്ട: ശബരിമല മണ്ഡല മഹോത്സവത്തോടനുബന്ധിച്ച് പൂങ്കാവന മേഖലയിലെ മദ്യ, പുകയില ഉൽപ്പന്നങ്ങളുടെ വിൽപ്പനയ്‌ക്കും ഉപഭോഗത്തിനും നിരോധനം ഏർപ്പെടുത്തി ഉത്തരവിറക്കി.
നവംബർ 15 മുതൽ 2027 ജനുവരി 20 വരെയാണ് നിരോധനം പ്രാബല്യത്തിലുണ്ടാകുക.
റാന്നി താലൂക്കിലെ പെരുനാട് വില്ലേജിൽ ഉൾപ്പെടുന്ന ചാലക്കയം, പമ്പ, ത്രിവേണി, കരിമല, ചെറിയാനവട്ടം, വലിയാനവട്ടം, നീലിമല, ശബരിപീഠം, മരക്കൂട്ടം, സന്നിധാനം, കുമ്പളാംതോട്, ഒരക്കുഴി, പ്ലാപ്പള്ളി, നിലയ്‌ക്കൽ, അട്ടത്തോട്, കൊല്ലമൂഴി എന്നീ പ്രദേശങ്ങളിലാണ് നിരോധനം ബാധകമാകുന്നത്.
കൊല്ലമുള വില്ലേജിലെ പമ്പാവാലിയിലും നിരോധനം ഏർപ്പെടുത്തിയിട്ടുണ്ട്. എന്നാൽ അരയാഞ്ഞിലിമൺ പ്രദേശത്തെ ഇതിൽനിന്ന് ഒഴിവാക്കിയിട്ടുണ്ട്.
നിരോധനം കൃത്യമായി നടപ്പാക്കുന്നുണ്ടെന്ന് ഉറപ്പാക്കുന്നതിനും നിരീക്ഷണം ശക്തമാക്കുന്നതിനുമായി സന്നിധാനം, പമ്പ, നിലയ്‌ക്കൽ എന്നിവിടങ്ങളിൽ താൽക്കാലിക എക്സൈസ് റേഞ്ച് ഓഫീസുകൾ പ്രവർത്തനം ആരംഭിച്ചു.
തീർഥാടനകാലത്തെ പരിശോധനകളും നടപടികളും ഈ ഓഫീസുകൾ കേന്ദ്രീകരിച്ചായിരിക്കും.
പമ്പ കേന്ദ്രീകരിച്ച് അസിസ്റ്റന്റ് എക്സൈസ് കമ്മീഷണറുടെ നേതൃത്വത്തിൽ പ്രത്യേക കൺട്രോൾ റൂമും പ്രവർത്തിക്കും.
നവംബർ 15 മുതലാണ് കൺട്രോൾ റൂമിന്റെ പ്രവർത്തനം ആരംഭിക്കുക. മണ്ഡല-മകരവിളക്ക് തീർഥാടനകാലത്ത് പൂങ്കാവന മേഖലയിലെ നിരോധനം ഉറപ്പാക്കുന്നതിനും നിയമലംഘനങ്ങൾക്കെതിരെ നടപടി സ്വീകരിക്കുന്നതിനുമാണ് എക്സൈസ് വകുപ്പിന്റെ പ്രത്യേക സംവിധാനം.
